Әшкере

⚡️ Құлыбаевтың маңызды активтері енді мемлекетке тиесілі

Атышулы Тимур Құлыбаевқа тиесілі деп саналатын «ТЭК-Казахстан» компаниясы мемлекет меншігіне 54 нысанды өткізді.

Ұсынылған ақпаратқа сәйкес, құрамына жанармай қоймалары, ғимараттар мен құрылыстар, сондай-ақ негізгі құрал-жабдық топтары кіретін мүлік енді мемлекетке тиесілі.

Сонымен бірге «Қорғас» халықаралық орталығындағы багаж терминалы мен жер учаскесі де қайтарылған.

Бұған дейін Активтерді қайтару жөніндегі комитет Тимур Құлыбаевпен соттасып жатқаны туралы ақпарат тараған еді. Күйеубаланың есімі елдегі ең ықпалды бизнес өкілдерінің бірі ретінде жиі аталады. Ол «Кипрос» пен «Joint Technologies» арқылы «ТЭК-Казахстан»-ды қадағалаған деп айтылады.

Қаржы есебіне сүйенсек, Құлыбаевтың Joint Resources холдингі 2023 жылдың қорытындысында 39,1 млрд теңге таза табыс тапқан. Холдингтің қарамағында жеті еншілес мекеме бар, олардың арасында «Кристалл Менеджмент» АҚ, «Kazakhstan’s mineral resource investment company» ЖШС, «Шұбаркөл Премиум» АҚ секілді кәсіпорындар және басқа да ұйымдар кездеседі.

Мемлекетке қайтарылған 54 нысанның нақты қандай мақсатта пайдаланылатыны әлі белгісіз. Құзырлы органдар бұл процестің жалғасатынын ескертуде.

Бізге тіркеліп алыңыз:

📱 t.me/askerenews

🛫 Қазақмыс: Назарбаев? Біз оған самолет сыйлаған жоқпыз...

“Kazakhmys” корпорациясы экс-президент Нұрсұлтан Назарбаевқа ұшақ сатып алды деген ақпаратты жоққа шығарды. Компанияның ресми мәлімдеуінше, Airbus ACJ TwoTwenty бизнес-джеті үшін 84 миллион доллар жұмсалған деген жаңалық шындыққа жанаспайды.

Корпорация өкілдері қандай да бір жеке тұлғаға арналған ұшақ сатып алмағанын айтады. Олардың сөзінше, әуе кемесі компанияның өндірістік қажеттіліктері үшін алынған

ал қоғамда таралған “Назарбаев үшін арнайы сатып алынды” деген пікір негізсіз әрі жұртты жаңылыстырады.

“Kazakhmys” өкілдері медиа мен әлеуметтік желі белсенділерін таратып жатқан ақпараттың дұрыстығын тексеруге және жалған мәліметке жол бермеуге шақырды. Компания мәлімдемесінде бұл оқиғаға қатысты кез келген айыптау мен алып-қашпа сөздің еш дәлелі жоқ екені атап өтілген.

Бізге тіркеліп алыңыз:

📱 t.me/askerenews

❗️ Алмас Кішкенбаев алдағы 15 күнді абақтыда өткізетін болды

Алматыдағы мамандандырылған ауданаралық сот танымал әнші Алмас Кішкенбаевқа қатысты істі қарап, оны 15 тәулікке қамау туралы шешім шығарды.

Сот мәліметінше, 40 жастағы Кішкенбаев 17 жасар жасөспірімге тиісті деп айыпталған.

Процес жабық режимде өтті. Ресми ақпаратқа сүйенсек, әнші мас болған және жәбірленушінің айтуынша, оған сыра ұсынған, кейіннен қорлайтын іс-әрекеттер жасап, тиісе бастаған.

Сот барысында Кішкенбаев сол күнгі оқиғаның мән-жайын мүлде ұмытып қалғанын алға тартқан.

Судья істі қарау кезінде әншінің әрекетіне кеңшілік жасамайтынын хабарлады. Керісінше, мас күйінде заң бұзу жауапкершілікті ауырлататын фактор саналады. Осы себепті Кішкенбаев 15 тәулікке әкімшілік қамауға алынды. Шешім әлі заңды күшіне енген жоқ.

Бізге тіркеліп алыңыз:

📱 t.me/askerenews

❗️Reuters: Әзірбайжанның ұшағын орыстардың "Панцирь-С" зымыраны атып түсірген...

Ақтау маңында апатқа ұшыраған AZAL әуе компаниясының ұшағын ресейлік "Панцирь-С" зениттік-зымыран кешені атып түсірген. Бұл туралы Әзербайжан үкіметінің өкіліне сілтеме жасаған Reuters агенттігі хабарлады.

Қазақстанның Көлік министрлігі осы апатқа қатысты алдын ала тергеу есебін жариялап, ұшақ фюзеляжында көптеген тесіктер мен соққы іздерінің бар екені көрсетілген фотоларды ұсынған еді.

Әзербайжан тарапы бұдан бөлек сол күні Грозныйда "Ковер" жоспары енгізілгенін, бірақ диспетчер бұл туралы лайнер зақым алғаннан кейін ғана хабарлағанын мәлімдеді.

Алғашқы дерек бойынша, Баку – Грозный бағытындағы тұрақты рейс жасайтын ұшақ ұшуды бастар сәттен Грозныйға дейінгі аралықта техникалық тұрғыда жарамды болған. Екі қозғалтқыш та апат болғанға дейін ақаусыз істеген.

Ұшақ Ресей Федерациясының әуе кеңістігінде, соның ішінде Грозный әуежайы үстінде ұшқан кезде 🛰GPS сигналын жоғалтып алған.

Грозный маңында ауа райы қолайсыз болып, ұшақ екінші айналымға қонуға мүмкіндігі болмаған соң, капитан Бакуға кері қайтуды ұйғарған. Дәл сол кезде CVR (Cockpit Voice Recorder) мәліметтері екі сыртқы дыбысты тіркеген, олардың аралығы 24 секундты құрайды.

2024 жылғы 25 желтоқсанда Баку – Грозный бағытымен ұшқан Embraer E190 ұшағы Ақтау қаласына жақын жерде құлаған. Бортта 62 жолаушы мен 5 экипаж мүшесі болған, 38 адам қаза тауып, қалғандары аман қалған.

Апаттан кейін Әзербайжан президенті Ильхам Әлиев ұшақты Грозный үстінде жерден атып түсірді деп мәлімдеп, экипаждың шұғыл қонуға сұраныс білдіргенін, алайда Ресей әуежайлары бортты қабылдамағанын айтты. Сөйтіп ұшақ Каспий теңізі арқылы Ақтауға бет алған.

Оқиғадан үш күн өткен соң Ресей президенті Владимир Путин Ильхам Әлиевке телефон шалып, «Ресей әуе кеңістігінде болған қайғылы оқиға үшін» кешірім сұрады. Ал Әлиев өз кезегінде Мәскеуді ресми түрде кінәсін мойындауға шақырды.

Бізге тіркеліп алыңыз:

📱 t.me/askerenews

⚡️ Ақтаудағы трагедия: Апат алдындағы ұшқыштардың диалогы жарияланды

Шамамен сағат 05:15-те ұшқыштар жердегі диспетчерлермен шұғыл байланысқа шығады. Әуелде олар "екі рет дүңк еткен қатты соққы сезілді, шамасы ұшаққа құстар соғылған болуы керек..." ойлап қалған. Артынша ең жақын маңдағы әуежайға қонуға рұқсат сұраған.

Сол екі ортада ұшақтың басқаруға "бағынбай" жатқанын, гидравликаның істен шыққанын да ескертіп үлгерген.

Экипаж ұшақты Минералды суларға (Ресейдегі қала) қондыруға оқталғанмен, ондағы ауа райы жайсыз болады. Махачқала мен Бакудегі жағдай да осыған ұқсас екені анықталады. Ақыры ауа райы жағынан да, әуеайлақ дайындығы жағынан да қолайлысы Ақтау болған соң, сонда бет бұрады.

Сәлден соң капитан жолаушылар кабинасындағы оттегінің таусылуға таяп қалғанын хабарлап, "бәлкім оттегі баллондарының бірі жарылған болар" деген ұйғарымға келеді. Салондағы адамдарға ауа жетпей, есінен тана бастағанын көргенде экипаждың өзі де қатты абыржыған.

⚠️ 06:02-де ұшқыштар "Mayday" дабылын қосып, дереу қонуға рұқсат сұрайды, әрі ұшақтың басқару тетіктері мүлдем істен шыққанын айтып үлгереді. Бұл "қара жәшікте" сақталған ұшқыштардың соңғы сөзі...

Осыдан кейін, 06:22 шамасында экипаж шассиді шығарып, қонуға дайындалуға кіріседі. 06:27-де ұшақ апатқа ұшырайды. Апаттан үш экипаж мүшесі мен 35 жолаушы опат болды.

Бұған дейін Әшкере Ақтаудағы апатқа сыртқы фактор әсер еткенін, ұшақтан шығу тегі белгісіз бөгде заттар табылғанын хабарлаған болатын.

Бізге тіркеліп алыңыз:

📱 t.me/askerenews

🏦 Банктер мемлекеттен алған қаржылай көмекті қайтара бастады

Президент Тоқаев Қаржы нарығын реттеу агенттігінің төрағасы Мәдина Әбілқасымованы қабылдады.

Басты жаңалық: банктер мемлекеттің алдындағы берешегінен құтыла бастаған.

Агенттік дерегі бойынша, екінші деңгейлі банктер өкіметтен алған 400 млрд теңге көлеміндегі қаражатты кері қайтарыпты.

Сонымен қатар:

🔸Бизнеске берілген кредиттер 16,3%-ға өскен (13,1 трлн теңге), ал жаңа займдар көлемі 18,2 трлн теңгені құраған;

🔸614 мың азаматтың проблемалық қарызы қайта құрылымдалып немесе толық/жартылай кешірілген (жалпы 210 млрд теңге).

Бұған дейін Тоқаев бірқатар банктен мемлекеттен алған қаржылай көмекті тездетіп қайтаруды талап еткен.

Айтуынша, 2017-2020 жылдары Jusan банк, Еуразиялық банк, Халық банк, Нұр банк және БЦК сынды қаржы ұйымдарына 💰Ұлттық қордан 15 жылға қомақты сома берілген. Мәселен бір ғана БЦК банк Үкіметтен 60 млрд теңге қарыз алған.

Бізге тіркеліп алыңыз:

📱 t.me/askerenews

❗️Ақ үй USAID-тің "абсурдты" шығындарын жария етті

АҚШ әкімшілігі атышулы USAID-тың (Халықаралық даму жөніндегі агенттік) "абсурдты" жобаларға қыруар қаржы бөлгенін дәлелдейтін даулы құжатты жариялады.

"USAID ондаған жыл бойы салық төлеушілердің ақшасын төгіп-шашты. Біз оны дереу тоқтатамыз", – делінген Ақ үйдің мәлімдемесінде.

Ақ үй ұсынған ақпарат бойынша, USAID қаражаты түрлі елдерде "әрқилы" мақсатта пайдаланылған. Мәселен:

Вьетнамға электромобильдер сатып алуға $2,5 млн;

Колумбиядағы трансгендерлердің операсына $47 мың;

Перудегі "трансгендерлік комиксті" әзірлеуге $32 мың;

Гватемаладағы жыныс ауыстыру операциялары мен "ЛҒБТ белсенділігіне" $2 млн;

Сириядағы «Әл-Каидаға» қатысы бар содырларға жүздеген мың порция тамақ;

Ауғанстандағы көкнәр егістігін суару, тыңайтқыш сатып алу және құрал-жабдыққа жүздеген миллион доллар бөлінген.

Ақ үйдің айтуынша, бұл тізім толық емес.

"Under President Trump, the waste, fraud, and abuse ENDS NOW (Президент Трамптың тұсында салық төлеушінің ақшасыз орынсыз жұмсау бүгіннен бастап ТОҚТАЙДЫ),” – деп атап өтті АҚШ әкімшілігі.

Бізге тіркеліп алыңыз:

📱 t.me/askerenews

❗️ Қып-қызыл шығын! Amanat депутаты халыққа кока-кола ішпеуге, чипсі жемеуге кеңес берді...

Мәжіліс депутаты Елнұр Бейсенбаев халыққа қаражатты қалай үнемдеу керектігі туралы кеңес берді.

«Несие алмаңдар, iPhone 14, 15, 16-ға жоламаңдар. Сондай-ақ тауарды бөліп төлеу (рассрочка) жолымен алуға да әуес болмау қажет. Яғни, жарнаманың жетегінде кетудің қажеті жоқ. Жәрмеңкелерге барып, барынша үнемдеген дұрыс.

Қазіргі таңда "Аманат" партиясының бастамасымен "Қарызсыз қоғам" жобасы іске асуда, сол жерде толық түсіндіру жұмыстарын жүргізіп келеміз. Көптеген жас семья кешкі уақытта кино көруге немесе кітап оқуға чипсы, кока-кола секілді дүниелерді пайдаланғанды жөн көреді.

Біріншіден, бұл денсаулыққа зиян, екіншіден – артық шығын. Мұндай нәрселерге айына 150-200 мың теңге кетеді. Менің ойымша, халықты үнемшілдікке үйретудің қажеті жоқ, олар бізден жақсы біледі», – дейді депутат Бейсенбаев.

Айта кетсек, бұған дейін Тоқаев Үкіметтің үнемдеу режиміне көшіп, қаржыны тек қажетті салаларға бағыттауы керектігін айтқан.

«Ендігі жерде бізге белді буып, өз мүмкіндігімізге қарай өмір сүретін уақыт келді», – деген болатын Президент.

Бізге тіркеліп алыңыз:

📱 t.me/askerenews

⚡️ Пенсиядағы Назарбаев көл-көсір пайдаға кенелді

"Назарбаев қоры" қожалық ететін Ресейдегі "Азия-Тынық мұхит банкі" (АТБ) 2024 жылдың қорытындысы бойынша рекордтық табыс тапқан.

Ресей Орталық банкінің дерегіне сәйкес, қаржы институтының қалтаға түсетін таза кірісі 11,3 млрд рубльден асыпты. Бұл қазіргі айырбас бағамымен есептегенде шамамен 59,2 млрд теңге.

Назарбаевтың қарамағына өткен үш жыл ішінде банктің жалпы жиынтық табысы 19,88 млрд рубльден (103 млрд теңге) асып жығылған.

АТБ-ны экс-президент Нұрсұлтан Назарбаевпен байланысты "Назарбаев фонды" 2021 жылы иемденген еді. Сол кезде Ресей Орталық банкі қаржы институтын бәссаудаға шығарған болатын.

Сатып алушы "Pioneer Capital Invest" компаниясының артында экс-президентке тікелей бағынышты құрылымдар тұр.

Бізге тіркеліп алыңыз:

📱 t.me/askerenews

❗️Бергей Рысқалиев Қазақстанға қайтудың амалын қарастырып жатыр

Мәжіліс депутаты Абзал Құспанның пікірінше Атырау облысының экс-әкімі Бергей Рысқалиев елге оралу опциясын қарастырып жатыр. Adal Adam арнасына сұхбат берген депутаттың айтуынша Атырауда Бергейдің беделі мықты.

"Рысқалиевтің айыбы бар ма? Осы сұрақты Атырау халқына қойсаңыз, 90 пайызы Бергейді жақтарына сенімдімін. Тіпті асып кетеді. Кезінде саяси негізбен қудаланған азамат. Өзім көрген материалдың шеңберінде ол кісіні қылмыскер деп санамаймын", — дейді Құспан.

Сондай-ақ, Рысқалиевтің Қазақстанға оралғысы келетіні белгілі болды.

"Оны 17 жылға соттау туралы үкім бар. Сол үкім бұзылмайынша келе алмайды. Келген бойда қамауға алынады. Сол үшін әуелі үкімді бұзу керек. Ол бағытта жұмыс істеп жатқан болар. Менің ойымша, (Қазақстанға) келгісі келеді. Өте қазақы тұлға, ауылдан шыққан", — дейді депутат.

2019 жылы Қазақстан соты Бергей Рысқалиевті 17 жылға, ағасы Арманжан Рысқалиевті 16 жылға сырттай соттаған.

Бізге тіркеліп алыңыз:

📱 t.me/askerenews

❗️ "Сіз әлі өкінесіз...". Трюдо Трампқа жауап қатты

Канада премьер-министрі Джастин Трюдо Ақ үйдің жаңа тарифтік саясатына байланысты АҚШ халқына үндеу жасады. Оның айтуынша, Трамп әкімшілігі енгізген баж салығы тек канадалықтарға ғана емес, Әміриканың өзіне де ауыр тиеді.

Трюдо автомобиль зауыттарының жабылу қаупін, азық-түлік пен жанармай бағасының қымбаттауын, никель, калий, уран, болат және алюминий сияқты маңызды шикізатқа қолжетімділіктің шектелуін мысалға келтірді.

Трамптың қазіргі қадамдары екі елдің арасына жік салғанын айтқан Трюдо канадалықтарды өз өнімдерін тұтынуға шақырды:

“Дүкен сөресінен Әміриканың тауарын көрсеңіз, теріс айналыңыз. Флориданың апельсин шырынын алғанша, канадалық ауылшаруашылық тауарларын қолдайық. Америкалық бурбонды отандық вискіге ауыстырайық. Жазғы демалысты Канадада өткізейік...”, - деді ол.

Трампқа жауап ретінде Трюдо жалпы құны 155 млрд доллар болатын америкалық тауарларға 25 пайыздық тариф енгізбек. Алғашқы қадамда 30 млрд долларлық тауарларға бірден баж салынады, үш аптадан кейін тағы 125 млрд долларлық өнім қамтылады.

Бізге тіркеліп алыңыз:

📱 t.me/askerenews

👨‍💼 Трамп әкімшілігі әлемдегі ең ірі донор – USAID-ті жабуға кірісті

Дональд Трамптың әкімшілігі Халықаралық даму агенттігіне (USAID) қарсы қатаң шаралар қабылдап жатыр деген ақпарат тарады. Агенттік әлемнің түкпір-түкпірінде гуманитарлық, азаматтық және әлеуметтік бағдарламаларға ондаған миллиард доллар бөлумен танымал.

Трамп пен мемшығындарды оңтайландыру департаментінің (DOGE) басшысы Илон Маск USAID қызметін "Американы жек көретін марксистер" басқаратын ұйым деп айыптады.

Reuters агенттігінің дерегіне сүйенсек, сенбі-жексенбі күндері DOGE қызметкерлері қауіпсіздік шараларына байланысты шектелген USAID кеңселеріне енуге талпынған.

Оларға құпия құжаттарға қол жеткізетін рұқсат берілмегендіктен, агенттіктің екі жоғары лауазымды қауіпсіздік қызметкері оларды тоқтатуға тырысқан. Алайда, дүйсенбіге қарай бұл екі маман да жұмыстан босатылып, 100-ден астам USAID қызметкері әкімшілік демалысқа жіберілді.

Кеше USAID.gov сайты жұмысын тоқтатты, ал Мемлекеттік департамент сайтында агенттікке тиесілі жаңа парақша пайда болды. Сондай-ақ әлеуметтік желідегі (Илон Маск иелігіндегі “X” платформасындағы) агенттік аккаунты жойылғаны хабарланды.

Соңғы 20 жылда USAID Қазақстанға шамамен 2 млрд доллар бөлуге атсалысты. Оның ішінде денсаулық сақтау саласына 86 млн доллардан астам қаржы құйылған.

Агенттіктің үздіксіз қаржыландыруы азаматтық қоғамды, тәуелсіз БАҚ пен әлеуметтік жобаларды қолдауға бағытталып келген.

Бізге тіркеліп алыңыз:

📱 t.me/askerenews

🇰🇿 Халықтың табысы аз. Кредит алуды тежей алмай жатырмыз - Сүлейменов

Қазақстандағы тұтынушылық несие беру ережелері одан сайын қатаңдауы мүмкін. Ұлттық банк төрағасы Тимур Сүлейменовтің айтуынша, тұтынушылық несиені шектеу шаралары күткендегідей нәтиже бермеген.

Ол 2023 жылы тұтынушылық несие беру қарқыны 35 пайызға өскенін, ал 2024 жылы бұл көрсеткіш 15–17 пайыз деңгейінде қалады деп болжам жасағанын жеткізді.

Алайда, жыл қорытындысында өсім 33,5 пайыз болып шығып, болжамнан жоғары болып шыққан.

Еске салсақ, 2024 жылдың алғашқы жартысында бірқатар қатаңдату шаралары қабылданған еді:

🔸Қарыз алушының борыш жүктемесі коэффициентін енгізу;
🔸Төлем мерзімін өткізіп алған жағдайда несие беруге тыйым салу;
🔸Несие рәсімдегенде ерлі-зайыптылардың келісімін алу секілді талаптар күшіне енді.

Сүлейменов тұтынушылық несиелердің қарқынды өсуі "халықтың тапқан табысының төмендігіне" байланысты екенін мойындады.

Оның сөзінше, бұған қоса, несие арқылы шетелден келетін ұзақ мерзімге пайдаланылатын тауарларды сатып алу теңгеге қосымша салмақ түсіреді.

«Сондықтан тұтынушылық кредиттеуде реттеу тетігін тағы да қатаңдату уақыты келді деп есептейміз», – деді Ұлттық банк төрағасы.

Бізге тіркеліп алыңыз:

📱 t.me/askerenews

❗️ Алмас Кішкенбаевтың ісі сотқа түсті. Не белгілі?

Алматы қаласының мамандандырылған ауданаралық әкімшілік соты танымал әнші Алмас Кішкенбаевқа қатысты істі өндіріске қабылдады.

Сот материалдарына сүйенсек, өнер иесіне Әкімшілік құқық бұзушылық туралы кодекстің 434-бабы 1-бөлігі (“Ұсақ бұзақылық”) бойынша айып тағылып отыр.

Алғашында істі 31 қаңтарда қарау жоспарланған. Алайда жәбірленуші тараптың (кәмелетке толмаған баланың әкесі мен заңды өкілі) уақыт сұрауына байланысты сот отырысы кейінге шегерілген екен. Жаңа отырыс бүгін, 3 ақпанға белгіленді.

Кішкенбаев не үшін айыпталып отыр?

Әкімшілік кодекстің 434-бабының 1-бөлігіне сәйкес, “қоғамдық орындарда былапыт сөйлеу, адамдарға тиісу және айналасындағыларды сыйламау, қоғамдық тәртіп пен жеке тұлғалардың тыныштығын бұзу” ұсақ бұзақылыққа жатады. Заң бойынша мұндай әрекет үшін 20 айлық есептік көрсеткіш (шамамен 78 640 теңге) көлемінде айыппұл немесе 5-15 тәулік аралығында қамауға алу жазасы қарастырылған.

Айыптаудың мәні неде?

Бұған дейін желіде Алмас Кішкенбаевты полицияға әкеткені туралы ақпарат тараған еді. Құзырлы органдардың мәлімдеуінше, оған қатысты “кәмелетке толмаған балаға тиісу” дерегі бойынша шағым түскен. Істің мән-жайын енді сот анықтайды.

Алмас Кішкенбаев – қазақстандық эстрада әншісі, 2000-жылдардың басында Superstar KZ жобасының тұңғыш маусымында (2004 жылы) жеңіске жетіп, танымалдылыққа ие болған.

Бізге тіркеліп алыңыз:

📱 t.me/askerenews