Қазақтар орыс тілінде ғана сөйлейтін қазақтардың мүддесін қорғап жатады. Әрине демократия, әрине әркім өзіне ыңғайлы тілде сөйлеуге құқылы, алайда ана тілін білмейтін ұлт жоқ бұл әлемде. Тілге келгенде орыстардың қаншалықты ұлтшыл екендігін Galaxy S9 смартфонын аларда көріп шыққан шолулардан (обзоры) байқадым. Samsung корпорациясы Bixby деген ассистент ойлап тапқан, алайда ол әзірге орыс тілінде сөйлей алмайды. Мен көрген орыс тіліндегі шолулардың барлығы дерлік осы бір ассистентті S9-дың кемшілігі деп бағалады. Олар ол ассистентті тіпті қолданып та көрмейді, себебі ол «Ұлы да құдыретті орыс тілінде» сөйлемейді-міс. Дерлік деуімнің себебі WylsacomRed (танитын шығарсыздар) Bixby ассистенті тіпті Siri-ден жақсы, алайда орыс тілінде сөйлей алмайды деп шындықты айтты. Орыс, француз, португал, неміс сияқты ұлттардан қай жеріміз кем? Неге өз тілімізде сөйлемейміз. Орыстардың ұлтшылдығына тағы бір мысал келтірейін. Мен смартфонымның интерфейсі ағылшын тілінде (қазақ тіліне қойсам барлық сайттардағы латын әріптері қазақшаланып кетеді, себебін әлі таппадым). Technodom'ға барып, орыс саудагер-кеңесшіге мәселемді айтсам, телефонымды беруімді сұрады. Берсем, «Тут у Вас оказывается все на английском, сделайте мне на русском» деп қайырып берді. Міне тілге деген құрмет, тілге деген махаббат. Әйтпесе смартфонда қытай тілі тұрса да қарай беруге болады (оның үстіне сол қыздың өзінде де Galaxy S9 екен). Сондықтан құрметты халқым, қазақ тілінде сөйлеу ұлтшылдықтың белгісі емес, ұлт өкілінің борышы. Кез келген тілді білейік, алайда қазақ тілінде сөйлейік😊
P.S. «Ұлы да құдыретті орыс тілінде» сөзін тырнақшаға алуым – менсінбеушілік емес, дәйексөз болғандықтан тырнақшаға алдым.