Qalaisyn Student 🇰🇿

💥Сыбайлас жемқорлыққа қарсы қызметтің 10 жылдығына орай Қазақстан Республикасы Сыбайлас жемқорлыққа қарсы агенттігінің Алматы қаласы бойынша департаментінің ұйымдастырумен Farabi университетінде "Республикалық сыбайлас жемқорлыққа қарсы студенттік олимпиада" өтті.

🥇Іс-шараға түрлі жоғары оқу орындарынан 20-дан астам студенттік команда қатысты. Ш. Уәлиханов атындағы Көкшетау университетінің заң факультетінің командасы дайындықтың жоғары деңгейін көрсетіп, сенімді түрде бірінші орынды иеленді.

🎓Бұл жетістік студенттер мен профессор-оқытушылар құрамының ерен еңбегінің жемісі болды. Университет басшылығы мен оқытушылары жеңімпаздарды құттықтап, олардың жетістіктеріне мақтаныш сезімін білдіреді.

🏆Әбілқас Сағынов атындағы ҚарТУ командасы футзалдан Қазақстан чемпионы атанды

Астанадағы «Sairan Arena» сарайында 24-28 қараша аралығында футзалдан «University League-2024» ҚР чемпионаты өтті. Оған республиканың түкпір-түкпірінен барлығы 10 команда қатысып, екі топқа бөлінді.

Қарағанды облысының намысын Әбілқас Сағынов атындағы ҚарТУ құрама командасы қорғады.
Топтағы ойындардың қорытындысы бойынша Әбілқас Сағынов атындағы Қарағанды техникалық университетінің командасы бір ойынды тең есеппен өткізсе, қалған үшеуінде жеңіске жетті.

Жартылай финалда астаналық AITU командасын 4:1 есебімен ұттық. Финалдық матчта қарсыламысыз Алматы қаласының Тұран университетінің командасы болды, біздің команда оларға еш мүмкіндік бермей, 5:1 есебімен сенімді жеңіске жетті. Осылайша, Әбілқас Сағынов атындағы ҚарТУ командасы тарихта тұңғыш рет ел чемпионы атанды, - деп атап өтті жаттықтырушы, «Дене шынықтыру» кафедрасының аға оқытушысы Ерлан Оқасов.

Сонымен қатар, ойыншыларымыз жеке есепте де жүлделерге ие болды. Атап айтсақ, команда ойыншылары Кирилл Дуров үздік шабуылшы, ал Жарқынбек Рыспеков үздік қақпашы болып танылды.

Команданы жаттықтырушы, «Дене шынықтыру» кафедрасының аға оқытушысы Ерлан Оқасов пен УЕФА жаттықтырушысы Александр Дьяченко жаттықтырады.

🎓Қазақстанның алты құндылығы: MNU білім алушылары студенттер қатырына қабылдау рәсімінде ұлттық бағдарларды таныстырды

📯2024 жыл 26 қараша күні Астанада Maqsut Narikbayev University білім алушыларына арналған жыл сайынғы студенттер қатарына қабылдау рәсімі өтті. Іс-шара 5000-нан астам қатысушыны жинап, университет үшін маңызды оқиға болды. Бұл кеш жаңа студенттерді академиялық қоғамдастыққа қабылдаудың маңыздылығын атап өтті. Төрт мектептің студенттері — Халықаралық экономика мектебі, Жоғары құқық мектебі, Жоғары гуманитарлық мектеп және Халықаралық журналистика мектебі — іс-шараның бас жүлдесі Студенттер қатарына қабылдау кешінің кубогы үшін бақ сынасты.

🔆1995 жылдан бері өткізіліп келе жатқан студенттер қатарына қабылдау рәсімі жыл сайын ауқымын кеңейтіп, университет пен білім беру қауымдастығы үшін маңызды оқиғаға айналды. Биылғы шараның басты идеясы ҚР Президенті Қасым-Жомарт Кемелұлы Тоқаев Ұлттық Құрылтайда атап өткен қазақстандықтардың алты негізгі құндылығымен үндестік тапты: тәуелсіздік пен отаншылдық, бірлік пен ынтымақ, әділдік пен жауапкершілік, заң мен тәртіп, еңбекқорлық пен кәсіби біліктілік, жасампаздық пен жаңашылдық. Осы құндылықтар жастардың азаматтық ұстанымын нығайтып, ел болашағына деген жауапкершілік сезімін арттырудың негізіне айналды.

Студенттер қатарына қабылдау салтанатты шарасын Ғылым және жоғары білім министрі ашты. Ол өз сөзінде америкалық жазушы Фрэнк Герберттің әйгілі сөзін мысалға келтірді:

«Қорқыныш ақылды өлтіреді. Қорқыныш – ол кішкентай ғана өлім, бірақ бәрімізді құртатын сол болмақ». Қазақ мұны «Көз – қорқақ, қол – батыр» дейді. Мен сіздерге бір ғана кеңес берер едім: ештеңеден қорықпаңыздар. Сіздер – ең үздік ұрпақсыздар. Сіздердің барлық мүмкіндіктеріңіз бар. Цифрландырылған платформаларға, жасанды интеллектке, үздік кітапханаларға баруға, пайдалануға бар мүмкіндік жасалған. Осының барлығын пайдаланыңыздар және ештеңеден қаймықпаңыздар! – деп жігерлендірді министр Саясат Нұрбек.

Жеребе тарту арқылы әр мектепке өз тақырыбы бекітіліп, оларды іс-шара аясында көрнекі түрде таныстыру міндеті жүктелді. Жоғары гуманитарлық мектеп «Тәуелсіздік пен отаншылдық» тақырыбын шебер ұсынса, Жоғары құқық мектебі — «Бірлік пен ынтымақ» құндылықтарын айшықтады.

Халықаралық экономика мектебі «Заң мен тәртіп» ұстанымын, Халықаралық журналистика мектебі «Еңбекқорлық пен кәсіби біліктілік» құндылықтарын ерекше креативпен жеткізді.
Сондай-ақ кеш бағдарламасының аясында ерекше оқиға орын алды — Қазақстанның ең үлкен 🇰🇿туы ашылды. Аумағы 800 шаршы метрді құрайтын, салмағы шамамен 60 килограмм жібек ту – елдің болашағына деген асқақ арманның және Отанға деген шексіз мақтаныштың символын бейнеледі.

🥁Салтанатты рәсім Жақсылық Үшкемпіров атындағы Жекпе-жек сарайында өтті, онда студенттер театрландырылған қойылымдар мен әлеуметтік жобаларын көпшілік назарына ұсынды. Барлық факультеттер ұрпақтан-ұрпаққа мұра болып келе жатқан құрметті кубокты иелену жолында қызу бәсекеге түсті.

🏆Биылғы жылы Халықаралық экономика мектебі лайықты жеңісіне қол жеткізіп, құрметті студенттер қатарына қабылдау кубогының иегері атанды.

🎼 Кештің басты хедлайнері танымал Irina Kairatovna тобы болды. Олардың өнері шараға ерекше қуат пен позитив сыйлап, салтанатты кештің жарқын нүктесін қойды.

🎓СӘТБАЕВ УНИВЕРСИТЕТІНІҢ СТУДЕНТІ «ҚАЗАҚСТАННЫҢ ҮЗДІК СТУДЕНТІ» АТТЫ РЕСПУБЛИКАЛЫҚ БАЙҚАУДА ЖЕҢІМПАЗ АТАНДЫ

Қазақстан Президенті Қасым-Жомарт Кемелұлы Тоқаев «Адал адам – Адал еңбек – Адал табыс» атты бағдарламалық мақаласында ел жастары арасында ұлттық құндылықтарды насихаттаудың маңыздылығын атап өтті. Осы идея аясында елімізде «Қазақстанның үздік студенті» атты республикалық байқау өтіп, ол өз қатарластарына үлгі болатын дарынды және белсенді жастарды анықтауға бағытталды.

🏆 Сәтбаев университетінің 1-курс магистранты Хабибуллин Ар-Рауф Берікбайұлы байқаудың жеңімпазы атанып, оқуда да, қоғамдық қызметте те жеткен тамаша жетістіктерін көрсете білді.

🎓 Ар-Рауф осымен төртінші жыл қатарынан «Satbayev Hunterz» студенттік ұйымының президенті қызметін атқарады, сөйтіп Сәтбаев университетінің студенттеріне кәсіптік бағдар беру және оларға арналған іс-шараларды ұйымдастырумен айналысады. Осы уақыт ішінде ол өз ұжымымен бірге Қазақстанның түкпір-түкпірін аралап, 20 мыңнан астам мектеп оқушыларымен кездесті және оларға мамандық таңдауға көмектесті. Сондай-ақ ол Қазақстан ғылымының негізін қалаушы көрнекті ғалым, академик Қаныш Имантайұлы Сәтбаевтың өмір жолы мен ғылыми-ағарту қызметі туралы айтып, оның ғылыми жетістіктерін насихаттайды.

🎉 Біз Ар-Рауфты осы жеңісімен құттықтап, алдағы қызметіне зор табыс пен биік жетістіктер тілейміз!