БЛОГЕРЛЕРДІҢ САЛЫҒЫ ТУРАЛЫ
2022-жылы Блиновсксая салық бойынша ұсталғанда маған қатты әсер еткен. Өзім салықты уақтылы төлеймін, құжаттарым түгел, қорқатын себеп жоқ. Бірақ Ресейдегі жағдай қатты шайқады, қорықтым, шошыдым. Тіпті паническая атака басталды. Тәнім дір-дір етіп, арасында қалтырап тұрып қалатын да болдым.
Осы мәселеге назар аударып, іздене бастадым. Неге көрші елдегі жағдай қатты әсер етіп жатыр? Маған не болды?
2022-жылы ата-тек бойынша білім алып, өзім көп практика-терапиядан өтіп, “род”-қат қатты кіріскен кез еді. Жауабын да ата-тек қабатынан таптым.
Ата-тегімде репрессияға ұшыраған жан бар. Бір атамды билік өкілі ұстап әкетіп, қамаған, соңында атқан. Тәні көмусіз қалған, қайда екенін нақты білмейміз. Отбасы ойран болып, әйелі АЛЖИР-ға түспес үшін құрсақтағы балаға қарамастан қашқан. Үй-жайынан айрылған дегендей. Ұрпақтан ұрпаққа берілетін үлкен, ойсыраған трансгенерациялық травма бар.
Сұрастыра келе соны анықтадым. Көрші елдің билігі әп-сәтте тас төбеден түскенде мендегі осы үрей көтерілген. Ұйықтап жатқан травманың ошағы оянған.
Содан бері ата-тектің қалай ықпал ететінін білем, сездім, көрдім. Тереңдеп білім іздедім, әлі де сіңірудемін. Өзімдегі түрлі қабатты аршып келем.
Заңды, билікті, мемлекетті, жалпы үлкен жүйелерді құрметтеу, үлкен жүйемен санасу, заңдылығына бағынуға аса мән беруді қолға алдым. Құжаттарымды түгелдеп, жүйедегі орнымды нақтыладым. Салықты әу бастан түгендеп жүрем, қайта тексертіп, бәрін “прозрачно” қылуға ұмтылдым. Өйткені менде ата-тектің программасы бар, кез келген уақта динамикасы қосылып кетуі мүмкін екенін білдім. Өзім үшін жасап жүргем.
Жақында қазақстандық блогерлердің салыққа берешегі бар деген тізім шықты ғой. Интернеттен көрдім алдымен. Бухгалтеріме хабарласып, мені тексеруді сұрадық. “Тазамыз” деді.
Қызығы, алдындағыдай қорқыныш, паника, тәнімдегі заряд болмады. “Спокойно”, қалыпты қабылдадым. “Мен құтылдым, басқалар тұтылды” деген масаттану да болған жоқ.
Кезінде әкеме қатты ренжитінмін. Мықты тергеуші болды, қолынан қандай қылмыстар өтетін. Ісін шешу үшін үлкен сомада ақша ұсынатын. Бір тиын пара алмады ғой. Тек айлығымен өмір сүрді. Нанға ақша жетпей, қиналған сәтінде де айлығын ғана алып жүрді. “Отбасын неге ойламайды, балаларын жақсы көрмей ме, достарының (бір салада істеді) балалары шалқып жүр, өте бай, күшті өмір сүреді. Әкем неге бүйтеді” деуші ем. Біз білмейтін, бірақ ықпал ететін бейсаналық сценарий-программалар барын қайдан білейін?! Сонда әкем просто ақшадан, тексерістен өлердей қорыққан ғой.
Қысқасы, үлкен жүйелердің заңы бар, ертелі-кеш айналып келеді. Әр жүйенің динамикасы бар. Трансгенерациялық травмалар бар. Дәуірдің қайталанатын циклі бар. Қазір өзі әлемде, дәуірде өзгеріс боп жатыр. Көп жүйелер қозғалуда.
Біреу үнемі көзге түсіп қала береді. Біреу көп “олқылық” жасаса да, құтылып кетеді. Оның себебі тереңде жатуы мүмкін.
Білім алған сайын өмір қызық әрі түсінікті, қауіпсіз бола түседі.
Блогерлердің салық қарызы туралы білгенде қандай ой болды сізде?
