Қарапайымнан күрделіге принцибі кез келген салада өміршең деп ойлаймын. Бұл принципті тіпті тіршіліктің пайда болуы жайлы сұраққа жауап іздеуде де қолдануға болады. Неге десеңіз, жауап жазып көрейін. «MEDICINA ARS NOBILISSIMA» деген латын даналығымен келіспеуге болмайды. Сонда не дейді бұл даналық? «Медицина – өнер ұлысы» дейді. Расымен, медицина сенің кез келген сұрағыңа жауап тауып бере алатын бағыттаушың. Медицина университетінде үш жыл білім алып, адамның осыншалық мінсіз жаратылыс екеніне көз жеткіздім. Бір ғана биохимияның өзі мені естен тандырып жіберді. Ауызыңа түскен тамақтың қаншама үдерістерден кейін ғана мыйыңның мәзіріне айналатынын білсең, отырған жеріңнен құлап түсесің. Тірек болар қаңқа, оны әрекетке келтіретін бұлшықет, ол бұлшықетті іске қосатын жүйке жүйесі, оны және барлығын қоректендіретін қан айналым жүйесі, қанға қорек көзін сырттан түсіретін ас қорыту жүйесі және ең соңында оның бәрін сыртқа шығаратын несеп жүйесі мен артыңнан ұрпағыңды қалдырар жыныс жүйесі және ең бастысы аталғанның бәрін басқарып отыратын эндокринді жүйе. Бәрі бір-бірімен тығыз байланысты, бірін-бірінсіз өмір сүре алмайды. Бір ғана жұдырықтай жүректің қызметі мен құрылысы кез келгеннің таңдайын қақтырарына бек сенімдімін. Осының барлығын біле тұра, адам Жаратушы иеміз Құдай топырақты ұрып, соғып, мүсін жасап, "сүф" дей салғанынан пайда дегенге қалай сенесің? Қалай ғана олай айтуға ауызың барады? Ең алғашқы тіршілік нышаны РНҚ молекуласы деп есептесек, адамға сол молекулдан осы қалыпқа келу үшін 4,1 миллиард жыл қажет болған. Қайсысына сенесің? Бір демде "сүф" дей салғаннан салбырап түсе салғанға ма әлде осыншама жылдар емес, ғасырлар, тіпті дәуірлер бойы қарапайымнан күрделіге принцибі бойынша күрделенуге ме? Өз басым екіншісіне. Себебі осыншалық күрделі, кіршіксіз, мінсіз адам организмі бір демде пайда болды деп айту – менің ақылыма симайды.