KITAPAL

ByDastan: 20 дрон сындыру, бір істе табанды болу, ең әдемі мекен - қазақ жері | Kitapal podcast #37

Бүгінгі подкастта кітап авторлары: Данияр Жігітбек, Мирас Кесебаев, Шразаддин Каниязов видеограф, дронбегі Дастан Мұхамедрахымов aka ByDastan мырзамен сұхбаттасады. Сұхбат барысында жетістік жолында табанды болу, баланың тілін табу, бойдағы талантты ақысын беріп қолдану, дронның кесірінен абақтыға түсу, т.б. тақырыптарға әңгіме өрбітеді.

https://youtu.be/gLKg0NUryWM

ТЫНЫШТЫҚ НЫҒМЕТІ

Хәкімнің бірінен:
– Нығмет деген не? – деп сұрағанда:
– Байлық, өйткені мен кедейді тыныштығы жоқ деп көремін, – деген кезде:
– Тағы да бір нәрсе қоссаңыз, сіздің көзқарасыңызша нығмет басқа не болуы мүмкін?– дегенде, Хәкім:
– Амандық. Өйткені қорыққан адамның тыныштығы жоқ, – деді.
– Басқа нелер?– дегенде, Хәкім:
– Саулық, себебі науқастың тыныштығы жоқ, – деді.
– Тағы да айтсаңыз, – дегенде, Хәкім:
– Жастық, өйткені қарттықта рақат жоқ, – деді.

Хәкімнің бұл айтқандары – сырт көзге дүние нығметтері болып көрінсе де, ақыретке жәрдемші болуы тұрғысынан шынайы нығметтер. Сол үшін Алла Расулы (с.а.с.): «Дені сау күйде таң атырған, мал-мүлкі және намысы амандықта болған және күндік нәпақасы болған адам бүкіл нығметімен дүниеге ие болған секілді», – деді.

«Ихия улумиддин» кітабы. Авторы: Имам Ғазали. Тапсырыс беру үшін: 8-777-572-22-33

Адам бақытты кезінде қасында ылғи адам болады

Дәл қазір бақытты сәттеріңізді еске түсіріп көріңізші. Қаласаңыз, көзіңізді жұмыңыз. 10 сәттің 9-ында қасыңызда адам болғанын байқайсыз. Яғни, жалғыз отырып шаттық сезінгеніміз сирек. Адамның өзін қуанышты сезінуі ылғи қоғаммен, өзге жанмен байланысты. Біз бірнәрсе сезінсек, оны бөліскіміз келеді. Қуаныш бөліскен сайын көбейеді. Немересі түкке тұрмайтын бір жарыстан диплом алса, бүкіл чаттарға мақтанып жіберетін әже сіздің үйде де бар шығар?

ӨЗІҢМЕН ЕСЕПТЕСУ

Серіктеспен есептесу – табысы мен зиянын білу үшін капитал мен пайданы зерттеу деген сөз. Егер пайда тапқан болса, оны алып, серіктесіне алғыс айтады. Егер зиян шеккен болса, серіктесін кепіл етеді. Оны алдағы уақытта сол шығынды төлеуге міндеттейді. Міне, құлдың дініндегі капиталы – парыздар. Ал пайдасы – нәпілдер мен ізгіліктер. Зияны – күнәлары. Мұндай сауданың маусымы – күндер. Бұл – жамандыққа шақыратын нәпсімен жасалатын келісім.


Егер нәпсі парыздарды тиісінше орындаған болса, осы әрекеті үшін Аллаға шүкіршілік етіп, нәпсіні солай жасауға шақыру керек.


Егер нәпсі парыздарды орындамаған болса, парыздардың қазасын нәпсіден талап ету керек.


Егер нәпсі оларды кем етіп орындаған болса, олардың орнын нәпілдермен толтыруға нәпсіні мәжбүрлеу керек.


Егер нәпсі қандай да бір күнә жасаса, оны айыптап жазалаумен айналысу керек, нәпсі кемшіліктерінің орнын толтырсын. Дәл бір саудагердің серіктесінен ақшаның есебін сұрайтыны секілді.

"Ихия улумиддин" Имам Ғазали. Кітапқа тапсырыс беру: 8-777-572-22-33

ЖҮРЕГІҢДІ ҚАБІРГЕ АЙНАЛДЫРМА

Қабір – өлген адамдар үшін. Жүрек – тірі адамдардың жан ұясы. Кейбір адамдардың тірі жүрегі өлі рухтарға қабір боп жүргенін көріп, жаным ашиды. Не үшін өмір сүру керектігін білмейді және білгісі келмейді. Жақсылық жасап рухын оятуға шамасы жете тұра, ғапылдықты таңдайды. Ондай адамды қалай тірі дерсің? Сыртқы қалыбы – бұлшықетінің тірі тұрғаны кімге керек?

Адамның нәпсімен күресі басы жербесікке кіргенше толастамайды. Жүректің ішінде екі әскер: біріншісі, тәкаппарлық, мақтансүйгіштік, көрсеқызарлық, қызғаныш, ғапылдық, сараңдық; екіншісі, мейірім, көркем мінез, сабырлық, ақылды тура жолға қолдану, кішіпейілдік, жомарттық – ылғи күреседі. Бірінші әскер рухыңды өлтіруге, екінші әскер тірілтуге ұмтылады. Екеуіне де күш беретін – сенсің. Қай жағына жақтассаң, сол жағы жеңеді. Былайша айтқанда, өзіңді өлтіретін де, тірілтетін де – өзіңсің.

«Жүрек сырлары», «Жүрек тыныштығы» кітаптарына тапсырыс беру үшін: 8-777-572-22-33

Ережеп айына қош келдік!

Ережеп келді дегенше, зу етіп артынан Рамазан айы келді десеңші. Біз өзіміз түсінбейміз, бірақ қасиетті үш айдың қадірі бөлек. Адам деген еңбекақысын бірден алуды қалайтын жаратылыс қой. Ал ораза ұстап, Құран оқып, садақа беріп, намазыңды өтесең, құдайдың разылығына жетіп, жұмағына кіресің десе, оны елестете алмаймыз және қолымызда уыстап ұстай алмаймыз. Сондықтан қадіріне жетпейміз. Біз қадіріне жетпесек те бұл үш ай өте қасиетті. Кім оның мүмкіндіктерін пайдаланса, сол ұтты.

Аспанды жаңа жылға аман жеткен жұрттың отшашулары жарқыратса, жүрегімізде иманның нұрлары жарқырасын. Үш ай бойы рухани жазбалар жариялап отырамыз. Ережеп пен Шағбанды жақсылап өткізіп, асқазанды ауыз бекітуге дайындап, оқитын Құран, зікірлерімізді біртіндеп көбейтіп, Рамазанға амандықта жетейік. Кім екі ай дайындалмаса, онда Рамазаннан алары аз болмақ.

АДАМ ЖАЗУШЫ БОЛЫП ТУЫЛА МА, ЖОҚ УАҚЫТ ӨТЕ КЕЛЕ ҚАЛЫПТАСА МА?

Қабдеш Жұмаділов:
Жазушылық – Алланың берген сыйы. Ақын болып, жазушы болып адам туылады. Алла оған сондай жүрек береді, сондай тіл мен жақ береді, талант пен дарын береді. Оны “Халқыңның мұңын мұңда, жоғын жоқта, сөзін сөйле” деп береді. Ол – біздің мойнымыздағы аманат, борыш. Алланың берген аманатын орындауымыз керек. Ал шеберлігіңді шыңдау дейтін уақыт өте болатын нәрсе.

Оқымай, дәнеңе етпей, жазу жаза алмайсың ғой. Ештеңе оқымай өлеңдете беруге болар, бірақ әлемдік деңгейдегі роман жазу үшін көп білім керек. Білімсіз ештеңе өрге баспайды. Өзіңнің тұрған орныңды, деңгейіңді, алдыңда кімдер бар, артыңда кімдер тұр бәрін білуің керек.

Жазушы Қабдеш Жұмаділовтың «Соңғы көш», «Қаздар қайтып барады», «Дарабоз», «Тағдыр», «Көкейкесті» романдары бар. Тапсырыс беру: 8-777-572-22-33

ӘРКІМ СЕЗІНЕ АЛАТЫН БАҚЫТ

Бақыт үлкен жетістіктерде емес, күнделікті өмірдегі қарапайым нәрселерде жасырынып жатады.

Бірінші, күнделікті алғыс айтып жүру, әдет қалыптастыру
Алғыс айтқан кезде қолымызда бар нәрселерге мән бере бастаймыз. Бұрын қалай байқамағанмын деп таңғаласыз. Жұртта жоқ, сізде ғана бар нығметтерді көресіз. Тіпті оңай болу үшін күніне үш нәрсеге алғыс жазсаңыз болады. «Бүгін анаммен сөйлескенім үшін құдайға шүкір». Мұндай жазбадан денеңізде позитивті энергия туады.

Екінші, жақсы адамдармен шынайы араласу.
Шынайы дегеніміз – сол адаммен бетпе-бет жүздесіп әңгімелесу. Ол кезде телефонды шетке ысырып тастау. Өмірлік маңызы бар тақырыптарды талқылау. Жақсының күйі саған да жұғады.

Үшінші, табиғатпен етене араласу
Мұны ешкім түсіндіре алмайды, бірақ адамның жаны табиғатты аңсап тұрады. Аппақ қар, саябақ, тау, аспан, бұлт, ағаштар, бұлақтар, өзен, дала – бәрі тыныштық сыйлайды. Жаяу серуендеудің өзі не тұрады!

Төртінші, жаныңды жадырататын іспен айналысу
Бақытты болу үшін жетістіктердің үлкен немесе кіші болуы маңызды емес, бастысы – процесс. Қай істі жақсы көресіз, соған жарты сағаттай уақыт арнап көріңізші. Хобби кезінде адам өзін ұмытып кетеді.

Бесінші, ылғи қозғалыс үстінде болу
Жеңіл жаттығу істеу, жаяу жүру, таза ауа жұту, денені шынықтыру – ұсақ істер, бірақ бақыт сыйлатын істер. Біз білсек те істемейміз ғой. Бірақ спортпен айналыспаған дене көп ұзамай хабар береді.

Кітаптарға тапсырыс беру: 8-777-572-22-33

ӨМІРДІҢ МӘНІ ӘРКІМДЕ ӘРТҮРЛІ

Күніне бос болатын 3-4 сағатыңды қандай іске арнасаң, өміріңнің мәні сол боп тұр немесе өміріңде мән жоқ деген сөз. Қысқа видеолар көрумен уақыт өткізсең, кино көре берсең, бос уақытыңда не істейтініңді білмей, амалсыз смартфоныңды қолға алсаң, ондай өмірде қандай мән бар?

Рас, кейде өмірде сондай кезеңдер боп тұрады. Бірақ ол ұзаққа созылмай, адам қайтадан өзін-өзі қолға алады. Бірде көтерілесің, бірде төмен құлдилайсың. Бастысы, үйіңе қайтатын, яғни Раббыңа апаратын жолға түсіп отырсаң болғаны.

Бұл күй неден туындайды? Өзіңе есеп бермеуден. Не істеп жүргеніңе анализ жасамаудан. Кітап оқымаудан. Өйткені қалай кітап оқып бастайсың, солай ойлануды бастайсың. Адам ойлаудан шаршайды. Ойламау үшін ойынға бас қояды. Сонда да ойсыз өмір сүру дұрыс жол емес. Мағжан ақын айтпақшы: Бұл өмір абақты ғой саналыға.

Кітаптарға тапсырыс беру: 8-777-572-22-33

ЗИЯНДЫ СУ

Су кеменің сыртында болса ғана пайдалы. Ішіне кірсе құртады. Дүние де сондай. Ол – мақсатқа жеткізетін құрал. Мақсатқа айналмауы керек. Дүние табу мақсатқа айналғанда ішіне су кірген кеме құсап батасыз да кетесіз. Қайда батасыз? Надандықтың, тәкаппарлықтың, ғапылдықтың, арсыздықтың ұйығына.

Дүниені білім алуға, халыққа пайдасын тигізер ғимараттар салуға, елдің көзін ашатын оқу орталықтарын салуға, жастарды білім алуға ұмтылдыратын жобалар (подкаст, жарыс) ұйымдастыруға, саяхаттап ел мен жер тануға, технология үйренуге, техника құрастыруға, өнер туындысын ойлап табуға жұмсау үшін табу керек.

Басқаша айтсақ, білім деп шашыл, білімге шаш.

Дүние туралы «Ихия улумиддин» кітабында арнайы бір бөлім берілген. Қай кезде дүние адастырып жатыр, қай кезде дұрыс жолға жұмсалып жатыр, қай бөлігі адал, қай кезде арам болады, бәрі түгел жазылған.

Кітаптарға тапсырыс беру үшін: 8-777-572-22-33

ДӘЛ ҚАЗІР ҚҰРАН ОҚЫМАУҒА СЫЛТАУ ҚАЛМАДЫ

Жұмақта Құранды түгел немесе бір бөлігін жатқа білген (әрі оны әрдайым оқып, үкімдерімен амал еткен) адамға: Құран оқып, шарықтай түс. Дүниеде оны қалай нақышына келтіріп мәнерлеп оқысаң, бұл жерде де дәл солай мәнерлеп оқы. Расында, сенің пейіштегі дәрежең өзің жатқа оқитын соңғы аяттың тұсында болады деп айтылады».

Бір хадисте Құран аяттарының саны қанша болса, жұмақтағы дәрежелердің де соншалықты екендігі және Құранды жатқа білген (әрі оны әрдайым оқып, үкімдерімен амал еткен) адамдардың дәрежесінің өзге жұмақтықтарға қарағанда жоғары болатыны айтылған.

Қызық қой, адам деген неткен ұмытшақ, тәкаппар жаратылыс! Біз үйге шкаф алсақ, инструкциясына қарамай, өзімізге құрмақ боламыз. Амалымыз біткенде барып нұсқаулығын қараймыз. Алла құдай біздің өмір сүру нұсқаулығымыз – Құранды ылғи оқытқызу үшін қаншама мотивация беруде. Оны оқыған сайын сауап әрі оқыған сайын осы дүниеде қалай өмір сүру керектігін есімізге түсіріп отырамыз. Оны оқу сауап болмағанда, ешбіріміз оқымай кетер ме едік. Сөйтіп қалай өмір сүруді білмей, адасып, шұңқырға түсіп кетер едік.

Құран оқығанда аузыңнан, тіліңнен, көмейден түрлі толқындар, дыбыстар тарайды. Ол өзіңе және соны тыңдап отырғандарға шипа. Небары 600 беттік кітап 14 ғасырдан бері ойлануға азық боп келеді. Әр ғасырда жаңа қырынан ашылады. Құран – ойлану үшін, амалға асыру үшін. Бет сипап, «сауабы тие берсін» деп тұрып кету үшін емес.

Дәл қазір Құран оқымауға сылтау қалмады. Себебі KITAPAL дүкенінде Құранның барлық түрі бар. Қазақша аудармасымен, орысша аудармасымен, қазақша/орысша/арабша аудиосымен, қазақша оқылуымен (транскрипция), сөзбе-сөз аудармамен, тек қазақша (арабшасы жоқ, яғни дәрет алуға мүмкіндік болмаса, оқуға болады) Құрандар да бар.

Тапсырыс беру: 8-777-572-22-33

АЛДАМШЫ ҚАРЛЫҒАШ

Осы посттардың себебінен бір адам кітап оқуды бастаса, онда мақсатымыздың орындалғаны. Біз ылғи пайдалы кітаптар ұсынамыз. Кітапал дүкеніне келетін кітаптарды сұрыптаймыз. Олардың ішінде ұятсыз, психологиялық тұрғыда зиянды, діни бағытымызға сай келмейтін, адамның мінезін бұзатын, ЛГБТ насихаттайтын кітаптарды кіргізбейміз. Өйткені біздің себебімізден біреудің тура жолдан адасып кеткенін қаламаймыз.

Бірақ кейде сондай кітаптар дүкен сөресінен орын табады. Жыл басында Ресейден кітап алғанымызда сыртында қарлығаштың суреті бар, көл бетінде қайықпен кетіп бара жатқан екі оқушы баланың бейнесі бар кітап келді. Әу баста оны аннотациясына қарап, балалар әдебиеті деп тапсырыс бергенбіз. Сөйтсек ЛГБТ туралы екен. Дереу жойып жібердік.

Кітапты дұрыс таңдай білу керек. Мазмұнын ашып, бір-екі тақырыпты оқып көріп, жұрттардың пікірлерін тыңдап, сапасына мән беру керек. Кітап таңдаудың арнайы критерийлері бар. «Жылдам оқы» кітабының алғашқы бөлімінде толығырақ жазылған.

Біз күресе білуіміз қажет. Елімізге, отбасымызға зиянды кітаптарды кіргізбеуге күш салуымыз керек.

Дәл қазір пайдалы кітаптарға ЖЕҢІЛДІКПЕН тапсырыс бер. 8-777-572-22-33

АЙСБЕРГ

Қазақша «мұзтау» дейді. Антарктикада 2021 жылы ұзындығы 170 км, ені 25 км.-лік мұзтау бөлініп шығады. Су бетіндегі биіктігі 40 метр, ал су астындағы биіктігі 400 метр. Елестету үшін Алматы мен Талдықорғанның арасы – 180 км. Сондай аралықты алып жатқан алып мұзтауды ойлап көріңіз.

Айсбергтің ерекшелігі сол – негізгі бөлігі су астында жатады. Бұл бізге көп нәрсені үйретеді. Біз әлеуметтік желіде шалқып өмір сүріп жүрген адамдарды көріп, өзімізді салыстырамыз. «Менің жүрісім мынау, айлықтан айлыққа зорға жеткізіп. Жұрттар жаңа үй алып, жаңа көлік мініп жатыр; Дубайда қыдырып, қымбат ресторанда тамақтанып жүр...» Асылында олардың қиналыстарын, жүріп өткен жолын, еңбегін білмейміз. Оның астарында ұйқысын құрбан етіп, тіл үйрену; жұрт ойнап жүргенде уақытын қадірлеп, пайдалы кітап оқу; ұялшақтығын жеңіп, түрлі мамандық иелерімен қарым-қатынас құру; ерік-жігерін арттыру үшін спортпен айналысу, т.б. жолдар жатыр.

Жазушының жазған кітабын көріп, қандай мықты деп ойлаймыз. Бірақ оның жазушылық шеберлігін шыңдау үшін қаншама кітап оқығанын, күн сайын 5000 символдан тұратын мақалалар жазғанын, бір жазғанын жүз рет өшіріп, қайта жазғанын қаперімізге алмаймыз. Біз тек мұзтаудың шыңын ғана көреміз.

Біреумен өзіңді салыстырғың кеп жатса, мұзтау туралы ойлан. Сен оның шыңын ғана, бетін ғана көресің. Астында не жатқанын білмейсің. Сол үшін адамдар жайлы тек жақсы ойла. Көркем мінезбен сөйлес.

Тұлғалық даму кітаптарына тапсырыс беру: 8-777-572-22-33

АДАМ САЯХАТТАСА, ҚАЛАЙ ӨЗГЕРЕДІ?

Саяхат та бір ертегі сияқты: үйретеді, қуантады, емдейді. Тек демалыс емес, өмір мектебі деуге болады. Әлемнің әр бұрышында ел мен жердің өз құпиялары мен сабақтары бар. Саяхаттағанда стресс те пайда болады. Жаңа жер, бейтаныс адамдар, бұрын дәмін көрмеген тағамдар. Ауырып қалуың да мүмкін. Адам үйреншікті ұясынан алыстап кеткенде, құстай қанатын жайып ұшады.

Бір жағынан батылдық та пайда болады. Басқа халықтардың қалай өмір сүретінін, қандай ән айтатынын, не жейтінін көресің. Ауылдан ұзап көрмеген қара басың әлемнің кең екенін, ал біз оның кішкентай ғана бөлшегі екенімізді түсінесің. Ұсақ нәрселерге қуанып үйренесің, қиындықтарға төтеп бересің. Ең бастысы, "Барлығын істей аламын!" деп еркіндік сезіне бастайсың.

Адамды саяхат кезінде не өзгертеді?

Адам африкаға барсаң да - адам. Бәрі мейірімге мұқтаж. Күлімдеп отырып, олардың әңгімелерін тыңдайсың. Адамның діні, тілі, ділі, мәдениеті әртүрлі болған сайын қызық. Табиғи әсем жерлер, халықтың құлшылық орындары, тарихи сарайлар, дәстүрлері, тағамдары - бәрі сен үшін таңсық. Таңсық көп болған сайын өз өміріңе басқаша қарай бастайсың. Бірдеңені өзгерту керектігін ұғынасың. Адам осылай өзгере бастайды.

Қаншалықты жиі саяхаттау керек?

Бәрі мүмкіндігіңе байланысты ғой. Ең бастысы, үйден кейде шығып тұру. Жылына бір рет болсын немесе бірнеше ай сайын қысқа сапарларға бару жақсы. Алматыда тұрып, тауға бармағандарға таңғаламын. Шымбұлаққа барып шаңғы тебу, Медеуге барып коньки тебу, Көкжайлауға шығу, Көлсай мен Қайыңдыға барып, қайыққа міну, Шарынды жаяу аралау - көп қой мүмкіндік. Қазақстанның әр өңірі осындай әдемі жерлерге толы. Ең бастысы — қозғал, орнында тұрма. Өмір деген өзен сияқты — ағып тұруың керек!

Қайда саяхаттау керек?

Демалыс үшін, мәдениетпен танысу үшін, шытырман оқиғаларға куә болу үшін, өз туған еліңді зерттеу үшін. Мысалы, Норвегияға Солтүстік Шұғыласын көру үшін баруға болады. Ол күн сайын көріне бермейді. Аңду керек.

Саяхат өмірді қанық етеді. Әр жаңа сапар - ертегінің жаңа беттері іспеттес. Адам өлерінің алдында көп саяхаттамағаны үшін өкінеді дейді ғой. Сондықтан арманда, жоспарла және жолға шық!

2025 жылғы жоспарыңа саяхатты енгіз.

НЕГЕ ҚЫЗ ЖІБЕК ФИЛЬМІН ҚАЙТАЛАП КӨРЕ БЕРЕМІЗ?

Кім «Көшпенділер» фильмін екі рет көрді? Ондай адамды кездестірмеппін. Неге? Өйткені қызық емес, тартпайды.

Онда неге «Қыз Жібек», «Менің атым Қожа», «Алты жасар Алпамыс» фильмдерін жалықпай көре береміз?

Әркімнің ойы әртүрлі болуы мүмкін. Бірақ мынадай ақиқаттар бар. Қыз Жібекте ешқандай жасанды бұйым болмаған. Әр киім қолдан тігіліп, ондағы әр моншақ асыл тастан жасалған. Киіз үйлер, текемет, сырмақтар, ат әбзелдері, ердің қарулары түгел оригинал.

Байқайсыз ба, хандық дәуірдегі қазақтар туралы киноларда ылғи үстіне шүберек, ескі матадан тігілген бірдеңе киіп алады. Көргің келмейді. Осыншалықты бейшара болды деуге қимайсың себебі. Өйткені сонау сақ заманындағы Алтын адамның киіміне қара, қандай әдемі, сәнді. Ал Қыз Жібекте дәл сондай әдемі киімдер берілген. Тек Қыз Жібектің өзі жиырмаға жуық қайталанбайтын көйлек киген.

Оның қасындағы құрбылары – Жібектің рөлін сомдауға келген 500 қыздың ішінен іріктелген 15 қыз. Көрдіңіз бе? Қазіргі беті жылтыраған әнші, блогерлерді әртіс қып түсіре салу емес. Үлкен жауапкершілікпен келген. Режиссері Сұлтанахмет Қожықов.

Ең бастысы – мұнда халықтың ұлттық генінде жатқан жасырын нәрселерді бере білген. Мысалы, қазіргі киноларда қыз ашықтан ашық «ойбай, сені сағындым, сарғайып өлуге айналдым» деп көзінен сорасы ағып жатады. Ал Жібек Төлегенді сағынғанда не істейді? Киіз үйдің босағасына сүйеніп, алысқа қарайды, ауыр күрсінеді. Үй қабырғасына сүйену – сағыну, зарығуды білдіретін қазақ халқының ишарасы. «Толик, сені сағынып еңірегенде етегім жасқа толды» демейді. Олай деу арлы қызға жараспайды.

Міне, сол үшін Қыз Жібек фильмін қырық рет көрсек те жалықпаймыз.

Ғашықтықты ту еткен қызықты кітаптар оқығыңыз келсе, онда тапсырыс беріңіз: 8-777-572-22-33

ӘДЕТ СЕНІҢ БАҚЫТТЫ СӘТІҢЕ ҚАРАМАЙДЫ

Қайғыдан қан жұтқан сәтіңде де жаман әдетің жоқ боп кетпейді. Триггер болса болды, ол оянады. Сондықтан өміріңді құртқың келмесе, оны бұзатын әдеттерді өзгерт. Өзіңді құтқарғың келсе, әр күніңді жақсы жаққа өзгертетін әдеттерді сіңіріп ал.

Қайталап айтамын, әдеттер адамның қуанышты не қайғылы сәтіне тәуелді емес, автоматты түрде іске қосылады. Қатты қуанып тұрып, біреудің оттығын көрсеңіз, бірден темекі шегуге қалау оянады. Қайғырып тұрып, біреудің телефон ұстағанын көрсеңіз, әлеметтік желіге аңсарыңыз ауады.

Жақсы жұмыс жасап, біраз табысқа жетсеңіз, стресске түскенде, әдеттегідей шылымға қол созасыз. Ал егер стресске түскен сайын шылым емес, медитация жасау, дұға оқуды әдетке айналдырсаңыз, қуаныш пен қайғыда бірден соған ұмтыласыз.

Есіңізде болсын, сіздің бүгінгі әрекеттеріңіз ертеңгі болашағыңызды қалыптастырады. Жақсы әдеттер өміріңізді жарқын етеді. Мұны мен айтып тұрған жоқпын. Біздің алдыңғы бабаларымыз айтты. Қазір де білгіштер, ғалымдар айтып жатыр. Болашақта да айта береді. Маңызды болғаны үшін.

Әдет туралы кітаптар:
- Атом әдеттер
- Әдет күші
Тапсырыс: 8-777-572-22-33

БІР КІТАПТЫ ЕКІ РЕТ ОҚУ, ЕКІ КІТАПТЫ БІР РЕТ ОҚУДАН ПАЙДАЛЫ

Оқыған кітабыңды бір айдан кейін сұраса, ұмытып қаласың ғой. Басты бір-екі жерлері есіңде қалған, ал жалпы ауыз тұшытып ештеңе айта алмайсың. Неге? Өйткені атүсті оқығаннан, ойымыз кітапта емес, телефонда болғаннан. Конспект жасамағаннан.

Енді не істейміз? Кітапты екі рет, үш рет оқу керек. Оған қиналма. Бабаң Әбу Насырдыкін естісең, шалқаңнан түсерсің. әл-Фараби Аристотельдің Жан туралы кітабын 100 рет, ал Риторикасын 200 рет оқып шыққан. Ал сен екі рет оқуға ерініп жылайсың.

Оның пайдалары көп.
- Есіңде кітап жақсы сақталады
- Біріншіде жалпылама идеясын түсінсең, екіншіде толыққанды түсінесің.
- Алғаш оқығанда оқиға сюжетінен ләззат алсаң, екіншіде әр кейіпкердің психологиясын, мінезін түсінесің.
- Әр оқығанда кітап жаңа қырынан ашылады. Мысалы, Абай жолын оқып көрші қайтадан. Кейбір оқиғаларды «мынау шынымен болып па еді?» деп таңғалып отырасың.
- «Жасампаз жандардың жеті дағдысын» студент кезде оқу бір бөлек, үлкейгенде немесе кәсіппен айналысқанда оқу бір бөлек.
- Дейл Карнегидің «Дос табу...» кітабын екі рет оқысаң, ендігіде әдетке айналдыра бастайсың.
Солай. Бір кітапты көп рет оқы. Пайдалы болсын.

Кітапқа тапсырыс беру: 8-777-572-22-33
Немесе @kitapal_bot арқылы осы телеграмнан тапсырыс бер.

ӨМІРДІҢ МӘНІ НЕДЕ? НЕГЕ ҚИЫНДЫҚ КЕЛЕ БЕРЕДІ?

Бұл сұраққа екі-үш ауыз сөзбен жауап беру қиянат болады. Ашып түсіндірсе, пайдалы болады.

Өмірдің мәні мынадай деп, әдемі сөздер айтқанмен, ешкім сол формуламен өмір сүрмейді. Өмірдің мәні отбасы, бала-шаға, бақытты сәттер, сыйластық деуі мүмкін, бірақ оның бәрі негізгі жауап емес. Оның бәрі өмірдің мәнін тапқан адамның бастан кешетін салдары (побочный эффект) ғана. Құранда «...адамды құлшылық үшін жараттым...; ...кім жақсы амал істейді екен деп өмір мен өлімді жараттым...» деп Зарият пен Мүлік сүресінде келеді. Бірақ оны терең түсіне алмаймыз. Себебі өмірдің мәні – құлшылық десек, қатырып құлшылық істемейміз. Жақсы амал істеу – өмірдің мәні десек, қаншалықты жақсы амал істеп жүрміз? Онда өмірдің мәні неде?

Мен үшін өмірдің мәні мынау: Адам баласы – Алланың Жерге жіберген өкілі. Жерде өмір сүріп, Оның жазып кеткен үш кітабын танысын (әлем, Құран, адам), сол арқылы Мені (Алланы) танысын дейді. Әлем мен адамның күрделі әрі мінсіз жаратылыс екенін көріп, оған қоса Құранды оқып, Алланы танимыз, таңғаламыз, мойындаймыз. Оны танығанда әрбір әрекетіміз құлшылыққа айналады. Тамақ жеудегі, ұйықтаудағы, спортпен айналысқандағы, т.б. ниетің – ғибадат пен жақсы амал жасауға күш жинау – құлшылыққа айналады. Бұған дейін бес уақыт намазды ғана құлшылық десең, енді 24 сағатың құлшылыққа айналады. Тіпті некелі әйеліңмен қосылуың да құлшылық боп кетеді.

Бір жерде өзеннің көпірі құлап, адамдар арғы бетке қатынай алмаса, онда Алла Тағала құдіретімен көпірді жоқтан жасап, тұрғыза салмайды. Оны Ұлы Рахманның өкілі адам баласы жасайды. Адам сол көпірді тұрғызуға ниет етсе болды, Алла Тағала қалғанын жеңіл етіп қояды. Құрылыс материалы да, құрылысшылар да, техника да, қажетті адам да табыла кетеді. Міне, сонда Ұлы Рахимның «Бол!» деген әмірі жүзеге асып, көпір сәтімен қаланады. Бұл көпір – соған ниет еткен адамның құлшылығына айналды. Енді үстінен адам өткен сайын, соңынан үзілмей сауабы да барып тұрады. Әр амал осындай.

Ал енді сұрақ: онда неге басымызға қиындық келеді? Оның екі мақсаты бар: біріншісі, адамды тазалау үшін. Біздің қаншама күнәміз бар. Оны өзіміз дұрыстап тазаламаймыз. Тәубеміз өтірік. Тәубеміздің өзіне тәубе ету керек. Сосын, амал жоқ, қиындықтар келіп соны тазалайды. Екіншісі, адамды тәрбиелеу үшін. Алла Раббы адамды ең көркем түрде тәрбиелейді. Мысалы, бойыңда тізгінделмеген ашу болса, соны көрсету үшін, ашуланатын ситуацияға түсіре береді. Қашан ашуыңды тізгіндеп, ақылға жеңдіруге үйренгенде, ондай ситуация да тоқтайды.

Мақтаншақсың ба, онда мақтанған сәтте бір мейірім шапалағын салып жібереді. Мысалы, түп-түзу жерде келе жатып, шалқаңнан тайып құлайсың. Қашан оны түсінгеніңше, сабақ алғаныңша, мақтануды доғарғаныңша, құлай бересің, жығыла бересің, таяқ жей бересің.

Бұл тақырыпты тереңірек түсіну үшін жақсы кітаптар оқу керек. Мысалы, Имам Ғазалидің "Жүрек сырлары" кітабы. Тапсырыс беру үшін: 8-777-572-22-33