Пәйгамбәребез Мөхәммәднең ﷺ сәхабәләре арасында да шагыйрьләр булган. Алардан: Хәсән бин Сәбит, Кәгъб бин Мәлик, Габдуллаһ бин Раууәхә. Алар шигырьләре аша Исламны, Пәйгамбәрне ﷺ мөшрикләрнең «явыз тел»ләреннән саклаганнар, аларның адашуларын ачыктан-ачык бәян иткәннәр, дошманнарга каршы көрәштә сахәбәләрнең рухларын күтәргәннәр.
Аллаһның илчесе ﷺ: «Дөрестән дә, кайбер шигырьләрдә хикмәт бар», – дигән (Әт-Тирмизи, 2845; Әбү Дәүд, 5011; Әхмәд, 1/269). Монда сүз күркәм мәгънәле, әдәпле шигырьләр хакында бара. Шушы хезмәттә тупланган шигырьләр дә «хикмәтле шигырьләр» булыр дип ышанасыбыз килә.