«ТУЫСҚАНДАРЫМНЫҢ ТОҒЫШАРЛЫҒЫ» /басы/
#schildburgers

«Мың бір түнде» ме, осындай бір әңгіме бар еді ғой. Комедия көргендей қайта-қайта оқитынмын.

Кейін өмірдің өзі-ақ комедияға тойдырады емес пе.

Бір танысым мұнай компаниясына жұмысқа тұрайын десе, «ең болмаса «заочно» оқуға түсіп кел, әйтпесе алты ай болмай зытырады мұнда» деген екен тілеулесі.

Сол, ауылдың ақкөңіл аңқылдақ қара жігіті. «Оқуы несі, не оқу ол, орамалды кімге берем, оқымай-ақ қойсам болмай ма?» дейді баяғы.

Содан, қаптаған колледждердің біріне «заочно» оқуға түсірдік жабылып. Еш қылмыс жоқ: оқу ақысын төлесең барлық жер қабылдай бермей ме осы. Мамандығы - «Эксплуатация нефтяных и газовых месторождений».

Қалай түсті - солай жұмысына тайып тұрды. Содан алғашқы семестр бітер алдында бір-ақ келді.

- Өй... жұмыстан шығарып жіберді...

- Не болды?

- Негізі шығармайтын еді... Өзімнің «дауылбайлығымнан» таптым...

- Қалайша?

- Оқымаған адамбыз ғой... Комиссия менің алдымдағы жігіттен «кімге оқып жатырсың?» деп сұрады. Ол: «Энергетика» факультетінде, энергетикке» деді...

- Ал сен?

- Енді мен... ұмытып қалғам ғой. Оқып жатқаным «эксплуатация...» деп басталатын болса, «эксплуататор» болам дедім.

- Ойбууу... Сосын саған не деді?

- Анау: «бізге плантаторлар керек емес, боссың!» деді де, өзі күлкіден домалай кетті... Айтшы, орысша жаман сөз бе не сонда, «эксплуататор» деген???...

Шымылдық...

«Аққа құдай жақ», уайымдамаңдар, қазір үбірлі-шүбірлі, үлкен үйдің отағасы...