Ким менен дени сак мамиле кура алсаң, ошол адам менен турмуш курасың…
Кыздардын укуктары, кыздарды билимге, өнүгүүгө багыт берген ойлорумду жазганда жигиттерден “эже кыргыз кыздарды кыргыз жигиттерге турмушка чык деп айтпайсызбы, сизди көп кыз угат, аларды туура жолго салыңыз” деп тапшырма берген каттарын жазышат…
Кечээ, сүйгөн эмес тарбиясыз жигиттер тийишет, жеке чек араңды тебелейт деп оюмду айтсам Фейсбуукта чоң эле байке “кыргыз кыздарга укук, эркиндик берип койсоң ушинтишет анан, кыргыздын кыз түбүнө жетет” деп жазыптыр…
Мен мындай каттарга, пикирлерге таң калбай калдым, бул кааласак-каалабасак да коомдун жүзү болуп келе жатат…
Ооба билимдүү, тарбиялуу жигиттер да көп, бирок менин пикирмде, билимдүү кыздын баарына жеткидей билимдүү жигит жок биздин коомдо…
Азыр кыздар аябай өнүгүп, окуп, дүйнө кыдырып, өзүн эле эмес, үй-бүлөсүн кошо сүйрөгөн аракетчил кыздар көбөйүп жатат… Анан суроо жаралат, ал кыздардын баарына кор кылбай, алаканга салып алчу кыргыз жигиттери барбы?
“Кыргыз кыз кыргыз жигитке турмушка чыгуусу керек, эже сен айт кыздарга” деп мага тапшырма берээрден мурун, бул кыздар эмне үчүн кыргыз жигитин эмес, башка улуттагы жигитти тандап жатат деп өздөрүнө, айланасындагы жигиттерге суроо берүүсү керек…
Биз кандай болгондо кыргыз кыздары чет элликтерге эмес, бизге турмушка чыгат, деп өздөрүнө, аракеттерине анализ жасоолору керек менимче.
Түшүнгөнгө бул да сонун демилге, мотивация.
Себеби билимдүү, сүйлөгөн сөзү ордунда, өзүн тааныган, өзүн барктаган кыз, ким менен дени сак мамиле еура алса ошол адам менен баш кошот…
Азыр жалгыз кыргыз кыздары эле чет элдик жигиттер менен турмуш куруп жаткан жок. Чет элдик кыздарга үйлөнгөн жигиттер да абдан көп.
Демек “кыргыз кыргыз менен турмуш курса сонун болот эле” деп кыялдана турган болсок, кыргыз кыргызды барктай алгыдай, эмоционалдык, моралдык жактан жетилип, дени сак мамиле курганды үйрөнүүбүз керек…
Себеби адам, кызбы, эркекпи, ким менен дени сак мамиле кура алса, ошол адам менен турмуш курат…
Формула өтө жөнөкөй, эч ким эч кимди “сен кыргызга тий, кыргызды ал” деп үгүттөп акыл үйрөтүүгө кажет жок, ар бир адам дени сак мамиле курганды үйрөнүүнү өзүнөн баштоосу керек…
© Айсулуу Алмаз🫶
