Балаларға арналған тақпақтар


Kanal geosi va tili: Qozog‘iston, Qozoqcha



Kanal geosi va tili
Qozog‘iston, Qozoqcha
Statistika
Postlar filtri


Ана тілі
Ақыл-ойын дананың.
Ана тілден аламын.
Ана тілім ардақты,
Ақ сүтіндей ананың.

Өсірген ой, білімді,
Сүйем туған тілімді.
Мақсат етем әр сөздің,
Мәнін терең білуді.

©️Әдібай ТАБЫЛДЫ


МЕНІҢ ОТАНЫМ

Ғасырлардан жаңғырған,
Бабаларым қалдырған.
Ат тұяғын тоздырған,
Құс қанатын талдырған –
Ұлан-байтақ далам бар!
Сол далаға жан енді,
Салтанатты, мәнерлі.
Зәулім-зәулім сәнді үйлер,
Тамсандырған әлемді –
Сәулеті асқан қалам бар!
Шалқып жатыр шалқары,
Байлығы да бар тағы.
Төсі толған түлікке,
Дәнге толған алқабы –
Ырыс қонған жерім бар!
Қазыналы қарты бар,
Дәстүрі мен салты бар.
Аласармас нарқы бар,
Асқақтаған даңқы бар –
Өркендеген елім бар!

Қуат АДИС


👨‍👧👩‍👧👨‍👩‍👧‍👧
...Осындай қыз кімде бар?
Ешкімде жоқ, бізде бар.
Күлкісіннен Күн күліп –
Жердің жүзі нұрланар!..

Осындай қыз қайда бар,
Жерде жоқ, тек Айда бар.
Ажарынан Айдың да
Көрсе тілі байланар!

Шынар ма екен, тал ма екен,
Шекер ме екен, бал ма екен?
Ал білсеңдер, айтыңдаршы –
Осындай қыз бар ма екен?!

Тұрмағанбет КЕНЖЕБАЕВ


Оқушымын енді мен
👫👭👬🧍‍♂🧍🧍‍♀🏃👨‍👧🎒
Әріп білем, жөн білем,
Оқушымын, енді мен!

Әліппе алдым қолыма,
Түстім білім жолына.

Анамдайын мәпелер,
Ұстазым бар жетелер.

Мектебіммен таныстым,
Достарыммен табыстым.

Жетем биік мақсатқа,
Озат деген жақсы атқа.

Олжас ҚАСЫМ


ҰСТАЗЫМ
Келгенімде алдыңа
Қызыл арай гүл алып,
Жақын тарттың жаныңа,
Шәкіртім деп қуанып.
Сипадың да басымнан,
«Әліппені» ұсындың.
Бақытымның осыдан
Басталғанын түсіндім.

Шона СМАХАНҰЛЫ


Менің туым
🇰🇿🇰🇿🇰🇿
Менің туым-
Көк аспанның қиығы,
Ал көк аспан,
Арманымның биігі.
Шуақ шашқан ортасында алтын күн,
Соған қарап Заңғар көкке талпындым.

©️Алпысбай Әбділұлы


Балабақшада
🧑‍🦲
Күлімдейді күніміз,
Көңілді ән-күйіміз.
Асыр салып жүреміз,
Тәртіп бұзбай жиі біз.
🧑‍🦲
Білеміз біз, сұраңыз,
Жаттап алдық жыр аңыз.
Тәрбиеші апайдың,
Айтқанын тез ұғамыз.
👫
Дайын тақпақ, әніміз,
Би билейміз бәріміз.
Өнерліміз, кішкентай,
Болсақ-тағы әлі біз.

Ернұр Сейдахмет


ЖОЛЫҢ БОЛСЫН

Атам шықса сапарға:
- Жолың болсын! – дейді апам.
Апам шықса сапарға:
- Жолың болсын! – дейді атам.

-Жолың болсын! – дейді олар,
Үлкенге де, кішіге.
- Жолың болсын! – дейді олар,
Ұшырасқан кісіге.

Осы сөзде байқадым,
Қуат барын, күш барын.
 - Жолың болсын! – айтамын,
Алыс жолға шықса кім.

Несіпбек АЙТҰЛЫ


Мұз айдыны
❄️ Қане, бізге еріңдер,
Мұз айдынын көріңдер.
Жұрт мақтаған Медеудің,
Шын бағасын беріңдер.

Балдырған да, кәрі де,
Мәз боп ауа – дәріге.
Жексенбісін өткізер,
Коньки теуіп бәрі де.

Жалқау мұнда жаурайды,
Сергекті ән баурайды.
Мұз айдыны Медеудің,
Шарайнадан аумайды.

Базарбай Исаев


Жүр тиынды көтеріп...

(Үмбетбай Уайдиннің әдеп әліппесінен)

Алтын күннің дөңгелек,
Шуағына жылынып.
Атасы мен Кенжебек,
Келе жатты қыдырып.

Көшелерді шарлап әр,
Аралады бақшаны.
Кенет жерден көрді олар,
Бір теңгелік ақшаны.

Саз балшықпен баттасып,
Жерде жатқан тиынды.
Баласына атасы,
Ала ғой деп бұйырды.

Ал Кенжебек бұл сөзге,
Мүлдем назар салмады.
Бір теңгеге ештеңе,
Келмейді деп алмады...

Ақша мәнін парықтап,
Ұқпады ұлы ұғынып,
Бір тиынды Дәуіт қарт ,
Алды жерден бүгіліп.

Таңғалыспен керемет,
Қызық жан деп бұл қандай,
Атама осы не керек?!
Соны ұл ұқпай тұрғандай...

Танытқандай өрлігін,
Жүзінен нұр тарата.
Айтты сөзін енді ұлын,
Қарт өзіне қарата.

Мәнін терең сен ойла,
Жарамас бұл пайдаңа,
Бір тиынды алайда.
Құны жоқ деп ойлама. 

Берер болсаң онда мән,
Келмес еді шегінгің.
Бұл тиында бар балам,
Елтаңбасы еліңнің.

Әр кезде де міндет деп .
Көтеруден жасқанба.
Көтереді құрметтеп.
Сені де елің аспанға!

О. Қасым


Туған өлкем

Көгінде күн нұрын төккен,
Жерінде гүл жұпар сепкен.
Неткен сұлу, неткен көркем!
Осы менің туған өлкем!
Алтын дәнді даласы бар,
Ақ күмістей қаласы бар.
Неткен сұлу, неткен көркем!
Осы менің туған өлкем!
Түлігі өскен алуан - алуан,
Төс, алқабы малға толған.
Неткен сұлу, неткен көркем!
Осы менің туған өлкем!
Ер еңбегі шалқып, тасқан,
Ел еркіндеп бақыт тапқан.
Неткен сұлу, неткен көркем!
Осы менің туған өлкем!

Өтебай Тұрманжанов


Сараңдық. (Жапон ертегісі)

Жанындағы көршіге
Үй иесі бір сараң.
Балға сұрап келші деп
Қызметшісін жұмсаған
– Шеге қағып алғалы,
Сұрай келдім балғаны.
«Қандай сылтау айтсам» деп
Сараң көрші ойланды.
Уайым ізі бетке енді
Басын қасып депті: «Енді
Қайтейін, ғапу, ет мені,
Інім алып кеткен-ді»
Қызметшісі келгенде:
– Тапқан екен сылтауды,
Майы кетер деген бе?
Деп қожасы бұрқанды.
– Не сұрасаң әрқашан,
Жоқты айтады қайдағы.
Болмас енді алмасам
Өзіміздің балғаны. Мүбәрак Жаманбалинов


Болғайсың, балам

немесе ұлға өсиет

Шарласаң шақырымды,
Қысамын тақымымды.
Өзіңе балам бүгін
Айтамын ақылымды.

Атадан бата алмаған
Тексізді кім қолдаған?
Құдайға құл бол, балам,
Ұлтыңа ұл бол, балам!

Білімнің ашқаны - бақ,
Тарихтың дастаны ұзақ.
Оятар ой-қиялды
Кітапты жастанып жат.

Жалғызға - мың бол, балам,
Жауапқа- тың бол, балам.
Жалғанға - шын бол, балам,
Үлкенге - жым бол, балам.

Кірпішін қашап Елдің,
Ерлігін жасап Ердің,
Ұлыңнан кейін қалып
Әкеден аса бергін.

Жеткізер биіктерге
Тұғырың - Тұран-Далаң.
Отаның - дұғаң, балам,
Кітабың - «Құран», балам!



Мінезді жөндеп көргін,
Керексе тентек болғын.
Ұйқыға көп берілмей,
Күн-түні сергек болғын.



Бабалар елді қорғап
Сан мың қол жасақтаған.
Ұраның - "Қазақ", балам,
Болғайсың азат, балам!

Жаманмен ұрыспағын,
Болмасқа - тырыспағын.
Тектілік - ырыс-бағың,
Бойыңды тік ұстағын.

Сенбе сен ешқашанда
Сөздерге былшылдаған.
Жасыңнан қылшылдаған
Болғайсың шыншыл, балам!

Қазақта - күш бір тума, Ие бол түс-сыртыңа.
Шүбәлі ермей сөзге,
Бірдей бол үш жұртыңа.

Жығатын тек жалғызды
Сенбе тек күшке, балам.
Тұзаққа түспе, балам,
Арақты ішпе, балам.

Қазақтың болды ма екен
Кездері қорланбаған?
Болғайсың Тарлан, балам,
Еліңе - қорған, балам!

Қайтейін көз бергесін,
Тұрпатың өзгермесін
Өзіңе сөз ерсе де,
Әкеңе сөз келмесін.

Анадай шартарап бар,
Ол барда шалқалап қал.
Шешеңді Мекке жаққа
Жеті рет арқалап бар!

Ініге иінағаш бол,
Ағаға - адалбақан,
Өзіңе - қатал,балам
Сөзіңе - адал,балам

Бірегей ойың болса,
Қарама жайтқа, балам.
Айтқаннан қайтпа, балам,
Өтірік айтпа, балам.

Адасып жүрсең егер
Салады жөнге бабаң. Жамандық көрме, балам
Оза бер төрге, балам

Арманды көксеп кел де,
Жете бер көп шептерге.
Өзіңе айтқан сөзді
Жеткізші шөпшектерге. Әміржан ҚОСАНОВ


Анам менің

Анам менің гүл сен,
Жанымда аман жүр сен.
Шаттанасың мама,
Мен қуанып, күлсем.

Анам менің таң сен.
Ең аяулы жан сен.
Қарсы аламын мәз боп,
Үйге күліп келсең.

Анам менің күн сен,
Жақсы көрем біл сен.
Басқалардан мама,
Артықсың ғой бір сен.

Авторы: Олжас Қасым


Бұл кім?

Көрген жанды таң қалдырар,
Үш келiдей –
Салмағы бар…
Бойы –
Үш қарыс,
Шашы –
Селдiр,
Бұл кiм болды,
Ал табыңдар?..
Бойы,
Ойы – өсер кейiн,
Өзi –
Тəттi шекердейiн…
– Бұл кiм болды?
– Бұл –
Əмина,
Құйттай ғана бөпем менiң!..

Авторы: Өтепберген Ақыпбеков


Санамақ
👶👧
Бір дегенім – білік,
Қолыңа жүр іліп.
Білік – шалғы тұтқасы,
Алғаның жөн біліп.
Екі деген – есті,
Ел жайлауға көшті.
Салқын екен жайлау,
Салқын самал есті.
Үш дегенім – үскі,
Ұшып жерге түсті.
Тындыратын істі,
Үскі неткен күшті.
Төрт дегенім – төсек,
От жағамын көсеп.
Төсек жақсы өйткені,
Жайлы орынға есеп.
Бес дегенім – бесік,
Бөбек жатыр өсіп.
Уағында анасы,
Шомылдырар шешіп.
Алты деген – арша,
Арша отын жанса.
Мықтап қазан қайнатар,
Жіктеп отқа салса.
Жеті деген – жебе,
Жебе бұзар кебе.
Жебе, көбе сөзі –
Ертегі сөз көне.
Сегіз деген – сенім,
Болашағың сенің.
Сені азамат болар деп,
Сеніп отыр елің.
Тоғыз деген – торпақ,
Болма өзің қорқақ.
Еңбек етсең жарайды,
Көп ісіне ортақ.
Он дегенде ойлап,
Тапқан сөзім – оймақ.
Жалғастырып, айтыңдар,
Ой түбіне бойлап.

Кәп ҚҰМАРҰЛЫ


Әдепсіз бала

Қас қабағын сәл түйіп,
Бет ауызы жалпиып.
Автобуста Жасұлан,
Отыр міне жалпиып.

Байқамайды маңайды.
Телефонға қарайды.
Қашан жетем үйге деп,
Аялдама санайды.

Ата-әже бол мейлі.
Үлкенге орын бермейді.
Көзін жұмып, басқаны.
Өп өтірік көрмейді.

Жүрмесе де көп әлі,
Шаршағандай болады.
Күнде осылай бұл бала,
Мектебіне барады.

Ұялмайды Жасұлан,
Ұялмайды досынан.
Әдепсіздік дегенің,
Басталады осыдан.

Олжас Қасым


Ұстаз
Заводта болсаң, күнбе-күн
көрінер еді табысың.
Дәрігер болсаң, түрлі емің –
сырқаулы жанның бағы шын.

Ал сенің еңбек жемісің
өзгеше тіпті басқадан:
ол - өзін арнап ел үшін
осынау жүрген жақсы адам.

Жақсы адам – елдің тірегі,
байлығы туған халықтың,
шапағын шашар үнемі
көгінде тұрған жарық күн.

Сан жастың қамын шертесің,
тағдырын ойлап толғанып.
Әр үйдің бір-бір еркесін
үйреттің өзің қолға алып.

Ұстазсыз жанда сөнбек күн,
шәкіртсіз өмір – сусыз жер.
Көрінбес ғажап еңбектің
бейнетін кешіп жүрсіздер.

Жүректе тұрар жалқы үнің,
жанымнан жалын жігер күт.
Ұстазым, сенің әр күнің,
әр сәтің тұрған бір ерлік!

Фариза Оңғарсынова


Ұстаздарым
Ақылмен ой-санаңа нақты ұстайтын,
Жарқырап өмір-бақи тот баспайтын.
Шамшырақ жолындағы – білім болса,
Ұстаз ол – сол білімге жол бастайтын.

Мектепке тұңғыш рет басқан қадам,
Бәйгеге сендердің ол қосқан балаң.
Білімнің басып алғаш баспалдағын,
Танып ап оң мен солын аспандағы.

Бармасаң әр баланы білімге алып,
Болады сол баланың күні кәріп.
Оқысаң көзің сонда ашылады,
Әрдайым білімдіге – дүние жарық.

Ал онсыз айта алмайсың білеп деп те,
Ап барар білімсіздік кереңдікке.
Қарасаң шығады тек білімдіден,
Ақылда да, даналық та, тереңдік те.

Сондықтан данышпан да, ақылды адам,
Ұстаздың ұлылығын мақұлдаған.
Олардың жарқырап бір лаулайтыны,
Сендерден түскен ұшқын лапылдаған.

Біз үшін білім нәрін арнадыңдар,
Қандай бір қиындыққа бармадыңдар.
«Инемен құдық қазған» ұстаздарым,
Күн болып жүректерге орнадыңдар.

Өздерің құт мекенді тұрақ еткен,
Өмірге тұлпар баптап, пырақ еткен.
Сендердей бақытты жан жоқ-ау, сірә,
Шәкірттері жер шарына тарап кеткен!

Адырбек Сопыбеков


Аспаннан жаңбыр төккенде,
Қар суы мұзды сөккенде.
Шатырдан тамшы таусылып,
Есіктің алды кепкенде-

Айтыңдаршы балалар,
Жаз ба, күз бе, көктем бе?

Жақан Смақов

20 ta oxirgi post ko‘rsatilgan.