Marfuga Shapian


Kanal geosi va tili: Qozog‘iston, Qozoqcha
Toifa: Bloglar



Kanal geosi va tili
Qozog‘iston, Qozoqcha
Toifa
Bloglar
Statistika
Postlar filtri














Ризығыңызды жақындатқыңыз келсе, мына амалды жасаңыз // Ризық // Иман//Марфуға ШАПИЯН
https://youtu.be/WvUKflF1LWk




“Шай ішейік” подкасты. Марфуға Шапиян мен Назерке Ермекқызының әңгімесі. Орамал шешу, психология тренды, дінді өмірде қолдану, денсаулық туралы.


Ардақты ананы қадірлеймін. Ары бар азаматты ардақтаймын. Талабы бар жасты құрметтеймін. Маңғазсыған ағаны ұнатпаймын. Көзге мақтап көлгірситін ініні жек көремін. Шын дос сыртыңнан мақтайды. Сайқал ғана бетіңе қарап қылмыңдайды. Әйелдің сайқалы бірді ғана арбайды, әдебиет сайқалының мыңға зияны тиеді.

© Бауыржан МОМЫШҰЛЫ
“АҚИҚАТ ПЕН АҢЫЗ” кітабынан


«МЕН БІР ЖОЛЫ БОЛМАҒАН АДАММЫН»

Бұл сөзді 1982-1988 жылдар аралығында Американың ең бай адамы атанған, Walmart дүкендер желісін құрған Сэм Уолтон өмірден өтерінің алдында айтыпты. Ол балалары мен немерелерін дұрыс танымайтынына, жақындарына дұрыс көңіл бөле алмағанына, олармен жылы қарым-қатынас құра алмағанына өкінген деседі.

Соңғы кездері мені де осы мәселе қатты ойландырып жүр. Біз уақытымызды, энергиямызды көбірек жұмыс істеуге, көбірек ақша табуға, көбірек өз-өзімізді жетілдіруге, көбірек білім алуға, жеке дамуға жұмсайды екенбіз. Бірақ жақын адамдарымызға келгенде уақытымыз бен энергиямызды аяймыз. Ақиқатында біз үшін маңыздысы жақындарымыз емес пе?

Ислам діні де ата-анаңа жақсылық жасауға, олардың қажетін өтеуге, отбасыңа дұрыс қарауға, туған-туыстарыңмен жақын араласуға шақырады. Қазақтың салт-дәстүрі де ата-енемен бірге тұруға, үйіңнен қонақ үзілмей, туған-туыс келіп, арқа-жарқа болып жатуға үндейді.

Бірақ қазір психологияда сәнге айналған жеке шекара, өз уақытым, өз пікірім, өз қалауым, өзіңмен бақытты бол деген дүниелер бізді жалғыздыққа итермелеп жатқандай көрінеді. Ал жалғыз адамды жеңу оңай, сындыра салу түк емес. Жалғыз адам депрессияға бейім келеді. Түбінде жалғыз қалғым келмейді, жалғыз бақытты болғым келмейді...

Мүмкін мені жерден алып жерге саларсыздар, мүмкін мен ескіліктің адамы шығармын, алайда қазіргі психологияда менің көңіліме қонбайтын дүние өте көп. Ол қағидамен өмір сүргім келмейді. Маған Батыстың өркениетінен гөрі ата-бабамның жолы әлдеқайда жақын.

Мен үшін қоғамды мойындатуға талпыну, жарысу, жақсы өмірге толассыз ұмтыла беру, көп, одан да көбірек ақша табуға тырысу, өзіңді дамыту, бұрынғыдан да көбірек оқу, тағы бір оқуға түсіп алу немесе кешке дейін тәніммен, сұлулығыммен алысу... секілді дүниелер құндылық болғанын қаламаймын.

Басты құндылығым АДАМ болса деймін. Отбасым, күйеуім, балаларым, әке-шешелеріміз, ағайын-туғандарымыз, достарымыз, халқымыз, сосын барша адамзат... Сіз қазір «мен үшін онсыз да сол нәрселер құнды» деуіңіз мүмкін. Бірақ сіз уақытыңыз бен энергияңызды көбірек қайда арнап жатсыз? Сол нәрсе сіз үшін құндырақ екенін ұмытпаңыз.


Тау халқының қайсар ұлы Қажымұрат туралы повесть жазу идеясы Толстойға ойда-жоқта келеді. Айналаны аралап жүріп, ошағанға көзі түседі. Арада бір ай өткенде сол ошағанның әлі тырмысып өсіп тұрғанын байқайды да, ерекше сүйсініп кетеді. Бұл өсімдік оның есіне кезінде атына қанық болған Қажымұратты түсірген еді.

Толстойдың өзі де 23 жасында Кавказда соғыста болған. Сол кезде Қажымұраттың есімін аз естімеген. Осының бәрі әсер етіп, жазушы повестке кірісіп кетеді. Алайда ұзақ зерттейді. Ғалымдар Толстой бұл кітапты жазу үшін 5000 бетке жуық құжаттар мен мұрағат материалдарын оқыды дейді.

Толстой «Қажымұратты» 20 шақты рет қайта өңдеген, Николай патшаға қатысты тұсын кейінірек қосқан. Бірақ сонда да көңілі толмай, «көзімнің тірі кезінде бұл повесть жарық көрмейді» деп жауып тастапты.

Повесть алғаш 1912 жылы жазушы өмірден озған соң 2 жылдан кейін жарық көреді. Онда да орыстарға, патшаға қарсы айтылған тұстары цензураға ұшырап, қысқарып шығады. Толық нұсқасы 1917 жылы жарияланады. Көзі тірісінде өз көңілі толмаған «Қажымұратты» кейінгі әдебиетшілер жоғары бағалады. Бұл туындысында жазушы суреткерліктің шыңына жетті деді.

Л.Толстой «Қажымұратта» Ресей мен Кавказдағы тау халықтарының күрделі саяси қарым-қатынасын суреттейді. Ресей империясының отарлау саясатының құрбаны болған тау халқының Шәміл мен Қажымұрат атты қайсар ұлдарының ерлігін баяндайды. Екі батырды бір-біріне қарсы қою арқылы өлім құштырған орыстың сайқал саясатын сипаттайды. Маған Шәміл мен Қажымұрат өзіміздің Кенесары мен Ағыбайдай елестеді. Олардың әр сәтсіздігіне жүрегім езілді.

Неге екенін маған жазушының өзі орыс болса да, Қажымұратқа бүйрегі бұрып тұрғандай көрінді. Повесте оның ерлігін, батырлығын айтып, орыс генералдары мен офицерлері таңғалып жатады. Намазын қаза етпейтін, әйелдерге қарауды ұят көретін намысшыл Қажымұрат. Ал орыс әскерінің Кавказ ауылдарына істеген жауыздығын айуандыққа балайды, Николай патшаны дұғасын оқи сала жалаңаш әйелдерді көруге баратын арсыз кейіпте суреттейді.

Мәселен, «Қажымұратта» бас кейіпкер Кавказдағы соғысқа басшылық еткен майордың үйінде бір апта тұрады. Оны бақылап жүрген орыс офицерлері Қажымұратты «өте сұм адам екен» дейді. Сонда Петровтың әйелі «Аллам осындай сұм деген адамдарыңды орыстардан көп жаратса етті. Ол -ізетті, ақылды, әділ адам» дейтін жері бар. Міне, адамның адамға, адалдыққа деген құрметін жазушы осылай көрсетеді. Толстой маған орыс ұлтының өзге ұлттарға істеп жатқан қысастығынан жиіркенгендей көрінді.

«Қажымұрат» - Толстойдың соңғы жазған ірі туындыларының бірі. Сондықтан бұл повестен жазушының шынайы көзқарасы, ұстанымын байқауға болады деп ойлаймын.

Ал сіз «Қажымұратты» оқыдыңыз ба? Қандай әсер қалдырып еді?


Қайырлы күн, достар! Менен қандай тақырыпта ақпараттар күтетіндіктеріңізге байланысты қойған сұрағыма:

1. КІТАП
2. ИСЛАМ
3. ТАРИХИ ТҰЛҒАЛАР

Осы үш тақырып топ жарып тұр екен. Одан бөлек жеке даму, әйел табиғаты, бала тәрбиесі, кітап жазу, салауатты өмір салты деген секілді тақырыптарды қозғасаңыз дегендер жетерлік. Әрине, өзімнің де негізгі тақырыбым осылар болғаннан кейін барынша пайдалы ақпарат беруге тырысамын.

Кітапқа келсек... Кітаптың адамға пайдасы ұшан-теңіз екенін білсек те, араларыңызда әлі бастай алмай жүргендер, неден бастасам дейтіндер баршылық.

Сіздерге айтар кеңесім, белгілі бір кітапты таңдағаннан кейін «Бүгін осынша бет оқимын» деп парақтарын әр күнге бөліп тастаңыздар. Сосын күнде сол белгілеген мөлшерді оқып отыруға тырысыңыздар. Бүгін оқи алмай қалсаңыз, ертең қосып оқыңыз. Бірақ қалай да сол күнгі норманы орындауға барыңызды салыңыз. Сонда ғана оқуыңыз нәтижелі болмақ.

Ал кітапты әр адам өз қажеттілігіне сай таңдауы қажет. Мысалы, аяғыңыз ауыр болса немесе тұрмыс құрып жатсаңыз «Ана болуға дайындық» кітабын, бала тәрбиесі толғандырса «Тұлға тәрбиелегіңіз келсе» кітабын, иманыңызды қуаттағыңыз келсе, «Тұлғалар өміріндегі Ислам» кітабын, жеке дамуды мақсат тұтсаңыз «Кемел адам» кітабын дегендей бұл тізім кете береді.

Барлығымыз бірдей кітап оқуға міндет емеспіз. Мен оқыған кітап сізге қажет болмауы мүмкін. Сондықтан сұранысыңызға сай өз кітабыңызды таңдаңыз да, оқыңыз. Кітап секілді мықты ұстазды осы уақытқа дейін кездестірген емеспін. Кітап оқыған адам ешқашан ұтылмайды.

Ал менің мақсатым – сіздердің естеріңізге кітап оқуды салып тұру, кітап оқуға ынталандыру, кітап оқуды сүюге шақыру, кітап сыйлау әдебін қалыптастыру, қажетіңізге сай кітап таңдауға көмектесу.

2022 жылдың аяқталуына бар болғаны 20 апта ғана қалыпты. Оның бір аптасы басталып та кетті. Осы жылым нәтижелі болсын деп, өзіме #аптасына1кітап челленжін жариялап, дәл бүгіннен жыл соңына дейін 20 кітап оқуға бел буып отырмын. Сіздер де «Айына 1 кітап» десеңіздер де, өз мақсаттарыңызды қойып, менің қатарыма қосылыңыздаршы 

Осы аптада екі кітапты қатар оқымақпын. Біріншісі, осыдан 3-4 ай бұрын қызығып сатып алған Шон Байтеллдың «Дневник книготорговца» кітабы. Көркем әдебиетті жаным сүйеді.

Ал екіншісі, Мағжан Жұмабайұлының «Педагогикасы». Бала тәрбиесіне қатысты Алаш арысының не жазғаны қатты қызық боп тұр. Қайсысы оң жамбасыма келеді, соны оқи беремін. Бірақ апта соңына дейін бірінші кітапты бітіруім керек.

Мақсат – айқын! Ендеше, сіздерге де, өзіме де сәттілік тілеймін!


Он шақты қыздан құралған «Алтын сандық» атты тобымыз бар. Мүдде бір, құндылықтар бір. Айына бір кездесіп, түрлі ойларды талқылаймыз. Өзімізді толғандырып жүрген мәселелерді бөлісеміз. Әрі бір жерде «гәп», енді бір жерде «черная касса» деп аталатын ойынды ойнап, ақшалы боп қаламыз ☺️

Кеше ұйымдастыру менің кезегім-тұғын. Қыздарыма соңғы кезде қатты ойлантып жүрген бірер мәселені ортаға салдым. Соны сіздермен де бөлісе кетейін:

1. ҚАЗАҚ ТІЛІ МӘСЕЛЕСІ. Білемін, жан-жақтан көптеп айтылып жатыр. Бірақ мен одан да көп айтылуы тиіс деп есептеймін. Барлық адам әдеби қазақ тілінде сөйлеуі міндет емес. Бірақ біздің қарым-қатынас тіліміз – қазақ тілі болуы қажет. Яғни өзара сөйлескенде, дүкенде, кафеде, әуежайда, ЦОН-да, барлық жерде қазақша сөйлейікші. Тілімізді бұрап-бұрап болған шығармыз? Өзгеге еліктеп біткен шығармыз?! Басқыншы ұлттың тілін қашанғы дәріптей береміз?

2. ТЕК ОТАНДЫҚ ӨНІМ ҚОЛДАНУ. Шыны керек, бұрын Магнумда жүргенде Төрем күріш алсақ та, кеспе алсақ та, артын оқып, себеттегі затымды отандық өнімге ауыстырып қоя берсе, «анау дәмді, мынау дәмді емес» деп, ренжитін ем. Қазір ботқа болса да, Қазақстаннан шыққан күрішті ғана жеймін деп бекініп отырмын. Супермаркеттеріміз толған Ресей, Белорусь тауары. Алмайықшы. Іздесек, табамыз ғой. Тек өз отандық өнімімізді жейік. Кезінде Махатма Гандидің Үндістаннан ағылшындарды қандай тәсілмен «қуып» шыққаны естеріңізде ме? Ағылшынның бір өнімін қолданбай, ең аяғы тұзды да теңізден өздері алып, жіп иіріп, сол киімді киіп, ақыры ағылшын кәсіпкерлерінің бизнесі жүрмей, Үндістаннан өздері қашып кеткен еді ғой. Кейін есесіне Үндістан тәуелсіздік алды. Біз де сөйтейік. Өзіміз алмасақ, олар да заттарын әкелмейді. Өз ақшамыз өзімізде қалсын.

3. ТЕК ҚАЗАҚ АШҚАН КАФЕГЕ, ҚАЗАҚ АШҚАН ДЕМАЛЫС ОРЫНДАРЫНА БАРУ. Көрші елде соғыс басталғаннан кейін Ресей бизнесмендерінің Қазақстанға көптеп көшіп келіп жатқанын естіп отырмыз. Біздің орыстілді екенімізді, кез келген нәрсеге жалп ете түсетінімізді біліп отыр ғой, қулар. Оларды емес, қазақтың кәсібін жүргізейік. Қазақ байысын. Барып жүрген кафе-мейрамханаларымызды зерттейік. Құрбыларым «Старбакстан кофе ішпей жүрмін, қанша сервис ақсаса да, қазақ ашқан кофеханаға барамын» дегендеріне қуанып жүрмін. Міне, ұлттық намыс. Кішкентай қадамдардан бастайықшы, бұйыртса өзгеріс болады.

4. ҚАЗАҚША КІТАП ОҚУ. Кітап саласында жүргеннен кейін бұл тақырыпты да айналып өткім келмей тұр. Меломанның жағдайын білесіздер. Самсаған орысша кітаптар. Қазақша кітаптар бір бұрышта ғана, жетімсіреп тұр. Қазір әлемдік бестселлерлер Steppe & World, Mazmundama, Foliant баспаларынан қазақшаға аударылып жатыр ғой. Орысшаға аударылғанын оқығанша, қазақшасын оқыңыздаршы. Мүмкін, кейде аударма сапасы сәтсіз болар. Бірақ сіздер қолдарыңыздар, бұйыртса ақырын сапаға да өтеміз ғой.

Сонымен не керек, қыздарға осы ойларымды ортаға салып айтып ем, бәрі қолдады. Өзімізге 1 айлық челлендж жарияладық. Тек қазақша сөйлейміз, тек отандық өнім қолданамыз деп. Сосын осыны насихаттаймыз. Сіздер де бізге қосылыңыздар 🤗.

Өзіңіз қолданатын қазақтың қандай жақсы өнімін, кафе-мейрамханасын білесіздер, бөлісіңіздер. Өзімізге қажет Қазақстанды бірге жасайық)













20 ta oxirgi post ko‘rsatilgan.