Алла Тағала Құранда барлық пайғамбарлардың қауымы бар екенін айтып өткен. Себебі олардың қауымына қаратып айтылған сөздері “Ей қауымым!” деген сөзбен айтылған.
Тек Иса Пайғамбардан басқа. Иса Пайғамбардың Құранда бір аятта болсын “Ей қауымым!” деп айтқан сөзі келмеген. Алайда “Ей Исраил ұрпақтары!” деген сөзбен келеді.
Неге? Себебі Иса пайғамбар Алланың мұғжизасымен әкесіз дүниеге келген. Яғни Мариям анамыз пәк күйінде Иса Пайғамбарға жүкті болып, оны дүниеге әкелген. Ал енді әкесіз туған баланың қауымы қайдан болсын? Себебі қауым әкеге тиесілі болғандықтан болады. Демек Иса Пайғамбардың әкесі болмағандықтан Оның қауымы да жоқ. Сондықтан да Алла Тағала Құранның бір жерінде де қауым сөзін ол кісіге тиесілі етпеген.
Адам атамыз да әке-шешесіз жаратылды ғой. Оның қауымы Құранда айтылған ба? Әлбетте жоқ. Алайда Құранда “Адамзат баласы(ұрпақтары)” деген сөз ғана айтылған. Яғни Адам атаға да қауым сөзі қосылып айтылмаған. Себебі Адам ата әкесіз, тіпті шешесіз де жаратылды.
Адам ата мен Иса Пайғамбар осы тұрғыдан бір-біріне ұқсас. Және Құранда да ол ұқсастық айтылып, екеуінің де есімі бір аятта баяндалған.
﴿ إِنَّ مَثَلَ عِيسَىٰ عِندَ ٱللَّهِ كَمَثَلِ ءَادَمَ ۖ خَلَقَهُۥ مِن تُرَابٍ ثُمَّ قَالَ لَهُۥ كُن فَيَكُونُ ﴾
Шынында, Алланың алдында (дүниеге келу тұрғысынан) Исаның мысалы Адамға ұқсайды. Алла оны (яғни Адамды ер мен әйелдің қатысынсыз) топырақтан жаратты, содан кейін оған (рух үрлеп) «Бол!» дегенде, бірден бола қалды.
(«Әли Имран» сүресі 3:59)
Міне Құранның әрбір нәрсені орнымен әрі дәл айтуы ол да Алла Тағаланың шеберлігінен. Себебі Алла Тағала барлығын білуші. Ал барлығын білуші мұндай нәрседе қате сөйлеп қоюы мүмкін бе? Әлбетте жоқ.
Шейх
Юсуф Хаттар каналынан алынып, мағыналай аударылды.