Локализаторлар алдап соқты. Меган Фокс түскен "Меган: К вашим услугам" фильмі әлгі — 2022 жылғы "M3GAN" картинасының жалғасы деп жүрмін ғой мен. Сөйтсем дубляж шеберлері екеуіне бірдей орысша атау беріп, сюжеті ұқсас болған соң прокатқа солай "ұрып" жіберіпті.
Біріншінің түпнұсқа атауы — M3GAN, екіншісі — Subservience (Бағыну). Ортақ тұстары — жасанды интеллектісі бар көмекші-роботтар, солармен қарым-қатынас және роботтардың бұйрықтар мен адами дүниетанымды өзінше қабылдауы.
Алайда көтерген мәселесінде айырмашылық бар. Бірінші фильм қуалап жүріп өлтіретін таза хоррор болса, екіншісі кішкене адамзат келешегіне үңіліп, нейрожелілер әкелуі мүмкін проблемаларға тоқталады.