Айла...
Көрегендігімен аты шаққан сахаба Мұғира ибн Шұғба (Алла оған разы болсын) былай дейді.
«Мені ешкім жеңіп көрген емес. Тек Харис руынан шыққан бір жас жігіт ебін тауып жеңіп кетті. Ол былай болған еді. Мен сол Харис руынан бір көркіне ақылы сай әйелге құда түстім. Құдалық істерімен жүргенімде менің жанымда әлгі рудан шыққан жігіт жүрді. Бір кезде маған қарай бұрылып: «Уа, әмірші! Мынау әйелден саған хайыр, жақсылық келмейді» дейді. Мен таңданып: «Бауырым! Ол әйелдің несі бар екен?» деп сұрадым. Ол маған қарап: «Бір еркектің бұл әйелді сүйгендігін көзім көріп еді» деді. Мен дереу әлгі әйелден бас тарттым. Сонымен арада біраз уақыт өтті. Кейінірек маған мені айнытқан жігіттің сол әйелге үйленіп алғандығы жайлы хабар жетті. Дереу нөкерлерімнің бірін оның үйіне жіберіп құзырыма алдырдым. Көрген бетте: «Сен маған бұл әйелді бір еркектің сүйгендігін көзім көрді демеп пе едің?» дедім. Ол еш саспастан: «Иә солай болғаны рас. Мен оны әкесінің сүйгендігін көрген едім» деді.
Күндеріңіз сәтті өтсін!