БЛОКЧЕЙН vs SWIFT

Қазір блокчейн технологиясына қатысты стартаптар көбейіп кетті. Мұрт шығуға әлі үш жылы бар бозбала:
- Бұл жерде алаяқтық тіпті мүмкін емес! Біреудің біреуге жіберген ақшасын, не біреумен контрактын барлығы көріп отырады. Болашақ - блокчейнде! -дейді.

Осындайда кей салаларда баяғы «жас цензін» қалпына келтірген дұрыс па деп қаласың. Дәстүрлі алыс-берістен алыс, үйленбеген бала қазбауыр бұлттан жасап алған өз әлемінде қиял қуып жүр.

Біріншіден, інім, халықаралық кәдімгі SWIFT банкаралық жүйесі - тап сол блокчейнің сенің. Картаңда он мың теңге болса, сен сол картамен ешқашан жиырма мың теңгеге киініп кете алмайсың. Database-терде әлеуетіңнің барлығы жазылып тұр.

Ал енді жариялыққа келсек, ол технологиялық емес, саяси сұрақ. Сен алдымен, қанша адамның өз қалтасындағы ақшаның жұртқа жария болғанын қалайтынын сұра. Бір адам таба алсаң нетті. Егер қоғам кенет ізгіленіп кетіп, барлығы өз картасының күйін жариялауға келіссе, сол SWIFT-те жүзеге асыруға болады. Екі-ақ кликпен.

Науқаншылдыққа жастарды баулып жатқанымыз өкінішті. Ағайын, блокчейн - тек технология ғана. Ол саяси шешімсіз - тұл.