AYATZHAN / Мінез!

Кеше Barys Media арнасына тікелей эфирде берген сұхбатым еді…

Қазіргі білім саласының жағыдайлары туралы, жалпы ойлардың бір парасы…

https://www.youtube.com/live/1lI1Jyp-TSA?si=rL14XRA6g7g68CWE

​​Бүгін наурыз тойлап жатуымыз керек еді.
QAZBILIM ұлттық лицейлері наурыз мерекесіне әу бастан қатты көңіл бөлетінбіз.

Биылғы наурыз мерекесі ораза мезгіліне түсуіне байланысты, наурызды ораза аяқталған соң бір тұтас 13 сәуір күні тойлаймыз деп ресми жоспарлаған ек.

Ойлаған ой кез келген жағдайға байланысты өзгереді ғой. Біздің де жоспар елдегі жағдайға байланысты өзгерді.
17 облыстың 10 облысында төтенше жағдай боп, халық қарғын судың қасіретін тартып жатқанда наурыз тойлап, ән салып жату балалардың тәрбиесіне де, адамдыққа да жат. Сондықтан биылғы жылғы наурыз мерекесін ресми түрде тойламаймыз деп шештік. Той тойлайтын жағдай емес.

Оның есесіне QAZBILIM GROUP компаниясының 8 қалада наурыз мерекесін тойлауға деп бөлінген 2,5 миллион теңгеге жуық ақшаны тасқын судан зардап шегіп жатқан өңірлерге аз да болса көмек болсын, бір жанның болса да жасын сүртіп, қуаныш сыйласын деп соған бөлуді жөн көрдік.

Қазір QAZBILIM ұлттық лицейі бар өңірлердің ішінде Атырау облысы мен Қостанай облысы қатты қиындықта қалды. Ол жақта оқып жатқан оқушыларымыздың ішінде үйі суға кеткендері бар. Қаншама жұрт басындағы панасынан, алдындағы малынан айырылып есеңгіреп жатыр.

Сондықтан, QAZBILIM GROUP компаниясы бөлген қаржыдан тыс, қызметкерлеріміз де өз көмегін жинап жатыр.
Алдағы апта жиналған қаржыны теңдей бөліп, Қостанай мен Атырау облысына қарғын судан зардап шеккен жандар үшін жылу ретінде жібереміз.

Бұндайда қиналған жұртқа қолдан келер көмекті беру бәрімізге азаматтық парыз деп ойлаймын.

Құрметті, QAZBILIM ұлттық лицейі ата-аналары сіздер де біз арқылы қарғын судан зардап шеккен жандарға көмектескілеріңіз келсе, көмектеріңізді 8 708 830 3589 нөміріне ( Назерке.А) жібере аласыздар.

Еліміз аман жұртымыз тыныш болсын!
Еліміздегі қиын жағдай тезірек аяқталсын!
Бас аман, бауыр бүтін болсын!
Әр шаңырақта шаттық толы болғай!

P.S. Суретте апат жағдайында еріктілер қатарында жүрген QAZBILIM ұстаздары.

Бүгін ғылым күні!
Бүгін ғалым, тұңғыш академик Қаныш Сәтбаевтың туған күні.

Ғылым  — уақыт пен кеңістікте бар, зерттеуге болатын шынайы нақты нәрселердің заңдары мен қағидаларын, тәртібі мен құрылымын объективті түсіндіретін, эксперимент пен бақылауға негізделіп, математикалық есептеуді қолданып, жүйелі түсінік қалыптастыратын таным саласы. Жалпы тұрғыда ол жүйелі білім мен ғылыми тәжірибені меңзесе, ал арнайы мағынада ғылыми әдістер арқылы жинақталған логикалық білім жүйесін көрсетеді. Яғни, ғылым ғылыми білімдерді ғана емес, сол білімдерге қол жеткізудің барлық жолдары мен әдістерін түгел қамтитын біртұтас кешенді жүйе, - деп анықтама береді Уикипедия.

Осы анықтамадағы соңғы сөйлем білімдерге қол жеткізудің барлық жолдары мен әдістерін түгел қамтитын біртұтас кешенді жүйе деп қортындыланады. Бізде сол біртұтас жүйе қаншалық дамыды?

Ғылым дамуы үшін білім дамуы, білім дамуы үшін педагогика мен методика (әдістеме) даму керек. Біздің ел тәуелсіздік алғалы бұл салада тыңнан сүрен сала алмады. Алаштықтар кезеңінде үлкен бір сілкініс жасалғанмен кейін жалғаспады. Сондықтан, бүгінде педагогика, психология, методика әр кімнен көшірумен, бірде анау ел озық, бірде мынау ел озық деп ала сұрып, сыртқы формасын көшіре салумен келе жатырмыз.

Сондықтан да, білім саласының көп реформасы іріп, жан жағы ащылау айтқанда шіріп жатыр. Тәрбие бұзылып, тағылым құрып жатыр.

Иә, әлем ғылымы көш ілгері кетті, ол жасанды интеллект, ол нано технология, ол жасыл экономика, жасыл энергия деп жылда жаңа деңгейге көтеріліп жатыр.

Біз ше? Бізде сұрақ көп.

Сондықтан, ғылым туралы әңгімені білімнен бастау керек. Себебі, ірге тасы.
Ал, білім туралы әңгімені мектептен бастау керек. Ал оның жыры бізде мың бір түн!…

Өткенде QAZBILIM жобаларының 10 жылдық мерейтойы кезінде осы ұлттық білім кеңістігін дамыту, үлес қосу мақсатында “Ұлттық мектеп модельі: тәрбиеден білімге” тақырыбында республикалық ғылыми-практикалық конференция өткізген едік.

Сол конференцияны келіп тыңдай алмағандар үшін арнайы толық видео нұсқасы. https://youtu.be/mCQDNyr33gY?si=QElKa7Ug-kpSlNfr

Ғылым күні құтты болсын!
Білім және ғылым дамып, дамыған елдер қатарына жетейік!

Жақында берген соңғы сұхбаттарымның бірі еді…

https://youtu.be/OIRt8E2jVg4?si=j0KzWxRfAcyhXB5j

​​QAZBILIM жобаларының 10 жылдық мерей тойына 10 пост
№4 пост.

QAZBILIM –нің 10 жылдық мерей тойына жеткендегі бұл білім тойымыз 10 жылға есеп беру, келесі он жылға жоспар құру ғой. Жай ақпараттық сайттан басталып, бүгінде 420 адам еңбек ететін, 6 бағытта 8 қалада жұмыс істейтін, білім саласындағы үлкен кәсіби компанияға айналуға дейінгі тарихы біраз бұралаң күнді бастан кешірді.

10 жылдық тарихта ұйқысыз түндер, күлкісіз күндер өтті. Талай табиғи да, адами да кедергілерді көрдік. Экономикалық қиындықтың алуан түрін бастан кешірдік. Талай рет жауып тастап, бір мектепте жай мұғалім болып жүруге ниет ете жаздап тәс қалдық. Бірақ шыдап, дамыттық бүгінгі деңгейге келді. Он жылда қанша тірлік атқарды ол алдағы посттың еншісінде.

Ал, осы 10 жылда осы деңгейге жетуі тек менің еңбегім емес, ол мені қолдайтын командамның қажымас қайсарлығы. Себебі, талай рет жалақы кешікті, сондайдың әсерінен талай рет кредиттерінің мерзімі өтіп кетті. Бірақ идеяға шын берілген командам ондай қиындықта мені жолда қалдырмады, сенді, қолдады. Бүгінде кей күндердегі қиындық ертегі секілді.

Ал, өңірлерден Республикалық QAZBILIM орталығы, QAZBILIM ұлттық лицейі ашыла бастағанда Астана, Алматыдағы жылы орындарын, бастарындағы баспаналарын тастап, QAZBILIM идеясы үшін өңірлерге мен көш деген бағытқа көшті. Кейбірі салт бас, кейбірі бала шаға отбасын алып, бір өңірден бір өңірге көшуі жай іс емес, үлкен қолдау еді.

Сол қолдаудың арқасында 8 қаланы бүгінде алаңсыз дамытып, бір QAZBILIM авторлық медтодикасымен білім беріп, бір идеямен жұмыс істеп жатырмыз.

Енді 10 жылдық мерей тойда сол жандардың мерейін өсіргім келді. Керемет мүмкіндігім, артылып бара жатқан байлығым жоқ, керісінше басымда толған кредит болса да, ұстаздың еңбегі бағалану керек. Өз қиындығым шешіледі, ұстаздарымның мерейі тасысын деген мақсатта он жылдыққа арнайы марапат дайындадым және оны концертте аты аталғанша ешқайсысына сен марапатталасың демедім. Сезінсін дегенім ғой.

Сонымен шамамызға қарай:
15 адамға 100 мың теңгеден,
8 адамға 200 мың теңгеден,
5 адамға 300 мың теңгеден,
5 адамға 500 мың теңгеден,
4 адамға бір миллион теңгеден ақшалай марапат;
Бір адамға бір бөлмелі пәтер сыйладық!
Және бұрын QAZBILIM- де көп еңбек етіп, қазіргі таңда белгілі себеппен жұмыстан қол үзген екі әріптесімізді, QAZBILIM жобаларымен серіктес боп, талай көмектескен 4 компанияны арнайы марпаттадық.

Бәріне сыйлықтан тыс, QAZBILIM жобаларына 10 жыл мерекелік төс белгісі және арнайы құрмет грамотасын ұсындық. Естелік болсын дегендегі ой ғой.

Иә. Бүгінге осындай ерен еңбекті серіктерім болмаса, жалғыздың үні, жалғыздың шаңы шықпас еді. Осындай ерен еңбекті әріптестеріме және 10 жылдан бері тілеулес боп қолдап келе жатқан барша жанашыр жақындарыма алғыс білдіремін!

​​QAZBILIM жобаларының 10 жылдық мерей тойына 10 пост.

N2 пост.

Ұлттық мектеп идеясының басты мақсатының бірі ол ұлттық білім кеңістігін қалыптастыру. Финляндия, Сингапур, Жапон, неміс, орыс, батыс деп жан-жақтан әкеп қолданып жатқан ала құла реформалар ешқашан ұлтқа да, елге де опа бермейді. Себебі, біздің менталитет те, тарихи географиялық орнымыз да, құндылықтарымыз да дәл солардан басқа елміз. Сондықтан да көшірме реформалар ешқашан нәтиже бермейді.

Бұл туралы педогогика еңбегінде Мағжан Жұмабай біз болашақ үшін аянбай серттесе аламыз, егер мектебіміз таза, берік һәм өз жанымызға /қазақ жанына/ жақын болса ғана дейді. Ал, біздің арман дәл сондай мектеп қалыптастыру.

Дәл сол мақсатта 10 жылдық мерейтойдың басын еліміздің орта білім саласында өзіндік қолтаңбасы бар ұстаздар мен зерттеуші ғалымдарды шақырдық.

Алматыдан профессор Асқарбек Құсайынов ағам, профессор, кезіндегі ұлттық мектеп деген идеямен біраз жұмыс істеген Алма Қыраубаева апамыздың шәкірті Самал Дәрібайұлы ағамыз. Ұлытау білім басқармасы басшысы, сындарлы ойлы педагог Сафура Сейдуәлиқызы Төлектегі, ұстазым, көшбасшы директор Құралай Байтажикова, замандасым, ғалым Бекарыс Тілегенұлы Нұриман замандас әріптесім Жарқын Сәленұлы бастаған алты спикер бүгінгі орта білім және ондағы ұлттық идеология, білім мен тәрбие сапасы туралы біраз ойларын түйдек түйдек ұсынды.

Конференцияның соңғы спикері ретінде өзім ұлттық мектеп концепциясы туралы ойыммен бөлісіп, алдағы мақсаттарымды жеткіздім. Конференция тізгінін QAZBILIM жобаларының белді қызметкері, Алаштанушы ғалым, досым Ұшқын Сәйдірахманұлы ұстап, бүкіл конференциядағы ойды тұздықтап отырды.

Конференцияның басты мақсаты да сол, ұлттық бағыттағы білім беру форматын қалыптастыруға ғылыми ізденіс жасау.

Конференцияны QAZBILIM Алматы ұлттық лицейіндегі кішкене ғана акт залға жасап ек, ине шаншар жер болмады. Конференцияға Назарбаев университеті ғалымдарынан бастап, қоғам қайраткерлері, журналистер, 100-ден астам ұстаздар қатысты. Жалпы залда 200 ге жуық адам 5 сағаттан астам тапжылмай тыңдады. Біраз адам тіпті сыртта тік тұрып тыңдауға мәжбүр болды. (Кең зал жалдап өткізбеппін деген ойға келдім, бірақ, мүмкіндікке қарай әрекет етіп ек.)

Конференция барысында өте мағыналы, тың ойлар айтылды, ұсыныстар тасталды.

Бір ауыз сөзімді тастамай конференцияға кеп сүбелі ойымен бөліскен спикерлерге және арнайы кеп қатысқан барша тыңдаушыларға мың алғыс білдіремін!

P.S. Келе алмаған әріптестердің сұрауы бойынша конференцияның видеосын алдағы күндері https://youtube.com/@QAZBILIM?si=aPb_UCIQN8uyIlCs арнасына жариялаймыз!