Құрметті EagleZ және жазбаға тап болған жан, WhatsApp арқылы таралып жатқан менингококты жұқпа жайлы жалған ақпарға сенбеулеріңізді сұраймын. Әрине, барлығы оған сеніп қалып жатыр, себебі мемлекет тарапынан ағарту жұмыстары жүргізілмеген, халық қарапайым нәрселерді түсінбейді. Кез келген жазбаға сеніп, соны орындап, керісінше денсаулығыңызға нұқсан келтіріп алмаңыздар. Қандайда бір шара қолданбас бұрын дәрігерге көріну қажет. Жұқпаның белгілері: кенеттен көтерілген дене қызымы (37,1 – 40 °С), назофарингит, яғни мұрынның бітелуі, тамақтың қызарып, қышып, ауыруы, бас ауруы, мазасыздық, тәбеттің төмендеуі. Бұл бастапқы белгілер. Бөртпелердің шығуын немесе мойын бұлшықеттерінің ауруын күтудің қажеті жоқ. Жұқпамен күресудің тиімді жолы – алдын алу, себебі жұқпа профилактикасы емнен көрі жеңіл. ПРОФИЛАКТИКА РЕТІНДЕ АНТИБИОТИК ҚАБЫЛДАУ ДҰРЫС ЕМЕС! Антибиотик болашақта сырттан түсетін бактерияларды күтіп жатпайды, іштегі барын өлтіреді! Ал әрқайсымыздың ішімізде қалыпты микрофлора болады. Ешбір себепсіз антибиотик ішу арқылы біз тек сол микрофлораны өлтіреміз. Сондықтан антибиотик жұқпаның алдын алуда тиімсіз, себебі ол вакцина емес, дәрі! Біздің қолымыздан келетін жалғыз шара: адам көп жиналатын жерге бармауға тырысу, барған жағдайда ұзақ кідірмеу, бетперде тағу (жиі ауыстыру), жоғарыда аталған белгілері бар адаммен байланысқа түспеу, белгілерді анықтаған жағдайда бірден жақын арадағы медициналық ұйымға жүгіну.