СӨЗ СИНЕРГИЯСЫ

Мынау жақыннан , толық түсірілген екен

Күнсұлу Түрікпен орындап, аламан бәйгеде бас жүлде алған жыр - Темірбек Жүргеновке арнау

Темірбек Жүргеновке арнау

Қалың қазақ босқан кезде жерінен,
Қол үзгенде небір боздақ елінен,
Қаралы жұрт үзілгенде демінен,
Ел кегіне қайнап туған Темірбек!

Адыра боп діні менен ділінен,
Айырылардай болған кезде тілінен,
Шайқалғанда бәйтерегі діңінен,
Жалын атып, жайнап туған Темірбек!

Ұлттың рухы езілгенде жаншылып,
Жарақаттың беті қатты аршылып,
Кетер ме деп тұрған кезде жан шығып,
«Алашым» деп арда туған Темірбек!

Жат ұранмен лайланғанда тұнық төр,
Жат қолында байланғанда білікті ер,
Үзілердей болған кезде үміттер,
Зарықтырып сонда туған Темірбек!

***
Жаратқан рақым еткен Алашыма,
Бір қылау түсірмейтін тобасына,
Сан сынақ түссе-дағы мойымайтын
Самғайтын сәуле құйған санасына.
Сыр елім – қойның толы ақық-маржан, 
Айналдың Алты Алаштың анасына. 
Сайланған небір саңлақ Ер сыйладың,
Қазақтың ұлан-ғайыр даласына.
Бақ қонған Қыдыр дарып Сыр елінде
Ержүрек Келменбеттің баласына –
Батырлық, ерлік, билік, әулиелік
Дарыпты Жәрімбеттей данасына.
Ұрпағы Жәрімбеттің Жүрген бидің
Бақ қонған Сырлыбайдай Қарасына.
Қараның көзде нұрлы қарашығы –
Темірбек ердің ері, дарасы да.
Қазақтың маңдайына біткен оғлан
Жанының шипа болған жарасына.
Тең құшқан қазақ, өзбек, тәжік жұртын,
От жүрек сыймаған соң қанасына.
Көтеріп «Қазақ мұңын», жан бітірген
Ағарту, өнер-білім саласына.
Ұстазы – Сыр сүлейі Тұрмағамбет
Шын жүйрік өлең-сөздің сарасына.
Қазақша тіл бітірген сол заманда
Фердоуси жазған «Шаһі-намасына»,
Болғанда ұстаз ондай, шәкірт қандай
Содан-ақ белгілі ғой шамасы да.
Темірдей екпінінен Темірбектің
Мәскеу де түскен дейді сабасына.
Қазақты танытыпты Он күн жүріп,
Орыстың Орда тігіп қаласына.
Паш еткен төл өнерін текті жұрттың
Қалдырмай дос-дұшпанның табасына.
Өресін һәм өнерін танытыпты,
Түскен соң ұлт тағдырдың таласына...
Көңілі көншіген бе жамандардың
Жақсының жармаспаса жағасына?
Дүние-ай, сөйткен Боздақ кете барды-ау,
Ұшырап дұшпандардың жаласына.
Домбырам – ол да мендей зар қағады,
Әуені түскен сайын сағасына. 

***
Дұшпанға салса – арланым,
Досына жұмсақ бағланым,
Көмбеге жетпей құлаған
Қапыда кеткен тарланым.
Алаштың туын көтерген
Бәсі артық туған оғланым.
Орылып түсті-ау тағдырың
Адыра қалып арманың,
Зұлматты ғасыр құрбаны
Бүгулі кеткен бармағың,
Ақырғы демің қалғанша
«Алашым» деуден талмадың.
Білімің сынға түскенде
Алдыңа жанды салмадың.
Дарының сынға түскенде
Көкке ұшқан құстай самғадың.
Сабырың сынға түскенде
Таныттың рухтың салмағын.
Иманың сынға түскенде
Көтердің Хақтың салғанын.
Сезімің сынға түскенде
От болып лаулап жанғаның,
Жалыны күшті алаудан,
Жүзіңді бұрып алмадың.
Азаттық күткен халқыңның
Ақиқат қылдың жалғанын.
Өлмейтін қайсар рухыңды
Бүгінгі күнге жалғадың.
Рухыңа тағзым етумен
Доғардым сөздің қалғанын...

Ләйлі Құндақбай
13.11.2024.

Шапағат Сәндібек сіңілім Қорқыттың "Башпай" күйін тартып отыр

Сыр сүлейі, жыр дүлейі Күнсұлу Түрікпен Темірбек Жүргеновке арналған републикалық байқаудан бас жүлде алды. Темірбек Жүргеновке арналған арнауды орындап отыр.