Malik Otarbayev

Жамбыл облысында көрнекті мемлекет және қоғам қайраткері Тұрар Рысқұловтың 130 жылдығы аталып өтті.

«Орталық мемлекеттік архив» РММ директоры, тарих ғылымдарының кандидаты Сәбит Шілдебайдың «Қазақ АКСР мемлекеттік билік жүйесінің өкілдері» атты ғылыми анықтамалық жинақтың таныстырылымы өтті.
Отандық тарихты зерттеу бойынша тың деректер ұсынған кітаптың тарихшылар үшін таптырмас еңбек екені анық. «Қорытылған» тарихтың жазылуына жинақтың мол мүмкіндік беретініне сөз жоқ. Тұсаукесер рәсімінде сөз сөйлеген беделді тарихшылар мен архив саласының белді қызметкерлері аталған еңбекке осындай жоғары баға берді.
Белгілі ғалым Сәбит Қамытбекұлы ұлттық тарих саласын дамытуға қосқан зор үлесі үшін және архив саласындағы тынымсыз еңбегі үшін төсбелгісімен қоса Президент Алғысымен марапатталды.

Әл-Фараби атындағы ҚазҰУ-дың кітапханасында Франкфурт кітап жәрмеңкесіне арналған екі күндік семинар басталды.
Іс-шараның тақырыбы – «Баспа ісіндегі заманауи үрдістер және авторлық құқық менеджементі». Форумда кітап саласының жетекші сарапшылар мен мамандары баспагерлер мен авторларға қатысты мәселелерді талқылап, заманауи полиграфия мүмкіндіктерін саралады.

Пленарлық отырысқа ҚазҰУ Басқарма Төрағасы-Ректоры Жансейіт Түймебав, Қазақстан Республикасы Президентінің кеңесшісі Мәлік Отарбаев, Франкфурт кітап жәрмеңкесінің президенті және бас директоры Юрген Боос қатысты.

​Семинардың негізгі мақсаты қатысушылар арасында білім мен тәжірибе алмасу, кітап шығару саласындағы заманауи үрдістерді және авторлық құқықты басқарудың тиімді тәсілдерін талқылау.

Қазақстан Республикасы Президентінің кеңесшісі Мәлік Отарбаев Франкфурт Еуропаның кітап астанасы ретінде әлемдік кітап сататын орынға, кітап тарату орталығына айналып, баспаханалар мен баспалардың халықаралық ынтымағын кеңейте түсетінін айтты.

«Германияның федералды сыртқы істер министрлігінің және Франкфурт кітап жәрмеңкесінің демеушілігімен Орталық Азияда алғаш рет баспа ісінің өзекті мәселелеріне арналған екі күндік семинар басталды. Осы бастаманы қолдаған Франкфурт кітап жәрмеңкесінің президенті және LITPROM Президенті Юрген Боос мырзаға арнайы алғыс айтқым келеді. Өйткені Франкфурт кітап жәрмеңкесінің Алматыға келуі – еліміздегі баспагерлер, авторлар және кітап сатушылар үшін ең үлкен, аса маңызды оқиға. Бұл семинардың еліміздегі осы сала мамандарына зор әсері болатыны анық»– деді М. Отарбаев.

Әл-Фараби атындағы ҚазҰУ-дың Баспасөз қызметі

Көрнекті мемлекет және қоғам қайраткері Тұрар Рысқұловтың 130 жылдық мерейтойы Әл-Фараби атындағы Қазақ Ұлттық университетінде аталып өтті.
«ХХІ ғасырдағы «Түркістан идеясы» атты ғылыми-практикалық конференцияға белгілі тарихшылар, публицист жазушылар, әдебиеттанушы ғалымдар мен «тұрартанушылар» қатысып, «Тұтас Түркістан идеясы» турасында баяндамалар жасалды.
Жиында Ел Президентінің ыстық ықыласы мен жылы лебізі жеткізілді.

Көрнекті мемлекет және қоғам қайраткері Тұрар Рысқұловтың 130 жылдық мерейтойы аясында ұлт мақтанышының атақонысы – Түркістан облысында аталып өткен «Тұрар және Түркістан идеясы» тақырыбындағы халықаралық конференциясында Ел Президенті Қасым-Жомарт Тоқаевтың арнайы жолдаған Құттықтау хаты оқылды.

ТҮРКІСТАНДА АҚЫН БАҚЫТЖАН АЛДИЯРДЫҢ «АНАЛАРДЫҢ АНАСЫ» ӘДЕБИ-САЗДЫ КЕШІ ӨТТІ

Түркістанда Қазақстан Жазушылар одағының мүшесі, Халықаралық «Алаш» әдеби сыйлығының лауреаты, «Ерен еңбегі үшін» төсбелгісінің иегері Бақытжан Алдиярдың «Аналардың анасы» әдеби-сазды кеші өтті. Алдымен келушілер мерейтой иесіне арналған тақырыптық кітап көрмесін тамашалады.

Мазмұнды жиынды ҚР Президентінің кеңесшісі Мәлік Отарбаев ашып беріп, ҚР Президентінің алғыс хаты мен төсбелгісін табыстады. Облыс әкімінің орынбасары Ертай Алтаев, Түркі Мемлекеттері жазушылар одағының төрағасы Ұлықбек Есдәулет дарын иесінің шығармашылығына тоқталды.

Шара барысында кеш иесі туралы арнайы дайындалған бейнеролик көрсетілді. Кешті ақын, ҚР Жазушылар одағының Астана қаласындағы өкілі Дәулеткерей Кәпұлы жүргізіп отырды. ҚР Мәдениет қайраткері, «Құрмет» орденінің иегері, белгілі айтыскер ақын Бекарыс Шойбеков ақынға арнауын айтты.

Ақын, Халықаралық «Алаш» әдеби сыйлығының иегері Жарас Сәрсек, әдебиет сыншысы Амангелді Кеңшілікұлы, ақын, мемлекеттік «Дарын» Жастар сыйлығының лауреаты Ерлан Жүніс қаламгерге ақ тілегін білдірді. Сонымен қатар Алматы, Жамбыл, Қызылорда облысы мен туған жері Қазығұрт ауданы әкімдіктерінің құттықтау хаты табысталып, ақынға құрмет көрсетілді.

Кешке елімізге белгілі әнші, композитор Роза Әлқожа арнайы қонақ болып, ақынның сөзіне жазылған әндерді шырқады. Түркістан қалалық балалар мен жасөспірімдер орталығының көркем сөз үйірме оқушылары Бақытжан Алдиярдың өлеңдерін оқыды. «Жаңа леп» ұжымының өнерпаздары махаббат тақырыбындағы өлеңдерінен әдеби композициясы мен ел арасына кеңінен танылған «Ерке қыз» әнін орындады.

Айта кетейік, Бақытжан Алдияр 1974 жылы 20 қазанда Оңтүстік Қазақстан облысы, Қазығұрт ауданының «Тұрбат» ауылында дүниеге келген. Қазақстан Жазушылар Одағына 2001 жылы мүше болып қабылданды. Шығармалары төрт ұжымдық жинаққа енгізілген. 1998 жылы «Жібек жолы» баспасынан «Көзайым» атты жеке жыр жинағы жарық көрді. Өлеңдері 3 жинаққа енген, 4 жеке кітабы бар. Көптеген халықаралық, республикалық мүшәйралардың жүлдегері 2012 жылы «Ерен еңбегі үшін» медалімен марапатталған.

Түркістан облысы мәдениет басқармасының баспасөз қызметі