Екинши бөлим

,,–Ғаң-ғаң, ғаң-ғаң, қобызым,
Яратқанның қолы узын!..
Яратқанға пәтленип,
Шайқаймысаң толысын!

Бүлкилдетип бүйирин,
Қуўармысаң үйирин!
Қайда шықтың Сәркарда,
Шақларыңды шыйырып?!

Нәўбәҳәрде көп едиң,
,,Азаймаспан" деп едиң.
Қасқыр тағы қырды ма,
Лашыңды топ-топ ети?!

Қырыласаң ҳәр айда,
Жайлаўды жаў тарайтты!..
Ҳақтың ерки өзинде –
Кимге қалай қарайды?!

Таўлар – жым-жырт, уйқыда,
Жаўлар жым-жырт уйқыда.
Үйириңнен узақлап,
Неге шықтың бийҳуўда?!

Өжетликти үдетпе,
Жаўың шаппас күн өтпей,
Түнде қайда барасаң,
Үйириңди гүзетпей?!

Қайтар болсаң қайт деймен!
Мәнзилиңди айт деймен?!.

СӘРКАРДА:
–Таў думанда туншығар,
Булытты сүзип Шың шығар.
Мақлуқаттың Тәңири,
Шыңнан сыртқа – Күн шығар.

Билемисең, адамзат,
Билмеймисең, адамзат, –
Үйи – Шыңдур Тәңирдиң!
Шыңнан берер ҳәмирди.
Бараман да айтаман,
Үйирим шеккен жәбирди! –

Ийт те бизге тоймайды!
Қус та бизди қоймайды!
Неге бунша Күн – Қудай,
Бизди қорлап ойнайды!

Аннан қуўды – шыдадық,
Мыннан қуўды – шыдадық,
Әдиллиги қаяқта,
Қулларына Қуданың?!

Азды көплер  талаған –
Өткен өмир қара қан!
Шағынаман Қуяшқа,
Шыңға шапшып бараман!

Айтарман да арзымды:
,,Дүзе, – деймен, – Барысыңды!
Қуяш болсаң Қудайлык,
Өте, – деймен, – парызыңды!

Аң патшасы Арыслан,
Қай жыртқыштан қалысқан?!
Бас ўәзири – Түлкиси,
Журдай инсап, намыстан!

Қазы етти Қасқырды.
Соннан көрдик ,,Бас! Қыр!.."ды.
Қуйрық қысып мықлыға.
Әззилерди постырды!..

Әззилерге дузағын,
Тәғдийир қурар узақ күн!
Әдил болсын Күн – Қудай,
Бәрше аңның дуз-ҳаққын!

Соны Ҳаққа айтаман,
Кеттим Күнниң жайы таман!
Несип болғай, үйирим,
Көриспеклик қайтадан!..

Шаўдырбай Сейитов

Канал: 👉 @Shawdirbay_Seyitov