.І-і-м, не ғой, Сізге бірдеңе айтайыншы. Жер әлемнің жарты сыйлығын алуға талпынғанша, жүк арқалаған жүрегімнің жартысын-ақ жауласаңыз жетер еді ғой. Сарғая күтер Сағынышыма айналыңыз! Әлде даңқы әлемге тарап, дақпырты жер жаратын "атақты"-ға айналу - басты мақсат-мүддеңіз бе еді, әлде?! Қашанғы ішкен-жегеніңізге, ойнап-күлгеніңізге, мал-мүлік, дәулет жиғаныңызға мәз боп жүре бермекшісіз?!
...Әуелі Алланың сүйікті құлынан болуға тырысыңыз, сонсоң менің "сезіміме серік, Жүрегіме ие жан" болсаңызшы одан да!)
Кеуде қуысымда еш дамылсыз жұлқынып тулап жатқан "жүрек-гүлімді" шерінен, мұңынан, уайымынан біржола айықтырып алыңызшы. Жарық сәуле түсіріп, жақсылықпен әлдилеңіз. "Иман" атты ыстық, ынтық сезіммен суарыңыз. Жылы сөз айтып жұбатып, жандүниемдегі зілбатпан ауырлықтан арылуға жәрдемдесіңіз. Көңілсіз жүрген ботаңызды қуантып, өміріне жаңалық енгізсеңізші! Шаршап-шалдыққанымда шама-шарқыңызша қолдау білдірсеңіз жетеді.
Жүрегімізді итырғылжың тірліктің күнәсінен, лас дүниелерінен, ыза-наласынан, ұрыс-керісінен, жала-өсегінен сақтайықшы! Рухы әлсіз, иманы әлсіз, қуыскеуде пенделерден болмайықшы. Сүйіспеншілік пен махаббат сезімі басымызға бақ боп қонса екен. Жарық жұлдызыңыз, жалғызыңыз болайын.
Ақшамен, ақымен өлшенбейтін Махаббатыма егелік етсеңіз, Сізден Бақытты жан болмайды. Уәде етем!
Жаныңызда болғым келеді. Сіз де менің қасымнан табылыңыз! Жаббар Ием Сізге (Тектім) жар болғай!
...Білемісіз?! Қандай арманым бар?
Сізбен Жұмақ бақта бірге болғым келеді...)
(Ботакөз Бексары)
