Педиатр Нур Олимовна

​​Oilaviy sayohat, hattoki sayr ham bolaga jismoniy va ruhiy quvvat beradi.

Atrofga boqing, bahor o'lkamizga go'zallik olib keldi, yashil dalalar, lolalar, gullagan daraxtlar, qanday ajoyib!

Shaharda ham qishloqda ham bir etak bolalari bilan oilalar yashaydi, ular hayotning tashvishlariga, mayda muammolar qurshovidadir, bolalar esa doimo hamma jam bo'ladigan oqshomni intiq kutadilar, ular ota-onalari bilan ko'proq birga bo'lishni xohlaydilar.

Ayniqsa iftorlik vaqtida chaqaloqlar ham xursand. Shu baxtli onlar bolalarda ijobiy kayfiyat tufayli immun tizimni kuchayishiga sabab bo'ladi.

Oila bilan kichik sayohatlar, sayrlar tashkil qilinsa, nafaqat bolalarda , balki ota-ona, buvi-bobolarda ham ijobiy kayfiyat paydo bo'ladi.
Allohning yaratgan go'zalliklaridan bahramand bo'lish, toza tog' havosidan simirib rohatlanish qanday ajoyib.

Aziz onalar bolalarni tez-tez sayrga olib chiqing, hatto xaridlarga borganda ham hamroh qiling, bolangiz irodali, mehribon, teran fikrli bo'lib o'sadi.

Pediatr Nur Olimovna

​​Bolalarning kamoli - oila tinch totuvligiga bog'liq


Assalomu alaykum!

Yaqinda bir tanishim farzandlaridan quvonib shukur qildi. Uning aytishicha, barcha o'g'il-qizlari muammosiz o'z hayot yo'llarini oson topishgan va uvali-juvali bo'lib yashashmoqda ekan.

O'zingizga ma'lum bolalarni voyaga yetkazib, to'ylar qilasiz, lekin ularning oilalari tinch yashab ketishidan ko'ra turli xil mojarolari ota-onani tashvishga soladi. Tanishimning aytishicha o'g'li ham, qizi ham oila qurishda omadli bo'lib tinch va ahil yashashmoqda ekan.

Albatta, bunday bo'lishi aniq edi, chunki o'sha tanishim turmush o'rtog'i bilan tinch va totuv yashashgan, bir-birini ardoqlagan insonlar edi. Oilada hamma narsa bo'lishi mumkin, ayniqsa erkaklar jahlini jilovlay olmasligi yoki ayollar yengil xulosa chiqarishi oqibatida turli janjallar bo'lib turadi, bu janjallarga atrofdagi boshqa insonlar "moy" sepishadi.

Har qanday holda ham bolalar aziyat chekadi, chunki ular otani ham onani ham yaxshi odamlar ekanligini his qilib mag'rurlanishadi. Janjalli oilalarda o'sgan bolalar asabiy, qaysar, uyqusiz yoki tez-tez turli kasalliklar bilan og'rib turishadi. Ular ulg'aygach bu zarbalar ularning oilaviy munosabatlariga ta'sir qiladi.

Azizlar janjal bo'lish arafasida bolalardan uyaling, kelajakda ularning oilasi ham shunday bo'lishi mumkinligini tafakkur qiling.

Sukut yoki tabassum (hatto yasama bo'lsa ham) sizni bu holatdan chiqishga yordam beradi.

Ramazon arafasida ahd qiling: Hech qachon, har qanday holatda ham ovoz avjini ko'tarmaslikka so'z bering.

Hurmat bilan,
Pediatr Nur Olimovna

Toza havoda sayr

Onalar doimo qachondan sayr qildirish kerak deb o'ylashadi. Chaqaloqlarni hayotining 3-4 haftasidan shamolsiz, -5Cdan past bo'lmagan havoga olib chiqish mumkin.

Yozda tug'ilgan bolalarni o'ninchi kundan boshlab toza havoda sayr qildiriladi.2-3 oydan boshlab bolani 2 mahal 20-30 minutdan sayr qildirish kerak.

Yozda bu muddat 45-60 minut bo'lishi mumkin.
3-6 oydan 2-3 soat aylantirish mumkin.Yozda daraxt tagida ola ko'lanka quyosh tushib turganda, 22C° havo haroratida sayr qildirish juda foydali, chunki vitamin D ultrabinafsha nurlarda bo'ladi.

Bu "quyosh vannasi" deb atalib 6 oygacha 10-15 minut, 6 oydan keyin 20-30 minutdan sayr qildirish foydalidir. Hozir kunlar ancha ilib qoldi, lekin bahorgi quyoshda sayr qildirganda o'tkir nur tushishdan saqlash kerak, aravachada uhlatib qo'yish ham juda foydali.

Sayr qildirishning foydasini bolaning immuniteti mustahkamligi bilan izohlash mumkin.

Pediatr Nur Olimovna

​​Assalomu alaykum qadrli obunachilar!

Bolalarning jismoniy rivoji uchun bir qancha o'yinlar bor. Afsuski bolalar bu o'yinlarni unutib ulgurishgan. Sabab, yana virtual olam...

O'zingizning yoshligingizni eslang, yugurib charchamas edingiz, o'yin desa, hatto derazadan sakrab bo'lsa ham ko'chaga qochar edingiz.

Nega endi buni bolalaringizga o'rgatmaysiz? Hozir ayni varrak uchirish vaqti, nega shahar tashqarisiga ataylab varrak uchirish uchun bormaysiz?
To'p bilan o'ynaydigan o'yinlar juda qiziq to'g'rimi? To'p bilan o'ynaladigan quvlashmachoq, bekinmachoq , "Otildi quyon",
"G'ozlar" o'yinini bolalaringizga o'rgatish kerakligini hech o'yladingizmi?

"G'ozlar" o'yinini birga o'ynab ko'ring. Siz ona g'oz bo'lasiz, kattaroq bolalar "bo'rilar" bo'ladilar, kichikroq bolalar g'ozning bolalari bo'ladi.

Ona g'oz: "G'ozlarim, g'ozlarim!"-, deydi.


G'oz bolalalari: "Biz shu yerdamiz "deydi, ona g'oz esa "Kelinglar, yo'lda bo'rilardan ehtiyot bo'linglar" deydi.

Bolalar onalari tomon yugurishadi, bo'riga ushlanmagan bola onasini quchoqlaydi.

Bola onasini quchoqlash uchun ham epchil bo'lishga urinadi.
Ajoyib o'yin, to'g'rimi?
Bolaning ruhiy va jismoniy rivoji uchun juda foydali.
Balki bu maslahat sizga bir oz erish tuyular, lekin foydali ekanligini o'z tajribamdan bilaman deb,

Pediatr Nur Olimovna

​​Ayol muqaddasdir.

Assalomu alaykum qadrli obunachi onaxonlar, opa-singillar!

Onalar haqida gaplashamiz bugun...

Azizam, Siz muqaddas ekaningizni bilasizmi? Qon berib, jon berib zuriyodini vujudida katta qilayotgan aziz mehribonlar, tunlari bedor bo'lib , kunduzlari andarmon bolayotgan jonkuyar singiljonlar, farzandlarining kamolini ko'rib quvonayotgan, duolar qilayotgan onajonlar!

Siz duo qilsangiz ijobat bo'ladi, Alloh gunohlardan forig' qiladi sizni...
Tongni sevib qarshilang, kun sizga ne'matlari, quvonchlari bilan siz uchun doimo tayor, sizdan jannat hidi kelishini bilasizmi?

Azizam, bilasizmi siz shunchalik
yuksakdasizki, farishtalar sizni doimo qo'riqlab yuradi, yomonliklardan, shayton vasvasalaridan zirxli qo'rg'on bilan muhofaza qiladi.

Siz yaxshi insonlarni, sog'lom baquvvat o'g'il -qizlarni tarbiyalovchi insonlarsiz, demak siz ham yaxshi insonlarsiz!

Siz ilohiy ro'yo qurshovidaligingizni bilishingiz kifoya, shunday ekan, qarshingizdagi barcha muammolarga beparvo bo'ling.
Ko'zingizdan tomchi yosh oqishiga yo'l qo'ymang, mag'rur bo'ling, siz Allohning omonatini yurak ostida, bag'rida, duolari bilan saqlayotgan muslimalarsiz, demak sizlar muqaddassiz!

Sizlarni kelayotgan bayram bilan muborakbod qilaman, Hazrati Inson tarbiyasi borasida ulkan zafarlar tilayman.

Hurmat bilan,

Pediatr Nur Olimovna

Bolada shish paydo bo'lsa...

Bola tug'ilishi bilan yoki keyinchalik paydo bo'lgan shishlarni shifokor yoki ona tasodifan bilib qoladi. Bunday shishlar terida, boshda, qorin bo'shlig'ida, umurtqa ustida, dumg'azada, bo'yin sohasida bo'lishi va turli kattalikda, turli rangda va turli konsistensiyada bo'lishi mumkin.

Onalar bunday paytda turli xil muolajalarga urinishadi. Massaj qilish, spirt bog'lash, tabibga borish umuman mumkin emas, chunki bu xavfli va xavfsiz o'smalar bo'lishi mumkin.

Bolalarda, asosan, chaqaloqlarda tug'ma o'smalar bo'ladi va ko'pincha yaxshi sifatli bo'ladi, lekin yomon sifatli o'smalar bolaning tez-tez kasal bo'lishi, sababsiz isitma chiqishi, ishtaxasizlik bilan kechadi.

Ba'zan shish kattalashadi va rangi qizaradi (gemangioma). Ba'zan u qorin bo'shlig'ida va o'pkada bo'ladi va boshqa organlarga metastaz beradi.
Miyada, ko'zda joylashgan o'smalar qachonki asorat berganda aniqlanadi ( talvasalar, ko'rishning buzilishi).

Suyaklarda paydo bo'lgan o'smalar asosan raxit tashxisi asosida aniqlanishi kechikadi.

Shuni ta'kidlash kerakki, bolalarda yomon sifatli o'smalar asosan o'smir yoshdan boshlanar edi, afsuski keyingi vaqtda olimlar ancha kichik bolalarda ham o'smalar uchrayotganini ta'kudlamoqdalar.

Aziz ota-onalar, tez-tez shamollaydigan, sababsiz ozib ketayotgan va ishtaxasi o'ta kam bolalarni UTT, miya tekshiruvi, oftalmoskopiya va albatta leykogrammaga tekshirtirishni maslahat beraman. Agar juda kichkina shish paydo bo'lsa ham bolalar onkologi maslahatiga borib qo'ysangiz siz katta oqibatlarning oldini olgan bo'lasiz.

Hurmat bilan,

Pediatr Nur Olimovna

​​Qabziyat va telefon

Assalomu alaykum qadrli obunachilar!

Hozirgi vaqtda telefon o'yinlariga mukkasidan ketish va soatlab bekorchi yozishmalarga vaqt ketkazish tufayli talaygina muammolar kelib chiqishi tabiiy.

Ayniqsa, bolalar orasidagi muammolarni aytishdan va ogohlantirishdan hech qachon to'xtamayman.

Kuni kecha qabulimga bir bolani olib kelishdi, 12-13 yoshli o'smir bola. Rangi oqargan, qorinda paydo bo'lgan kuchli sanchiq tufayli yurish tugul nafas olishga ham qiynalyapti.

Shifokorlar birgalikda ko'rib, unda shoshilinch holat topmadik. Ammo o'smirni so'roqqa tutganimizda 5 kundan beri ichi kelmaganini aytdi.

Muolajalardan so'ng bolaning ichi keldi, axlat massalari qoraygan va tosh kabi edi.
Onasi bilan suhbatlashganda bola bir kun davomida 6-7 soat, ba'zan undan ko'p vaqtini turli telefon o'yinlariga sarflashi ma'lum bo'ldi.

Telefon o'yinlarining shunday turlari borki, to'xtatish qiyin va uzluksiz davom etadi. Bolalar hojatga chaqiruv signalini ataylab qaytaradilar va kam harakatlik tufayli qabziyat yanada kuchayib ketadi.

Tosh kabi va tikanli bo'lib to'plangan axlat massalaridagi zaharlar yana qonga so'riladi va hatto ichaklarni teshib yuborishi, turli gemorroidal tugunlar paydo bo'lishiga olib keladi.

Siydik chiqarishni kechiktirish esa turli buyrak va siydik yo'llari kasalliklarni keltirib chiqaradi.
O'smirga uning holatini va bo'lishi mumkin bo'lgan asoratlarni rasmlar bilan tushuntirdik. Ajab emas nafi tegsa...

Qadrli obunachilar, o'smirlik davridagi bolalar o'zlaridagi muammolarni suhbatni o'zlari boshlab o'rtoqlashishni xohlamaydilar, ular bilan sizlar suhbatlashib turinglar va muammolaridan boxabar bo'linglar.

Hurmat bilan,
Pediatr Nur Olimovna

Bu post shaxsiy fikrlarga asoslangan.

Nega maqtanish kerak?

Assalomu alaykum aziz obunachilar.

Atrofda bo'layotgan ofatlar, urushlar, kasalliklar bizni tafakkurga, shukur qilishimizga, Yaratganni ko'proq esga olishimiz kerakligini anglatayotgandir balki...

Ijtimoiy tarmoqlarda turli rasmlar bilan o'zlarini ko'z-ko'z qilayotgan insonlarga ogoh bo'lishlarini maslahat bergan bo'lardim.

Farzandingizni go'zal kiyintirib, katta tort ustidagi shamni puflaganini jo'natganingizda qaysidir bir oiladagi xuddi sizdek onaning bolasiga olib berolmasligidan alam qilib yig'lashini o'ylab ko'ring...

Yoki hashamatli to'ylaringizni, sarpolaringizni jo'natayotganingizda qo'li yupqaligidan qizlarini uzata olmayotgan insonlarni o'ylang..

Eng daxshatlisi, siz oila dasturxoningizda pishirgan palovni rasmga olib tashlaganingizda oylab go'shtsiz taom yeydigan yon qo'shningizni o'ylang.

Mana, 18 yoshli qiziga ajoyib mashina sovg'a qilayotgan ota, ketma-ket kontraktda bola o'qitish uchun qarzdor bo'layotgan otalar ko'rsa nima bo'ladi, deb o'ylab ko'rishi kerak emasmikin?

Bundan o'n yil oldin ham nonni nazardan nari deb o'rab olib kelinar edi, hozirchi shaffof paketlarda en noyob bozorliklarni mahalladan uyalmay olib o'tmoqdalar, bilmaydilarki, ko'chada o'ynab yurgan bolalar xaltadagi yeguliklar haqida ota-onasini savolga tutishlari ehtimoldan yiroq emas...

Nega maqtanish kerak?
Ko'ngil ozor yesa, bilib-bilmay gunohga ega bo'lmayapmizmi?

Ijtimoiy tarmoqlarni ko'ngillarni yaralash maqsadida foydalanmasligingizni so'rardim...

Hurmat bilan,

Pediatr Nur Olimovna

​​Nega doimiy tishlar qiyshiq chiqadi?

Bolalarning tishlari 6 yoshdan tushib, o'rniga asta doimiy tishlar chiqa boshlaydi. Xuddi shu paytda bolaning tishlarini tish shifokoriga ko'rsatib turish ketak.

Chunki bir necha omillar tishning qiyshayishiga olib keladi.

1. Ovqatni chaynashdagi muammolar. Bolalarga oz-ozdan luqmani bir tomonda va ikkinchi tomonda navbat bilan uzoq muddat chaynashni o'rgatilishi kerak.

2. Xuddi shu vaqtda bolada o'sish intensivligi tufayli mineral moddalar kamayadi va tishlarning tekis chiqishiga to'sqinlik qiladi.

3. Bola qimirlab turgan tishlarini olib tashlamaslik yoki hali to'liq qimirlamagan tishni doim ushlash va sug'urishga urinish ham sabab bo'ladi.

4. Bola qo'lini so'rishi yoki so'rg'ich so'rishi.

5. Ota-onasining tishlari qiyshiq bo'lishi.

6. Bolaning jag' tuzilishi genetik noto'g'ri bo'lishi.

Qadri ota-onalar, bolaning tishlarini o'zboshimchalik bilan sug'urish mumkin emas, albatta tish shifokoriga olib borish kerak bo'ladi.

Tish chiqishidagi qiyshayishlar bo'lsa, uni korreksiya qilish yo'llarini topish uchun albatta tish shifokoriga murojaat qiling.

Darvoqe, bolalarga muntazam tish yuvish kerakligini, nega yuvish kerakligini o'rgating. Ularni tish yuvish jarayonlarini qiziq qiling yoki barchangiz birgalikda yuving.

Hurmat bilan,

Pediatr Nur Olimovna

​​Bolangizga bo'lgan munosabatingiz uning jamiyatdagi o'rniga ta'sir qiladi!

Assalomu alaykum qadrli ota onalar!

Bolangizni sevishingizga shubha yo'q, ammo, uni hurmat qilasizmi?

Alloh sizga ne'matni omonat qilib berdi, bolani yaratdi va sizni uning dunyoga kelishi uchun vositachi qildi. Unga go'zal ism qo'ydingiz , bu ismni qanday chaqiryapsiz?

"Yer yutgur Zebi!" (Zebuniso), yoki "Abdi" (Abdulloh), Jahon ( Jahongir), Madi ( Madinabonu), Tillo (Rahmatulloh), Ulug' ( Ulug'bek), ...

Esimda buvim rahmatli nabiralarining ismiga "xon, jon" qo'shib chaqirar, agar kimki ularning ismini shu qo'shimchalarsiz chaqirsa, hatto uyigacha borib dakki berib kelar edilar.

Keling tahlil qilaylik, siz buvi, bobo, ovsinlar bilan yashaysiz, bolangizni chaqaloqligidan sizlab ismini go'zal chaqirishni odat qilsangiz, bu bolaga qo'pol gapirishga hech kimning jur'ati yetmaydi, hatto boshqalar bolangizga qattiq muomala qilsa, noroziligingizni namoyish qilmasangiz ham ular bu muomala sizga yoqmayotganligini tushunib yetishadi.

Agar buni aksi bo'lsachi, qaynonangiz yoki turmush o'rtog'ingizga achchiq qilib, bolani hammaning oldida haqoratlab ismini ham xunuk qilib chaqirsangiz, hamma, hatto ko'chadagi begonalar ham ularni haqoratlaydi, yerga uradi va bolangiz bu muomalaga o'rganib ham qoladi, unda o'z qadrini baland tutish kabi tushunchasi o'tmaslashib boradi.

Endi o'ylab ko'ring, sizning zurriyotingiz shunday muomalaga loyiqmi?

Qizingizni Zulpi, o'g'lingizni Abdi deyishlarini xohlaysizmi?

Aziz ota-onalar, SHU BUGUNDAN bolalarni sizlab ismlarini go'zal talaffuz qiling, bu avvalo o'zingizni hurmat qilish uchun!

Pediatr Nur Olimovna

​​Tarbiya tanqiddan yiroq bo'lsa, natijasi yaxshi bo'ladi.                                                                                                      

Assalomu alaykum qadrli ota-onalar! Biz ko'pincha bolani tanqid qilish bilan yaxshi natijaga erishamiz, deb o'ylaymiz.

Lekin Payg'ambarimiz alayhissalom tutgan yo'llaridan o'rganadigan bo'lsak, naqadar buyuk ustoz ekanliklariga guvoh bo'lamiz:                                                                                                   Payg'ambarimiz alayhissalom bir kuni masjidga qarab ketayotganda, masjidda aytilayotgan azon ustidan kulayotgan bolalarni ko'rib qoldi. Bolalar Payg'ambar alayhissalomni ko'rishib jazo olishlarini o'ylab qo'rqib turishgan edi, qutlug' Nabiy azon ustidan kulgan bolaga qarab: " Qanday chiroyli ovozing bor" deydi.

Shunday ulug' zotning maqtoviga sazovor bo'lgan bola hayratdan lol qoldi, shunda Payg'ambar (s a.v) bolaning sochlarini siladi va unga qo'lini uzatib dedi: "Masjidda ham shunday chiroyli ovozing bilan azon aytasanmi?"

Bola Payg'ambar alayhissalomning qo'llaridan uyat va hayajon bilan ushlaydi va masjidga qarab yo'l oladi.
Mana shu mehr va sevgi ila munosabat bolaning umrini azonga va Qur'onga bag'ishlashiga sabab bo'ldi.

Inson o'ziga nisbatan qarab turgan mehrli ko'zlarning so'ziga albatta itoat qiladi va u hech qachon yomon odam bo'lmaydi.

Pediatr Nur Olimovna

​​Eng qadrli vaqt                                                                                                          Assalomu alaykum qadrli ota-onalar!

Farzand bilan ajoyib mehr rishtalarini paydo qiluvchi vaqt qachonligini bilasizmi? Bu vaqt - bolaning uyqudan turish va uyg'onish vaqti.
Afsuski, shu besh daqiqa tarbiyaning eng katta samara beruvchi vaqti ekanligini bilmaganimiz tufayli, boshqa vaqtlardagi berilgan mehr negadir o'z kuchini yo'qotgandek...                                                                                                                                                                                                           Bolani ertalab uyg'otishda va uyquga yotishda qanday chiroyli so'zlarni ishlatyapsiz? 
"Tur o'rningdan bog'chaga kech qolasan", "Hali ham uxlayapsanmi, dangasaga o'xshab, tur o'rningdan!"                                                            "Hozir uxlamasang adabingni beraman", "Uxla, qani tez, ko'zingni yum" kabi so'zlarni ishlatyapmizmi?

Yo'q, bunday bo'lishi kerak emas, keling boshidan boshlaymiz:                                                                                                     Ertalab: "Mening dunyodagi eng aqlli, eng ajoyib bolam uyqudan turdi, keling, sizni bag'rimga bosay, kechasi bilan sizni sog'inib ketdim, qaranglar bu bola bugun ancha ulg'ayib turibdi, uning qorni ajoyib nonushtani xohlayapti" deb 5 daqiqa orqalarini , boshini silab uyg'oting, agar onalarimiz band bo'lsa, dadalarimiz qilsa ham juda foydali bo'ladi.

Kechda: Bolaga albatta rasmlar bilan bezalgan kitoblar o'qib berishni odat qiling. Kitob bo'lishi muhim, chunki kitobni sevishga bo'lgan tarbiya aynan shundan boshlanadi . Bolaga turli ibratli hikoyalar, buyuk sahobalarimiz haqida aytib bering, uning savollariga erinmay javob bering, agar ikki yoki uch bolangiz bo'lsa barchasi bilan 5 daqiqa suhbatlashing va ularni yaxshi ko'rishingizni va dunyodagi eng baxtli ona ekanligingizni ta'kidlang.

Ularning yaxshi hislatlarini yana bir bor eslating va maqtang, yana bag'ringizga bosib xayrli tun tilang, ularga qisqa duolarni o'rgating va ularni aytib uxlash odat tusiga kirishiga harakat qiling.                       

Ho'sh, bugundan boshlaymizmi? Eng qadrli vaqtni o'tkazib yubormang!                                                                                             

Pediatr Nur Olimovna