Елорда әуежайында ішкі рейстер терминалының 20 жыл толуына, сондай-ақ әуежайдың 93 жылдығына арналған салтанатты шара өтті. Мерекелік шараға терминал құрылысына елеулі үлес қосқан сәулетшілер, авиация ардагерлері, елорда әуежайының серіктестері және отандық авиакомпаниялардың өкілдері қатысты.

Шара барысында авиация ардагерлеріне, әуежай серіктестеріне, сондай-ақ Астана халықаралық әуежайында 20 жылдан астам еңбек етіп келе жатқан қызметкерлерге алғыс хаттар мен сыйлықтар табыс етілді. Құрметті қонақтарға Air Astana, Qazaq Air, Fly Arystan және SCAT авиакомпаниялары өз аттарынан ерекше ықылас білдіріп, сыйлықтар табыс етті.

Біз барлық серіктестеріміз бен қызметкерлерімізге әуежайды дамытуға қосқан үлестері үшін алғыс айта отырып, одан әрі табысты ынтымақтастыққа сенім білдіреміз! Елорда әуежайының 93-жылдығы құтты болсын!