↝ dámelen

Бұл философиялық романға өмірдің мәні, өзекті өртеген өкініш және ішкі тоқырау тақырыптары арқау болған. Сюжеті тың.

Басты кейіпкер – Нора Сид, 35 жастағы әйел, сәтсіздіктерге тап болдым, ғұмыр кешудің еш мәні жоқ деп бекінеді. Ол жұмысынан айырылып, музыкант болудан бас тартады, өзін ешкімге керексіз сезініп, өз-өзіне қол жұмсауға шешім қабылдайды. Алайда өлімнің орнына Түнгі кітапханаға тап болады: ал бұл – өмір мен өлімнің арасындағы жұмбақ кеңістік. Онда әрбір кітап оның балама өмірін сипаттайды, егер ол басқаша өмір сүрсе, өзге таңдау жасаса қалай болатынын, не өзгеретінін көрсетеді.

Мойындайықшы, бұндай мүмкіндікті қай-қайсымызда армандаймыз ғой? Көбіміздің ішімізді жегідей жеген әттеген-айымыз бар. «Бұлай болмағанда, өмірім әлдеқайда жақсы болушы еді» дейтін өкінішіміз табылады.

Кітапханашы мисси Элмнің көмегімен Нора түрлі өмірлерді бастан өткереді. Жақындары бұған танған, бұл өзі кезінде қалаған өмірлерді сүріп шығады. Кеңістік пен уақытта есеп жоқ. Нора әр өмірге үмітпен қадам басқан сайын, оқырман да осы өмірінде бақытты болсыншы деген үміттің жетегінде болады.

Нора өз өмірінде көптеген мүмкіндіктен қапы қалдым деп ойлайды. Бірақ басқа өмірлерді бастан өткере отырып, кез келген жолдың өзіндік қиындығы да болатынын түсінеді. Кітаптың идеясы – өмірдің мәні мінсіздікке ұмтылуда емес, керісінше, өз қателіктерімізді қабылдап, қазіргі сәттен қуаныш табу дегенге саяды.

Кітапты оқып отырып, аударма емес, әу баста өз тілімізде жазылғандай әсер қалдырады. Өте сауатты аударылған. Күрделі ойлар сөз-құрал арқылы жеңіл түсіндірілген.

Бұл кітап өмір туралы ойландыратын, шабыт беретін шығармаларды жақсы көретіндерге, сондай-ақ өмірінде қиын кезеңдерді бастан кешіп жүрген біз бен сізге ой салады деп білемін.

#оқығаным

2024 жыл
1. Санжар Керімбай, Әділбек Нәби «Қуыскеуде»
2. Тұрысбек Сәукетаев «Мен – жындымын»
3. Әбіш Кекілбаев «Елең-алаң»
4. Элиф Шафак «Махаббаттың қырық қағидасы»
5. Таласбек Әсемқұлов «Талтүс»
6. Лира Қоныс «Шахарбанудың сыңсуы»
7. Дидар Амантай «Гүлдер мен кітаптар»
8. Робин Шарма «Монах, который продал свой Феррари»
9. Мақсат Мәлік «Абыл мен Қабыл»
10. Әлихан Жақсылық «Нотр-Дамда құлшылық жасау керек пе?»
11. Харуки Мураками «Норвег орманы»
12. Мұхтар Мағауин «Көк балақ».
13. Маркс Мэнсон «Бәріне қолыңды бір сілте»
14. Джозеф Мөрфи «Түпсананың күші»
15. Ұларбек Нұрғалымұлы «Дайағашшы»
16. Әкім Тарази «Оңашадағы үй»
17. «Нәзипа Құлжанова: қазақ әйелдеріне манифест» кітабы
18. Әбіш Кекілбаев «Шыңырау»
19. «Жайық қыраны». Профессор О.Бүркітұлын еске алу кітабы
20. Санжар Керімбай, Әділбек Нәби «Қаныш және ғылыми майдан»

Экзистенциализм бойынша адам болмысы біреуге жұтылумен емес, біреуден дараланып тұруымен өз өрнегін табады. Жаратушы құдірет әр адамды бір-біріне ұқсамайтын етіп жаратқан. Кім Тәңірі берген ерекшелігін дамытып алып кетсе, соның болмысы дұрыс қалыптасады.