Рамазан ае якынлашкач, ураза белән бәйле булган төрле хөкемнәр, төрле уйдырмалар, динебездә бернинди дә дәлиле булмаган, яисә дәлиле булып та, кешеләр дөрес аңламый торган сүзләр йөри башлый: «Бер гәҗиттән укыдым», «Бер мулла әйткән иде», «Минем әбием шулай эшли иде»... Төрле фикерләр белән буталып, нишләргә белмичә борчылып, кайгырып йөрүчеләр дә юк түгелдер.

Кадерле укучыбыз! Кулыгызга алган әлеге китап шул буталчыклардан, каршылыклардан арынырга ярдәм итә торган бер хезмәт булыр дип ышанып калабыз. Ураза белән бәйле төрледән-төрле сораулар туарга мөмкин. Шул сорауларның күбесенә җавапларны шушы китаптан таба алырсыз, ин шәә Аллаһ! ӘлхәмдүлиЛләһ, бу җаваплар Коръән, Сөннәттән хәбәр ителгән дәлилләр белән расланган, галимнәребезнең фәтвәләренә нигезләнеп төзелгән.

Дәлил — ул мөселманның коралы. Дәлиле булган, шул дәлилне дөрес аңлаган кеше адашмас һәм аны адаштыра да алмаслар. Аллаһ Сүбхәнәһү үә Тәгалә Коръәндә «дәлил» дигән сүзне «солтан» дип тә атый. Кем ул солтан? Солтан – ул хәким, патша, җитәкче, көч-куәт иясе, барысы да аңа буйсыналар, хөрмәт итәләр. Дәлиле булган кеше дә солтан кебек: ул аягында нык басып тора, аның дәрәҗәсе, көч-куәте бар, аның белән исәпләшәләр, аны хөрмәт итәләр. Галимнәребез шулай аңлаталар. Шушы хезмәт тә кадерле укучыбызны «солтан» итә торган хезмәтләрдән булыр дип ышанасыбыз килә.