ArshatGo

Қаңтардан бастап ағылшын және спорт дегендердің ниеті келесі жылға ауысуына 1 күн қалды

Жаңа жыл тойламауды жария қылу рия болып санала ма?

Жалпы жария сөзінің түбірі де рия емес пе?

Намаз оқитын достарым бар. Сырттай қарасаң намаз оқитынын білмейсің де. Іштерінде ұстайды. Ораза ұстамасам да ауызашарға шақырады, мен де шақырамын оларды құрметпен. Ешқашан әңгімеге дін тықпаламайды. Нағыз мұсылмандық сол шығар?

Ал біреулер болады, дін ұстанатындарын жария қылып жүреді. Рия, ширк, құл қақы дегендерді білмейтін сияқты...

Жаңа жылда тіліме алғаш жабысқан ән:

Чу-ча ча-ча-ча 😂

Жүз жылдық жалғыздық сериалын бастадым.
1-бөлімнен-ақ сапалы шыққаны көрініп тұр. Кітаптың атмосферасы сезіледі. Шығарманың фанаттарына ұнайды деп ойлаймын

Есеп шығарайық:

(1 + 2 + 3 + 4 + 5 + 6 + 7 + 8 + 9)² = ?

1³+ 2³+ 3³+ 4³+ 5³+ 6³+ 7³+ 8³+ 9³ = ?

(20 + 25)² = ?

Жауабы: 2025

Ұялы байланыс базалық стансалары радиация тарата ма?

Ұялы байланыс базалық стансалары электромагниттік сәулелер (ЭМТ) таратады, бірақ олар радиацияға жатпайды. Электромагниттік сәулелену радио толқындардан тұрады және бұл иондаушы сәулелену емес. Басқаша айтқанда, ол атомдарды иондай алмайды және радиоактивтілік туғызбайды.

Электромагниттік сәулеленудің қауіпсіздігі:

1. Шекті деңгей: Базалық стансалардың сәулеленуі халықаралық стандарттарға сәйкес қатаң бақыланады. Дүниежүзілік денсаулық сақтау ұйымы (ДДСҰ) және ICNIRP (International Commission on Non-Ionizing Radiation Protection) стандарттарына сай шекті деңгейлері адамдарға зиянсыз деп саналады.

2. Қашықтық: Стансаға жақындаған сайын электромагниттік толқындардың қарқындылығы төмендейді. Қалыпты жағдайда бұл сәулелену тұрғын үйлердің ішіне қауіпсіз деңгейде ғана жетеді.

Қорытынды:
Ұялы байланыс базалық стансаларының сәулеленуі күнделікті өмірдегі радио толқындардың басқа түрлерімен салыстырғанда зиянсыз деп есептеледі. Егер станса техникалық стандарттарға сай орнатылса және шекті нормаларды сақтаса, денсаулыққа қауіптілігі жоқ.

32 адамның тірі қалғаны пилоттардың ерлігі деп ойлаймын. Нәтиженің қандай болатынын алдын ала түсініп, ұшақтағы жанармайды барынша тауысып, қаланың үстін сол үшін бірнеше рет айналған сияқты. Әйтпесе түскен кезде өрт одан сайын үлкен болып, көп адам тірі қалмас еді. Зиян тигізбеу үшін бос алаң таңдаған да шығар?..
Мұның бәрін кейін білерміз. Қара жәшіктен ұшқыштардың соңғы сөздері жарияланатын болса

Ұшақ апаты туралы бір түрік пилоттың жазғанын оқыдым.

"Өте қайғылы апат.

Аймақта тұрақты түрде ұшып жүрген және аймақты жақсы білетін ұшқыш ретінде, Каспий теңізі маңындағы қонуға ең қолайлы әуежайлардың бірі — Ақтау.

Әдеттегідей пікірлерде, ұшақты жерге ұрған ұшқыш деп кінәлағандар да, ұшақ моделін кінәлағандар да, 11 жылдық ұшақты ескі деп атағандар да бар…

Алғашқы мәліметтер бойынша, ұшақ әуелі ауа райы жағдайына байланысты бағытын өзгертеді, кейін круиз биіктігінде (ұшу биіктігі) «Mayday» сигналы беріледі. Білмейтіндер үшін, транспондерге 7700 кодын орнату – бұл төтенше жағдайды жариялау.

Одан кейін ұшақ «дельфин қозғалысы» (жоғары-төмен тербеліс) жасайды. Ұшақтың құлау видеоларында бұл қозғалысты анық көруге болады.

Embraer 190 типті ұшақ менің қолданған ұшағым емес, бірақ білетінімдей, бұл — fly-by-wire жүйесіндегі ұшақ. Яғни, басқару жүйесі сіздің берген командаңызды электронды түрде қанаттар мен құйрық бөлігіндегі беттерге жеткізіп, қозғалысқа әкеледі. Мысалы, Airbus 320 сериясы да осындай ұшақ. Ал Boeing 737 сериясы механикалық кабельдер арқылы қолмен басқарылады. Ал басқа дерлік ұшақтар электрондық жүйелерге тәуелді.

Мүмкін, дәл осы жүйеде ақау болған сияқты. Электрондық ақау орын алып, ұшқыштар басқаруды толықтай өз қолдарына ала алмаған сияқты. Ұшқыштардың соңғы сәтке дейін күрескені — өте өкінішті.

Адам факторының минималды рөлі бар, техникалық ақаудың кесірінен құлаған ұшақ секілді көрінеді.

Қайтыс болғандарға Алла рақым етсін. Бұл шынымен де ауыр апат…

Айта кететін тағы бір жайт, ұшақтың құйрық бөлігі әрдайым ең қауіпсіз, бірақ ең ыңғайсыз орын болып табылады. Бұл апаттың қирандыларында да осыны қайта көруге болады."

1998 жылы экстремал ұшаққа мінгенім бар ед. Сол есіме түсіп кетті.
1-курстан кейін елге қайтарда Стамбулдан Ақтөбеге тікелей ұшақ табыла кеткені. Соған билет алып, уақытында әуежайға келдім. Сөйтсем чартер ұшақ 15 сағатқа кешікті. Менде тек бір бөтелке судан басқа тамақ жоқ, ақша да жоқ. Амал жоқ күттім.
Содан ұшаққа да міндік түнде. Ұшақта тек алдыңғы 3-4 қатарда ғана орындықтар бар, қалғаны бос жерлер. Зат, сөмке қоюға арналған екен. Сөйтіп біз бірнеше адам жерге отырдық. Кәдімгідей ұшақ еденіне, арқамызды сөмкелерге тіреп. Ешқандай қауіпсіздік белдігі немесе шаралары жоқ. Жолаушылардың барлығы әйелдер, тек жалғыз бір жігіт болды. Затқа келіп жүрген коммерсанттар екен.
Содан олар ұшақта тамақ іше бастады. Мен қызығып отырмын. Кәдімгідей пойызға тамақ алып шыққандай бәрі өздерімен ала келген. Менің коммерсант емес, студент екенімді түсініп, тамақтарын бере бастады. Бір кезде тамақ ішіп болғаннан кейін жаңағы жалғыз жігіт қасыма отырып, сыра ішті, маған да берді. "Темекі тартасың ба?" деп сұрады, "Бола ма?" десем, "Әрине болады" деп өзі бастап шеге бастады. Сөйтіп жерде отырып, ішіп-шегіп келдік.
Қазір айтсам адам сенбейтін болар? Бірақ 90-жылдары норм нәрсе еді 🙂

Nissan кезінде өзінің атымен доменді ала алмап еді бір еврейден. Ол ағай коронадан қайтты ақыры, өлгеннен кейін де доменді балалары бермепті. Оқиға былай болған:

Америкалық Узи Ниссан деген кісінің шағын фирмасы бар екен, компьютер сату, интернет жұмыстары сияқты шағын нәрселермен айналысатын. 1994 жылы nissan.com доменін алып, өздеріне сайт істеп алған. Кезінде Datsun деп аталып, кейін банкрот болып, жаңадан Nissan деп құрылған ірі автоконцерн бұл фирмамен 13 жыл соттасыпты. Домен атын алу үшін. Ана кісінің фамилиясы да Ниссан, фирмасының аты да Ниссан. Әлбетте АҚШ соты домен иесін дұрыс деп санайды. Бірақ соттаспастан бұрын Узи ағай Ниссаннан 15 млн сұраған екен. Содан кейін автокөлікшілер мұндай ақша бергісі келмей, керісінше сотқа берген.