«Шыпакер» газетасы

Ҳүрметли медицина хызметкерлери ҳәм тараў нураныйлары!

Халқымыз саламатлығы ҳәм ийгилиги жолында тынбай хызмет етип атырған Сиз әзийз медицина хызметкерлерин кәсиплик байрамыңыз бенен Қарақалпақстан Республикасы Денсаўлықты сақлаў министрлиги атынан шын жүректен қутлықлаймыз.

Өзбекстан Республикасының 2006-жыл 12-сентябрьдеги «Өзбекстан Республикасы медицина хызметкерлери күнин белгилеў ҳаққында»ғы Нызамына муўапық, ноябрь айының екинши екшембиси Өзбекстан Республикасы Медицина хызметкерлери күни деп белгиленди. Рәсмий түрде тастыйықланған кәсиплик байрамымыздың ҳәр жылы салтанатлы түрде белгилениўи қәлбимизди қуўаныш ҳәм мақтаныш сезимлерине толтырады. Себеби, бул ҳүкиметимиздиң ҳәм ел басшымыздың халық саламатлығын сақлаў тараўында хызмет көрсетип атырған ҳәр бир медицина хызметкерлериниң машақатлы ҳәм жуўапкерли мийнетине болған үлкен ғамқорлығының белгиси.

Мәмлекетимизде халықтың саламатлығын ҳәм ылайықлы турмыс кешириўин тәмийинлеў, аналықты ҳәм балалықты қорғаў, халыққа қыстаўлы ҳәм тез жәрдем хызметиниң шөлкемлестирилиўи, қәнигелестирилген орайлардың ашылыўы, аўыллық шыпакерлик пунктлердиң қайта дүзилиўи ҳәм хызмет көрсетиў сапасының жақсыланыўы, медициналық хызметтиң мәмлекетлик емес тараўының жолға қойылыўы, социаллық әҳмийетке ийе кеселликлерди емлеўде қолайлы шараятлар жаратыў, жуқпалы кеселликлерди азайтыў ҳәм оларға қарсы илажларды күшейтиў, халықтың медициналық мәдениятын ҳәм билимин асырыў, физикалық жақтан саламат ҳәм руўхый бәркамал әўладты камал таптырыў, елимизде бәсекилесликке шыдамлы фармацевтика өнимлерин ислеп шығарыўды кеңейтиў, емлеў мәкемелерин жоқары технологиялық медициналық әсбап-үскенелер менен тәмийинлеў ушын барлық зәрүрли шараятлар жаратылды.

Кең көлемли реформалардың турмысқа енгизилиўи нәтийжесинде денсаўлықты сақлаў системасында медициналық хызмет көрсетиўдиң алдыңғы форма ҳәм усыллары қәлиплесип, бул инсан саламатлығын беккемлеў, оның орташа өмир көриўин узайтыў ҳәм турмысының сапасын жақсылаўға қаратылды.

Әсиресе, соңғы ўақытта бул тараў раўажы ушын исленип атырған ислер, инсанлардың бийбаҳа байлығы болған денсаўлығын асыраў жолындағы ҳәрекетлер медицинада әҳмийетли өзгерислер басланғанлығынан дәрек береди. Денсаўлықты сақлаў тараўының жаңа басқышқа көтерилиўине, тараўдың материаллық-техникалық базасының еледе беккемленип, хызмет көрсетиў сапасының жақсыланыўына ерисилди.

Денсаўлықты сақлаў системасын түпкиликли реформалаў бойынша әмелге асырылып атырған кең көлемли жумыслар ҳәм олардың нәтийжелери ҳаққында еле көп айтыў мүмкин.

Жәмийетимиз ушын зәрүр болған усындай әҳмийетли бир тараўды жетилистириў, заман талабына сай илгери адымлаў биз медицина хызметкерлериниң жуўапкершилигинде екен, өзлериңиздиң барлық билимиңизди ҳәм тәжирийбеңизди жумсап, бизлерге билдирилген исеним ҳәм итибарды ақлайтуғыныңызға исенемиз.

Ҳүрметли кәсиплеслер!
Алдымыздағы баслы ўазыйпалардың бири — медициналық хызметти жаңа сапаға көтериў, оны халыққа жақынлатыў, усы хызметтен пайдаланыўды әпиўайыластырыў ҳәм жетилистириў болып табылады.

Сизлерди және бир мәрте кәсиплик байрамыңыз бенен қутлықлаймыз. Халық саламатлығы жолындағы ийгиликли ислериңизде табыслар тилеймиз. Қәлбиңиз ҳәмийше үстиңиздеги ақ халат киби гирбиңсиз болып, қәсте кеўиллерге қуўаныш бағышлаўда шыпа берген қолларыңыз ҳасла дәрт көрмесин!

Мурат Исмаилович Қурбанов,
Қарақалпақстан Республикасы
Денсаўлықты сақлаў министри

✅ @qrdssm

ҲӘМШИЙРАЛАР ҚОСЫҒЫ


Халқымызға хызмет етип бәримиз,
Саламатлық сақшылары өзимиз.
Тилек тилеп саў болсын деп дениңиз,
Кишипейил, муләйимдур сөзимиз.

Қәстелерди даўалаймыз бир тынбай,
Ақ халатлы жақсы нийет исимиз.
Нәзеринен халқымыздың ҳеш қалмай,
Арналады билимимиз, күшимиз.

Әмел етип жақсы қатнас, жақсы сөз,
Наўқаслардың кеўиллерин аламыз.
Үмит пенен тигиледи қанша көз,
Даўалаймыз, бизлер шыпа боламыз.

Пидайымыз жәрдемге тақ турамыз,
Аралаймыз ел ишинде жүремиз.
Ақ халаттай аппақ бизиң санамыз,
Бул кәсипти муқәддес деп билемиз.

Наўқасланып қалса егер бир инсан,
Қыйланаман оның ушын күйемен.
Ақ халатта аппақ болып мен турсам,
Жүрегимнен кәсибимди сүйемен.

Ел мақтаса, халқым мени ардақлап,
Аппақ халат ҳүжданымның иреңи.
Ел нәзери топланады мысқаллап,
Ҳәмшийраға алғыс сөз-ғой кереги.

Ақ халатым турса егер жарасып,
Жас жүрегим кетер мениң дүбирлеп.
Үй аралап шықсам турар қарасып,
Кеўиллерге жол табамыз шеберлеп.

Шаршамаймыз, ис қыламыз ҳәр дайым,
Желкемизге елдиң дәртин жүклеймиз.
Ҳеш бир адам аўырмағай илайым,
Биз ҳәмийше ден-саўлықты тиклеймиз.


Абат Крамов.

Каналымыз: @Kramov_Abatbay_poeziya

ШЫПАКЕРИМЕ.

Мен аўырып келдим бүгин өзиңе,
Үмит болып көринерсең көзиме.
Не айтсаң да исенемен сөзиңе,
Жаным көзлериме көрингенинде.

Ақ халатың бойларыңа жарасып,
Бийтаплардың бәри саған қарасып.
Турмыз толып қабылыңа таласып,
Саўлықтың қәдири билингенинде.

Күлип келдиң кеўлимизди жайнатып,
Күлгишлериң әлле нени ойлатып.
Бийтапты өзиңе қойдың байлатып,
Шыпакерим саған көрингенимде.

Қан басымды өлшеп, жүрек тыңладың,
Әтириңнен бийҳуш бола жазладым.
Күлип турып дәри-дәрмақ таңладың,
Кеўлимде бир туйғы сезингенимде.

Ақ төсекте азарланып қыйландым,
Шыпакерим сени еслеп ойландым.
Тәўир болмас бийтабыңа айландым,
Сениң қармағыңа илингенимде.

Сен келсең кеселим жоғалып кетер,
Шаншыў, азарларым тарқалып кетер.
Шыққан бийтапларың сағынып кетер,
Әжайып даўа бар күлгишлериңде.


2022-жыл. 15-ноябрь.

Абат Крамов.

Каналымыз: @Kramov_Abatbay_poeziya