The Qman

ТОҚАЕВТЫҢ АДВОКАТТАРЫ ҺӘМ САБОТАЖТАНУШЫЛАРҒА

Қазақстанда төтенше жағдай болғанда әлеуметтік желіде журиктер мен блогерлер президентті ақтап, министр/әкімді даттап жатады. Бәрінің аргументі шамамен «Халыққа жаны ашымайтын, мінезі жоқ, жауапкершілігі нөл әкім/министр, президентке саботаж жасап отыр, оларды тез арада қызметтен қуу керек» дегенге келеді. Бір сөзбен айтқанда, тигрофан-саботажтанушылар бір уақытта оянады.

Осы орайда, Тоқаевтың адвокаттары һәм саботажтанушыларға мынадай сұрақтарым бар:

1.Шын мәнісінде әкім/министр жауапкершілікке дайын батыл, елдің қамын жейтін басшы болғанын қаласыңыздар, «саботаждың құрбаны» болып отырған президенттен неге әлі күнге дейін министрлерді парламент, әкімдерді жергілікті халық сайламайтынын сұрамайсыздар?

2.Қазақстанда президент шексіз биліктің иесі. Шексіз билік = аса үлкен жауапкершілік деп есептемейсіздер ме? Неге «саботаждың құрбаны» болып отырған президенттен «Жауапсыз, тәжірибесіз, жігерсіз министрді/әкімді қандай критерийлерге сүйеніп тағайындадыңыз? Осы тағайындауыңыз адамдардың өліміне себеп болды деп ойламайсыз ба?» деп сұрамайсыздар?

3.Тоқаевтың кадр саясатына көңіліңіз толмаса, неге оны сол әкім/министрді тағайындаған кезде айтпайсыздар?

4.Кәсіби саботажтанушы ретінде алда президент тағайындаған қай министр/әкім Тоқаевқа саботаж жасауға дайындалып отыр деп ойлайсыздар?

5.Қашанға дейін «президентіміз – елдің қамын ойлайтын жалғыз менеджер, ал уәзірлер – оңбағандар» деген тізесі шыққан манипуляция тактикасына сүйеніп, қайғылы оқиғаларда опат болған отандастарыңыздың өліміне президенттің саяси жауапкершілігі бар екеніне көз жұмып, елді ақымақ көру ойыңызда бар?

Постсайлау пост

Сайлауды ең лас әрі әділетсіз жолмен өткізу арқылы Тоқаев және оның айналасы өзіне берілген Мәжіліс пен мәслихаттарды жасақтадық деп ғана ойласа, онда қатты қателеседі. Сайлауды клоунадаға, парлементті циркке айналдыру арқылы олар жақын болашақта өздерінің биліктен бейбіт жолмен кетуін қиындатты.

Ең бастысы, қазіргі авторитар режим азаматтарға шынайы сайлау арқылы саяси өмірге араласуға мүмкіндік бермей, Қаңтар қырғыны секілді оқиғалардың қайталану ықтималдығын арттырды. Өйткені елдегі проблемалардың түптамыры саясатқа араласудағы теңсіздікте, яғни саяси маргинализацияда жатыр. Ал саяси маргинализация әлеуметтік және экономикалық маргинализацияны ушықтырады. Сәйкесінше өз елінде өзін өгей сезінетін азаматтардың саны тоқтаусыз өсе береді. Түптің түбінде осының бәрі Қазақстанды толық failed state-ке айналдырады.

Бірінші кезекте оған жауаптылар Тоқаев және оның әкімшілігі, режимнің олигархтары, авторитар режимнің үкімет пен жергілікті әкімдіктердегі өкілдері, режимге лояльдігі арқасында мембюджетті субсидиялар арқылып сорып отырған ірі бизнес, қуыршақ партиялардың серкесі және бірмандатты округтен депутат болуға келіскен көпес-политикандар, пропагандамен миллиондардың санасын улаған инфосығандар, 19 наурызда мемлекеттік телеарналар мен режимшіл ютуб–каналдарда сайлаудың легитимдігін арттыру үшін онлайн марафондатқандар, азаматтардың дауысын ұрлаған сайлау комиссиялары мүшелері және сайлау учаскелерінде балаларының суретін саяси саудаға салып, сайлау әділ өтті деп 20 мың теңгелік пост жазғандар болады.

Жаңа Қазақстанды құрып жатырмыз деп Ескі Қазақстанды жаңғыртып, Қазақстанды мемлекет ретінде институционалды түрде іштен күйретушілер, алдағы уақытта бейбіт күнде азаматтарға ескертусіз тағы да оқ атылатын болса, онда оның жауапкершілігі бұйрық берушімен қатар сіздің де мойныңызда болады.

Осыны ұмытпаңыздар.

Астана әкімдігі журналистер құқығын шектейтін заңға қарсы митиңге рұқсат бермеді

Астана қаласының Ішкі саясат басқармасы қоғамда қызу талқыланып және сарапшылар мен журналистер сынына ұшырап жатқан «Масс-медиа туралы» заң жобасына қарсы митиң өткізуге рұқсат бермеді. Бұл туралы Factcheck.kz сайты хабарлады.

Митиңді 19 ақпанда өткізу туралы өтінішті Құқықтық медиа орталығының заңгері Гүлмира Біржанова берген. Алайда Астана қаласының ішкі саясат басқармасы Бейбіт жиналыстарды ұйымдастыру және өткізу тәртібі туралы заңға сүйеніп, митиңге рұқсат бермеді.

Бұл заңға сәйкес, жергілікті атқарушы орган митиң өтетін орында ресми, мәдени, спорттық құрылыс-монтаждау жұмысы және өзге де іс-шаралардың өткізілуі жоспарланса митиң өткізуге рұқсат бермейді. Бірақ Ішкі саясат басқармасы ресми жауабында нақты не өтетінін ескертпеді.

Бұған дейін Астана мен Алматыда өткен баспасөз жиынында Гүлмира Біржанова ведомство медиа қызметкерлерінің «Масс-медиа туралы» заң жобасына қатысты жолдаған ұсыныстың бірде-бірі ескерілмегенін айтқан.