PARANOIA.KZ

Қырғызстан басшысы Жапаров кеше Астанаға келді. Екі ел басшылары екі күндік кездесуде экономикалық, көлік-логистикалық, мәдени және басқа байланысты арттыру бойынша келіссөздер өткізіп, келісімдер жасасуда.

Қырғызстан қазіргі алапат су тасқынында алғаш болып көмек қолын созған ел. “Көмек сұрамаса да көмектесіміз” деп, гуманитарлық жүк жіберді. Артынша тағы да фуралар келіп жатты. Қазақстан да Қырғызстанға жыл сайын гуманитарлық көмек көрсетумен келеді. Мыңдаған тонна ұн, құрылыс материалдары, оқ-дәрі және басқа беріп келеміз. Яғни екі ел бір-біріне қол ұшын созумен келеді, бұл жақсы үрдіс.

Қазақстанға Қырғызстанмен жақсы байланыс керек, Қырғызстанға Қазақстанмен жақсы байланыс керек.

Қазір елімізде су тасқыны. Бірақ алдағы 2-3 айда жағдай 180 градусқа өзгеруі ықтимал, сөйтіп тасқынды тапшылық басуы мүмкін. Су тапшылығы. Сол үшін қазірден бастап жаздағы жағдайды ойлап, келісімдерді бір қуаттап алу қажет. Өткен жазда Жамбылдың, оңтүстіктің кенезесі кеуіп қалып еді. Бішкек “су мәселесі биыл болмайды” деді. Болмасын. Болдырмау үшін осындай бауырластық форматтағы кездесулер керек. Қазақстан Қырғызстандағы су станцияларын модернизациялау жобаларына қатысып келеді, басты мақсат бізге берілетін суды азайтып алмау.

Ал Қырғызстан үшін шекарада мәселе болмауы қажет. Ол үшін де осындай кездесулер қажет. Қазақстан - Қырғызстанның “экономикалық қақпасы” деген сөз тегін айтылмайды ғой. Қазақстан Қырғызстанның азық-түлік қауіпсіздігінде де маңызды рөл ойнайды. Әсіресе астық бойынша. Су тасқыны астықты өлкемізде болып жатыр ғой, соған да алаңдаушылық танытып отырғаны анық.

Қысқасы қазақ-қырғыз байланысы, достығы арта берсін!

CNN: Израиль Иранның бірнеше аймағындағы радиолокациялық радарлар кешеніне шабуыл жасаған.

Bloomberg: Еуропа елдері Ресей жақын аралықта Украинаның қорғаныс шебін бұзып, алға жылжуы мүмкін деп қауіптенуде. Сол себепті Киевке қару жеткізуді жылдамдатқан.

Су тасқынынан зардап шеккен аймақтарға олигархтар млрдтап ақша жібере бастапты. Желіде сондай ақпарат желдей есіп жатыр. Бұған дейін президент ірі кәсіпкерлер де көмектесуі тиіс деген болатын. Біреу 10 млрд теңге жіберіпті, тағы біреу 1 млрд, 2 млрд теңге дегендей жіберіп жатыр екен. Кей адамдар «бұл қаржыны жіберіп жатқан олигархтардың көбі президент сөзінен кейін қимылдай бастады» деген ойда. Баяғыда «Қазақстан халқына» қоры құрылған сәтте, олигархтар жаппай қаржы аудара бастап еді. Бұл «билікті қолдаймыз, лояльдымыз» деген сипатта бағаланды.

Қалай болса да қаржы жібергендері құптарлық іс. Дей-тұра көбі жеке инициативамен емес, жоғарыдан түскен бейресми нұсқаулықтан кейін ғана қимылдайтын сияқты.

Ақша жіберіп жатқан олигархтар екі түрлі-ау. Бірінші топ апат басталған сәтте, бірден көмек беруді бастап кеткендер. Екінші топ президент сөзінен кейін барып әрекетке көшкендер.

Негізі осындай сәтте, көп олигарх инициативаны өздері бастап жіберсе, халыққа да, билікке де ұнамды болудың бір мүмкіндігіне ие болуы ықтимал. Саяси ұпай да жинап қалар. Бұл тек қана халыққа көмек емес, сонымен қатар өздерінің беделіне жасалған инвестиция ғой.

«Ақша құйыңдар» дегенді күтпестен, өздері бастамашыл болып жатқандарға деген құрмет бөлек.

ПыСы: Ешкімнен нұсқаулық күтпестен, млрдтарды аударып жіберейін деп Каспиімді ашып қалсам, «2 күннен кейін несие төлеңіз» деп қызыл жанып тұр екен. Амалсыз осы бір шимай-шатпақпен шектелуге тура келді)

«Тарих бізді әрекетімізге қарап бағалайды. Дәл қазір әлем үшін шешуші сәт. Мен өзімшілдікке салынып, басқа бір әрекет жасап, шешім қабылдауыма болар еді. Бірақ мен неге сенемін, соны жасаймын. Дәп қазір Украинаға көмек көрсету өте маңызды деген ойдамын. Мен шын мәнінде Си, Путин және Иранды зұлымдық осі санаймын», - дейді Майк Джонсон.

Ол сенбі күні Украина, Тайуань, Израильге көмек пакетін көпшілік қолдайтынына сенім білдірді.

WSJ: Иран Сириядағы әскери кеңесшілері мен жоғары шенді офицерлерін әкетуде. Бұл Израильдің қарсы соққысынан сақтану әрекеті саналады.