ZAMAN LIVE

Армысыз, ағайын! 2023 жыл құтты болсын. «Құтты болсын» деген осы сөзді айтудың өзі ар-ұжданыма айтарлықтай жүк болып отыр. Қазақ тарихына қара дақ болып қалатын «Қаңтар қасіреті» былтыр ғана жүрегімізге ерімейтін мұз қалдырды. Көзге көрінбейтін «Жиырма мың» террориске бағытталған «ескертусіз оқ» жүздеген қарапайым қазақтың тағдырын жалмап, аман қалған Алаштың жазылмас жан жарасына айналды. Қазіргі билік қанша жасырып жапсада, жазықсыз шейіт болған, аяусыз тән қорлығын да, жан қорлығын да сезінген бейбіт жұрттың зар-запыранын еш қазақ ұмытпақ емес! Қаңтар қырғыны - Отыз жылдық опасыз жүйенің «тақ ауыстырар» кезеңде адам пендесін аямайтын жауыздығын тағы бір паш етті!
Үмітсіз – сайтан! Қанды кек қашанда иесін табады! Біз жастар қазақтың тәуелсіздіктен кейінгі тар маңдай тағдырын, билік тізгінін ұстаған аз ғана топтың түпсіз құлқынын өз көзімізбен көріп келеміз, сезіп келеміз, төзіп келеміз! Сол үшінде қол қусырып қарап отырмай, қал-қадерімізше қарекет жасаудамыз! Ода айтумен жарысып, атақ алумен арпалысқан замандастарымызға айтарымыз – Сіз бен Біз жасайтын егемен Қазақ елінің бүгіні мен ертеңі - өткен уақыттың ымырасыз сот таразысы болатынын есіңізде сақтаңыз!
Қоян жылы отыз жыл «қоян бұлтаққа» салып келген әккі жүйенің секем алатын, ес жиятын, көш түзейтін өзгеріс жылы болсын! Өйткені қоянның бір аты «Секем» екенін ұмытпайық!
#бесжан

📢Тәуелсіздік күні бір жақсы жаңалықты хабарлағым келіп тұр сіздерге. Бүгіннен бастап, "Тәуелсіз бақылаушылар" қоғамдық бірлестігінің төрағасымын.

Маған сенім білдіріп, беделді ұйымның тізгінін ұстатқан ұйымның белсенді мүшелеріне, оның ішінде бірлестіктің негізін қалаушылардың бірі Арайлым Назарова - ға айрықша алғыс айтамын. Оның ұйымға сіңірген еңбегі ұшан-теңіз. Талай кәсіби бақылаушы дайындап шықты. Соның бірі мен. Билік түрлі арандату мен қысым жасаса да сайлауларда олардың дегеніне көнген жоқ, айтқанына ерген жоқ.

Ұйымды ары қарай дамыту, абройына дақ түсірмеу маған аманат, мойыныма жүктелген міндет.

"Тәуелсіз бақылаушылар" сайлау сайын өзінің нағыз тәуелсіз екенін дәлелдеп жүр. Өкініштісі, біздің ұйым Алматы аумағында ғана жұмыс істей алады. Менің ұйым тізгінін алғандағы ең басты мақсатым әрі бірінші болып істейтін шаруам — ұйымды республикалық бірлестікке айналдыру. Сонда ғана біз бүкіл облыстан сайлауға бақылаушы қоса аламыз. Бұл — оңай шаруа емес, әрине. Ол үшін елдің барлық өңірінен филиал ашу қажет. Егер елім дейтін азаматтар шын қолдап жатса Нар тәуекел деп осы іске бел шеше кіріспекпін. Әлбетте, алдымен ұйымдағы үзеңгілестерімнен және азаматтық қоғамның белсенді мүшелерінен қолдау күтемін.