Бахытқа баслаўшы Конституциям.

Шашып арамызға тенликтиң нурын,
Сен көгерттиң әдалатлық  урығын,
Қумай қусы қонған бахыт туғырым,
Ар-намыс, ығбалым Конституциям.

Халқым әрман еткен жақтым  да өзин,
Ҳақыйқат, әдалат тахтым да өзиң ,
Гимн, герб, байрақ -бахтым  да өзиң ,
Миллеттин намысы - Конституциям.

Қашан теңлик болар дейип бабамлар,
Талай тар жол тайғак кешкен заманлар,
Ерназар бий, Аллаярдай атамлар,
Әрман еткен сени Конституциям.

Сенде азатлықтын дәўранлары бар,
Халкымның муҳаддес әрманлары бар,
Ығбал инам еткен жаўланлары бар,
Бахытқа баслаўшы - Конституциям.

Нәўпир суўға толы Әмиў жағысы,
Мың  болар дийханның гүзги табысы,
Кәмил инсан-миллеттин ар-намысы,
Кызғыштай қорғайсан Конституциям.

Миллий сазым, әдебият арым бар,
Опера, балетим ,қолда тарым бар,
Ана тил ишинде шыбын жаным бар,
Қорғаны, қалқаны Конституциям.

Көз қуўантар аўыл-қала аймағым,
Бийғәрез бостанда гүл-гүл жайнадым,
Байрамлар ишинде гултаж байрамым,
Ығбал шамшырағым - Конституциям.

  Гүлистан Даўлетова.

#Konstituciya_kúnine
https://t.me/korgizbequrallar