Қайын атаның миссиясы. Мұхамеджан Тазабек
Аллаға шүкір, біздің отбасымыз үшін, бүгін үлкен мереке!
Ұлымның үлкені Абдулғафур сүйгенін тауып, Алланың алдындағы ақ некесін қиып жатыр. Алладан береке тілеп, дұға қылып қойыңыздар. Алла Тағала Сіздерді де осындай қуанышпен шүйіншілесін! 🤲
Ұлым қуанып, ұлыммен қатар біздер де қатты толқып жүрміз. Себебі, отбасымызға ерке келін, ерекше жан, жаңа тұлға келе жатыр.
“Келіннің аяғынан” дейді, халқымыз. “Басынан жақсы болса екен, бір-бірімізді қуантсақ екен, гүлге көбелек қонғандай, жартасқа сұңқар ұя салғандай жарасып кетсек екен, жатырқамай, жанымыз жылу сыйласа екен” деп, Алладан дұға қылып отырмыз!
Көбінде, “келін” десе, “ене” еске түседі. Қайын ата туралы көп айтыла бермейді. Негізі, ене ғана емес, келін үшін қайын ата факторы да ерекше деп ойлаймын. Сол миссияны дұрыс атқара алсақ екен, деп, іштей жауапкершілік сезінудемін. Менің ойымша, үйге келін келгесін, бәрі өзгеру керек. Әрине, жақсы жағына. Әсіресе, біздер - аталар өзгеруіміз де, жағдайды өзгертуіміз де керек…
Келін судай сіңіп, тастай бату үшін ата не істеу керек?!
Біріншіден, жаңа ортаға кеп жатқан келінге камфорт болу үшін, тезірек үйренісіп кету үшін, ата үй ішінде ерекше атмосфера орнауын қадағалау керек. Келінге қолайсыздық тудыратын факторларды бірден шешуге кірісу керек. Қонақ ағымын қадағалау, үйде жатқан бөтен туыс, бойдақ студент сияқты құбылыстардың бәрін кедергі келтірмейтіндей реттеу керек…
Екіншіден, қайны ата бәйбішесімен көркем қарым-қатынасын күшейту керек. Себебі, бәйбішенің көңілі дұрыс болмаса, “ене” ретінде жайсыз тұлғаға айналуы мүмкін. Келінді елеусіз де қалдырмайтындай, қатты қысып та жібермейтіндей, жұмсақ ақылын айтып, бәйбішенің иманына, көңіл-күйінің тұрақты болуына жұмыс жасау керек. Үйде қайын әпке, қайын аға, қайны дегендер бірге өмір сүрсе, сол тұлғалардың әсер ету факторын ерекше жағдайда үйлестіріп отыру керек…
Ене келінді қызындай көре алмауы мүмкін. Заты әйел ғой. Ал, қайын ата қызындай көру керек. Еркектің нағыз кеңдігі, даналығы сыналатын тұс осы. Шариғатта да ата мен келін қарым-қатынасы ерекше мәнге ие. Мысалы, өмір белесінде әлде қандай жағдаймен бала мен келін бөлек кетсе де қайын атасы келінге өле-өлгенше махрам (қамқор ер азамат) боп қала береді.
Үшіншіден, үйге жас келін келгесін, атаның әдебі де күшейюі керек. Жүріс-тұрысы, киім-киісі, әңгімесі тіптен даусының децибеліне дейін. Келін отырған жерге оқыс кіріп келмеу, ығайсыздық туғызатын кез-келген әрекеттен алыс болу, бәйбішесіне де келін еститіндей жерде күңкілдеп сөйлемеу. Кейбір, ескерткісі келетін нәрсе болса, ақырын ғана ене арқылы ақпарат жеткізу дегендей…
Негізі, үйде ата абыройлы болса, ене шектен шықпайды. Сондықтан, еркектің абыройы қаншалықты екені - келін келгенде белгілі болады. Ененің “ұлын қызғануы, ас бөлмесін қызғануы, келінге күн көрсетпеу” үйде еркектің билігі әлсірегенде, қадірі қашқанда орын алатын келеңсіздіктер.
Кейде ұлдың әйелі мен мамасының ортасында шырылдап, шаруа шеше алмай жүруі де, әкенің жоқтығынан немесе әлсіздігінен боп жатады. Абыройлы күйеудің “қоя сал, қайтесің” деп бір ауыз сөзімен тоқтайтын проблемалар, бала шырылдап мамасына бір жыл айтса да шешілмей жататыны содан…
Сондықтан, құрметті достар, қадірлі қайын аталар!
Келіннің тек қана немере туып бергенін, әдеппен шәй құйып бергенін ғана күте бермей, ата-анасынан көрген мейірімін барған жерде артығымен сезінетіндей, түсінігі мол тұлғаларға айналуымыз керек!
Келінге қалай болсаң, қызыңды сондай тағдыр күтіп тұр. Заман өзгерді, құндылықтар шайқалды... “Баяғыда, біз бүйтуші едік…” деп, айта бермей, осы күннің заңдылығына сәйкес, әдемі қарым-қатынас орнатуға тырысуымыз керек…
Ешкім-ешкім үшін өмір сүрмейді. Ешкім-ешкімге міндетті емес. Әркім “сыйлағанның құлы!”
Сыйласаң сый көресің, сынассаң суисың!
Жаһандық күштер, технологиялық тирандар отбасылық, ұлттық құндылықтарды күйретуде.
“Ата, ене, күйеу, келін” боп, үйлесімде өмір сүрем десеңіз, келісімге, диологқа, түсінісуге, біреудің жағдайына кіруге бейім болыңыз. Басқа мүмкіндік жоқ. Алла баршамызды екі дүниенің жақсылығымен қуантсын.
