Мурад Алискеровтың парақшасынан оқып отырмын, бір қыз жазған екен…:

“Отбасым жақсы, ешкім ішпейді, шекпейді. Алайда бәрі ажырасып жатыр. 11 жыл отбасылы болған ағам ажырасып кетті осы жылы, кіші ағам өткен жылы үйленді де 2 апта өткен соң ажырасып кетті, басқа ағам жарты жыл отбасылы болып сосын ол да ажырасып кетті. Мен де әлі тұрмыс құрмадым, бірақ қолымды сұрап келушілер көп.

Өте қиналып кеттім. 5 жыл бұрын тапсырыс берген суретті қайдан табарымды білмеймін [қосымша түсінік: яғни, бұл қыз 5 жыл бұрын балгер-палшыға барып, бір адамның суретін беріп сыртынан оқытқан. Зиян беру мақсатында ма, жолын жабу мақсатында ма, приворот жасаған болуы мүмкін, жалпы солай ҮЛКЕН ХАРАМ істеген. Кейін ол суретті бір жерге көміп тастаған].

Бұл әрекетім туралы ешбір жан білмейді. Мен қатты өкінемін. Не істесем екен?

Менің отбасым жақсы. Бауырларым да дін жолында, алайда жолдары болмайды үнемі.

Сол бір ісім үшін қатты өкінемін. Менің әрекетімнен бүкіл отбасым жапа шегіп жатқандай. Суретті тауып, көзін құртқым келеді. Құдайдан да қатты қорқамын, ертең қалай жауап беретінімді білмеймін…қазір осыны жазып отырып та тоқтай алмай жылаудамын.

Өзгеге жасаған зұлымдығым үшін бізге берілген жаза ма?

Не істесем екен?”

Мурад Алискеров жауап берген:

— Суретті іздеу керек немесе шіріп кеткенінше күтесіз.

Арада біраз уақыт өтсе керек, жаңағы қыз қайта жазған екен. Көмген суретті тауып, өртеген соң жеңілдеп, жақсы бола бастағанын жеткізген.

Ой түйін:

Жаратушы Алла Тағалаға серік қосып, өзінше өзгенің жолын жауып, не ашып жүрген палшы-балгерлер, соларға жүгінгендердің түбі не боп кеткенін көрген кездер аз емес осы қысқа өміріміздің өзінде. Алланың есебі түзу. Өзгеге зияндық ойлаған адам сол бір Құдай алды қылмысы үшін үрім-бұтағымен жауап беріп кетуі мүмкін.

Тәубе, истиғфар, кәффарат. Алла - тәубелерді қабыл етуші, аса Мейірімді.

#ой_түймекке