Ережеп айы Алла Тағала Құранда айтқан 4 қасиетті де, харам айлардың бірі. "Расында, Алланың қасында көктер мен жерді жаратқалы Алланың Кітабындағы айлардың саны он екі. Бұлардан төртеуі құрметті айлар. Міне, осы берік дін. Онда бұл айларда өздеріңе зұлымдық етпеңдер...", - деген."Тәуба" сүресі, 36-шы аят.
Төрт құрметті айлар — Зул-Қағда, Зул-Хиджа, Мұхаррам және Ражаб, яғни, Ережеп айы. Бұларды харам айлары деген себебі жәй уақытта харам етілген істер мен күнәлар бұл айда ауырлайды. Күнәсі артады. Адам тілімен, көзімен, ойымен және қол-аяғымен жасайтын көп күнәлардан тиылу керек. Сол үшін де аятта "бұл айларда өздеріңе зұлымдық жасамаңдар", делінген. Күнә пенденің өзіне өзі жасаған зұлымдығы. Ал, қасиетті, құрметті деп саналуы себепті бұл айда жасалынған құлшылықтар мен ізгі амалдардың сауабы еселенеді. Қасиетті ай ғой деп берген аз ғана садақаңыз таудай боп қайтуы мүмкін. Бір күн ораза ұстасаңыз жүз күн оразаның сауабы берілуі ықтимал. Қосымша нәпіл намаздар оқыңыз, ата-анаңызды жиі қуантыңыз. Ережеп айы биыл 13-ші қаңтарда басталып, 11-ші ақпанда аяқталады. Ережеп — мұсылманша айлардың жетіншісі. Одан кейін Шағбан айы, содан соң айлардың сұлтаны — Рамазан айы келеді. Ережеп пен Шағбан айларында көбірек ораза ұстап, жиірек сауапты амалдар жасау Рамазанға деген дайындығыңыз боп саналады.
@aidyntarazi