AQ$HANEWS

Астанадан Делиге тікелей рейс ашылады

Осы жылдың 14 мамырынан бастап "Indigo" әуе компаниясы Астана – Дели бағыты бойынша жаңа бағыт ашуды жоспарлап отыр. Рейстер аптасына 3 рет жиілікпен орындалады.Бұл туралы Көлік министрлігі хабарлады.

Осыған дейін хабарланғандай, "Эйр Астана" компаниясы биылғы 20 сәуірден бастап аптасына 3 рет жиілікпен Алматы – Мумбай бағытындағы рейстер ашады.

Қазір тұрақты әуе қатынасы Алматы – Дели, Алматы – Гоа, Астана – Гоа бағыттары бойынша орындалады.

Әзербайжан USAID-тің елдегі қызметін тоқтатуды талап етті

Әзербайжан АҚШ-қа Халықаралық даму агенттігінің (USAID) елдегі қызметін тоқтату туралы хабарлама жіберді. Бұл туралы сыртқы істер министрлігінің баспасөз қызметі басшысының орынбасары Айхан Гаджизаде айтты.

Хабарламада USAID-тің Әзербайжанда жұмыс істеуіне «құқықтық негізі жоқ», сол себептен ол «қызметін тоқтатуы тиіс» екендігі жазылған.

QazIndustry 63 миллион теңгеге кәсіпорындардың өтінімдерін мақұлдады

«QazIndustry» Қазақстандық индустрия және экспорт орталығы кәсіпорындардың шығындарының бір бөлігін өтеу шараларын жалғастыруда. Жыл басынан бері орталыққа еңбек өнімділігін арттыру және өнімді ілгерілетуге бағытталған шығындарды өтеу бойынша 58 өтінім түсті.

QazIndustry бизнесті ынталандыру дирекциясының мәліметінше, ағымдағы жылдың қаңтар айының қорытындысы бойынша кәсіпорындардың шығындарын өтеуге мақұлданған сома 63 млн 184 мың теңгені құрады. Өтінімдердің басым бөлігі еңбек өнімділігін арттыруға бағытталған мемлекеттік қолдау шараларымен байланысты.

Ұлттық қордағы қаржы бір айда 402 млрд теңгеге азайған

2024 жыл соңында Ұлттық қорда 33,06 трлн теңге болған. Биыл қаңтарда 32,65 трлн теңге қалды.

Өткен айда қорға 147 млрд теңге түсті. Бұл – мұнай секторы ұйымдарынан алынатын тікелей салықтар.

Сондай-ақ қордан 550,5 млрд теңге алынған. Оның 400 млрд теңгесі – кепілдендірілген трансферт болса, 150 млрд теңгесі – нысаналы трансферт.

Қорды басқару және жыл сайынғы сыртқы аудитті жүргізуге байланысты шығыстарды жабуға 595 млн теңге жұмсалған.

Қостанай облысында санавиация ұшағы апатты жағдайда қонды

Бүгін қатты боран кезінде Арқалықтағы әуежай маңында Қостанай – Арқалық бағытындағы АН-2 санитарлық авиация ұшағы шұғыл қонуға мәжбүр болды. Бұл туралы Төтенше жағдайлар министрлігі хабарлады.

Абырой болғанда әуе кемесінде болған екі ұшқыш пен екі дәрігер зардап шеккен жоқ. Құтқарушылар оларды Арқалыққа жеткізді.

Оқиғаның себептері анықталып жатыр.

Қыз алып қашқандарды 5 жылға дейін бас бостандығынан айыру ұсынылды

Депутат Мұрат Әбенов Қылмыстық кодекске осындай норма енгізу бастамасын көтерді. Қазір тиісті түзету жұмыс тобында қаралып жатыр.

«Әр түрлі жауапкершілік шаралары қарастырылып отыр. Олардың ішінде қылмыстық жауапкершілік те бар, атап айтқанда, 3 жылдан 5 жылға дейін бас бостандығынан айыру, айыппұл салу, қоғамдық жұмысқа тарту. Мұның бәрі де нақты жағдайға байланысты болады. Мәселен, қылмыс бір топ адаммен жасалса немесе кәмелетке толмаған адамға қатысты болса дегендей. Заң жәбірленушінің жағында болуы тиіс», - деді депутат Мәжіліс кулуарында.



Трамп Қазақстандағы Ұлттық қорға ұқсас қор құрмақшы

АҚШ президенті тиісті жарлыққа қол қойды. Тәуелсіз әл-ауқат қорын еліміздегі Ұлттық қордың аналогы деуге келеді. Ақ үй басшысының сөзінше, бұл қор келешекте TikTok-ты сатып алу үшін пайдаланылуы мүмкін.

«Біз бұл қорды алдағы 12 айдың ішінде құруды жоспарлап отырмыз. Бұл америкалық баланстың активтерін ел халқының игілігі үшін монетизациялау мақсатында жасалғалы отыр», - деді Трамп.

АҚШ президенті осындай мемлекеттік инвестициялық қор құру туралы ұсынысты осыған дейін де айтқан. Әзірге қордың қалай жұмыс істейтіндігі және қаражат қалай тартылатыны белгісіз. Сарапшылар оның тарифтер есебінен қаржыландыруы мүмкін екендігін де айтады.

Мемлекеттік қарыз 31 трлн теңгеден асты

Қаржы министрлігінің мәліметінше, 1 қаңтардағы жағдай бойынша Қазақстанның мемлекеттік борыш көлемі 31,8 трлн теңгеден асты. Негізгі бөлігі үкіметтік борыш болып есептеледі (30 трлн теңге). Оның ішінде 21,7 трлн теңге ішкі міндеттемелер, сыртқы – 8,3 трлн теңге. 

Еліміз Халықаралық қайта құру және даму банкіне 1,99 трлн теңге қарыз. Ал Азия даму банкінен 864,6 млрд теңге алған.

Тізімде Еуропа қайта құру және даму банкі (43 млрд теңге), Ислам даму банкі (31,3 млрд теңге), Азия инфрақұрылымдық инвестициялар банкі (459,2 млрд теңге), Қытайдың экспорттық-импорттық банкі (105,6 млрд теңге), шетелдік коммерциялық банктер (104,7 млрд теңге), Жапон халықаралық ынтымақтастық агенттігі (82,1 млрд теңге) де бар.

Ұлттық Банк жиналып қалған ескі үлгідегі доллардың мәселесін қалай шешіп жатыр?

- 2024 жылы Ұлттық Банк екінші деңгейлі банктерден сұранысқа ие емес ескі үлгідегі қолма-қол АҚШ долларларын шетелге шығару үшін сатып ала бастады.

- Ұлттық Банк АҚШ-тың Федералды резерв жүйесімен келісімге келді, бұл тасымалдау, сақтандыру шығындарын азайтуға мүмкіндік берді.

- Нәтижесінде, осындай операциялардың комиссиясы 0,3%-ке дейін төмендеді.

- Ұлттық Банк бұл жұмысты банктердің сұранысы бойынша жалғастыра береді.

Қытай Қазақстанға адамға ұқсас роботтар шығаруға көмектеседі

AgiBot компаниясы елімізде роботтар шығаруға және жасанды интеллект шешімдерін енгізуге септігін тигізбек. Осы мақсатта бірлескен кәсіпорын құру жоспарланып отыр.

Цифрлық даму министрлігінің хабарлауынша, AgiBot компаниясы 2023 жылдан бері адам тәрізді роботтарды өндірумен айналысады. 2024 жылдың желтоқсанында оның Шанхайдағы кәсіпорнында 1000 робот шығарылған.

Тазы иттерінің өз мерекесі пайда болады

Экология министрлігі мерекелік даталар тізіміне «Қазақы ит тұқымдарының күні» атауын енгізуді жоспарлап отыр.

2024 жылы 3 қыркүйекте Халықаралық кинологтар федерациясы Қазақстанды тазы ит тұқымының стандартын бекітуші ел ретінде тану туралы шешім қабылдаған.

Осыған орай, дәл осы күн «Қазақы ит тұқымдарының күні» болып белгіленеді.

Қаңтарда KASE-дегі бір тәуліктегі орташа сауда көлемі 227 млн АҚШ доллары болды. Жалпы сауда көлемі – 4,5 млрд АҚШ доллары.

Қаңтар айының қорытындысы бойынша теңге бағамы 1 АҚШ доллары үшін 518,2 теңгеге дейін 1,3%-ға нығайды, деп хабарлайды реттеушінің баспасөз қызметі.

Қазақстан қор биржасындағы сауда-саттықтың орташа күндік көлемі бір айда 254 млн АҚШ долларынан 227 млн АҚШ долларына дейін төмендеді. Сауда-саттықтың жалпы көлемі 4,5 млрд АҚШ долларын құрады.

"Қаңтар айында Ұлттық қордан 850 млн АҚШ долларына валюта сатылды. Бұл республикалық бюджетке трансферттер бөлуге, сондай-ақ «Талдықорған-Үшарал» магистральдық газ құбырын салуға бағытталған инфрақұрылымдық жобаны қаржыландыруға мүмкіндік берді", - делінген хабарламада.


Ұлттық қордан сату үлесі жалпы сауда-саттық көлемінің 19%-ын немесе күніне шамамен 43 млн АҚШ долларын құрады. Ұлттық Банк Ұлттық қордың қаражатымен операциялар жүргізу кезінде нарықтық бейтарап қағидатын сақтайды. Бұл шетел валютасын ұдайы және біркелкі сатуды білдіреді.

Ұлттық Банк Үкіметтің алдын ала болжамды өтінімдері бойынша республикалық бюджетке трансферт бөлуге ақпанда Ұлттық қордан 550 млн АҚШ долларынан 650 млн АҚШ долларына дейінгі мөлшерде валюта сатылады деп күтеді.

Ұлттық Банк қаңтарда зейнетақы активтерінің инвестициялық портфеліне АҚШ долларын сатып алған жоқ. Ақпанда БЖЗҚ-ға валюта сатып алу жоспарланбайды.

"Қаңтар айында Ұлттық Банк отандық алтын өндіруші кәсіпорындардан бұрын сатып алынған алтынды сатудан түскен АҚШ долларын ішкі валюта нарығында сату көзделетін теңестіру тетігін ендіруге шешім қабылдады. Осы шешім аясында қаңтарда 244 млрд теңге азайтылды. Ақпанда осы мақсатта баламасында шамамен 250 млрд теңге көлемінде валюта сату күтіледі", - деп хабарлады Ұлттық банк.

Ұлттық Банк транспаренттілік қағидаты аясында валюта нарығында жүргізілетін операциялар туралы толық ақпаратты ашып көрсетуді жалғастырады. Қысқамерзімді перспективада теңгенің динамикасы нарыққа қатысушылардың күтулеріне, тоқсандық салық төлемдеріне, әлемдік нарықтардағы ахуалға және геосаяси жағдайдың өзгеруіне байланысты болады. Ұлттық Банк теңгерімсіздіктің жинақталуын болдырмайтын және алтын-валюта резервтерінің сақталуын қамтамасыз ететін икемді бағам белгілеу режимін ұстана береді.